އެމްޑީޕީ ހަރުގެ ދެ ފަހަރެއްގެ މަތިން ހުއްދަ ނެތި ބޭނުން ކޮށްފި: ފައްޔާޒު
ޕްރައިމަރީގެ ހަރަކާތްތަކުގެ ބޭނުމަށް އެމްޑީޕީގެ ހަރުގެ ދެ ފަހަރެއްގެ މަތިން ހުއްދަ ނެތި ބޭނުން ކޮށްފައިވާ ކަމަށް އެ ޕާޓީގެ ޗެއާޕާސަން ފައްޔާޒު އިސްމާއިލް ވިދާޅުއްވެއްޖެއެވެ.
މިރޭ ކުރިއަށްދިޔަ އެމްޑީޕީގެ ގައުމީ މަޖިލިސް ބައްދަލުވުމުގައި ވާހަކަދައްކަމުން ފައްޔާޒު ވިދާޅުވީ، ޕްރައިމަރީގެ ހަރަކާތްތަކުގެ ބޭނުމަށް ޕާޓީގެ ހަރުގެ ބޭނުންކުރައްވަން ޖެހިވަޑައިގަންނަވާނީ ހުއްދަ ހޯދައިގެން ކަމަށެވެ. އެހެންނަމަވެސް، ދެ ފަހަރެއްގެ މަތިން އެމްޑީޕީގެ ހަރުގޭގައި ހަރަކާތްތަކެއް ހުއްދަ ނުހޯދާ ކުރިއަށް ގެންގޮސްފައިވާ ކަމަށް އޭނާ ވިދާޅުވި އެވެ.
ފައްޔާޒު މިފަދައިން ވިދާޅުވެފައި މިވަނީ، އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެކަން އިއުލާން ކުރައްވައި، ފޯމުވެސް ހުށަހަޅާފައިވާ،އެ ޕާޓީގެ ރައީސް މުހައްމަދު ނަޝީދުގެ، ތާއީދު ފޯމު ފުރުމަށާއި، އަދި ކެމްޕޭން ބައްދަލުވުމެއް ބޭއްވުމަށް އެމްޑީޕީގެ ހަރުގެ ބޭނުންކުރި މައްސަލައާއި ގުޅިގެން ކަމަށް ބެލެވެއެވެ.
ފައްޔާޒު ގެ ވާހަކައިގައި ރައީސް ނަޝީދު ގެ ނަން ވިދާޅުނުވި ނަމަވެސް، އެމްޑީޕީ ރިޔާސީ ޕްރައިމަރީގައި ރައީސް ނަޝީދުގެ އިތުރުން ވާދަ ކުރައްވާ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު، އެމަނިކުފާނުގެ ކެމްޕޭން ހަރަކާތްތައް ކުރިއަށް ގެންދަނީ ޗާންދަނީ މަގުގައި 'ރައީސް ސޯލިހް 2023'ގެ ނަމުގައި ވަކިން ޖަގަހައެއް ހަދައިގެންނެވެ.
އެހެންކަމުން މިއީ ރައީސް ނަޝީދާއި އެމަނިކުފާނުގެ ފެކްޝަންގެ މެންބަރުންނަށް ނުސީދާކޮށް އަމާޒުކުރެއްވީ ވާހަކަފުޅެއް ކަމަށް ބެލެވެއެވެ.
އެމްޑީޕީގެ ޗެއާޕާސަން ކަނޑައެޅުމަށް ބޭއްވި އިންތިޚާބުގެ ކެންޕެއިން ތެރެއިން އެ ޕާޓީ ދެ ފެކްޝަނަކަށް ބެހިގެން ދިޔަގޮތަށް، އިންތިޚާބު ނިމުނު ފަހުން ވެސް އަދިވެސް ޕާޓީގެ ތެރެއިން ދެ ފެކްޝަންގެ ކޯޅުންތައް އަަބަދުވެސް ދަނީ ފެންނަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
