ފަތުވާކޮމިޓީގެ ނިންމުމަށް އިހުތިރާމް ކުޑަވާގޮތަށް މީޑިއާ އާ ވާހަކަދައްކާފައެއް ނުވާނެ: ހުރާ ކައުންސިލް

ފަތުވާކޮމިޓީގެ ނިންމުންތަކަށް އިހުތިރާމް ކުޑަވާގޮތަށް ހުރާ ކައުންސިލުން ވާހަކަ ދައްކާފައިވާކަމަށްބުނެ ދައުރުވަމުންދާ ހަބަރުތައް އެ ކައުންސިލުން ދޮގުކޮށްފިއެވެ.

ވޮއިސްއަށް މައުލޫމާތު ހިއްސާކުރައްވަމުން ހުރާ ކައުންސިލްގެ ރައީސް އީސާ އަހުމަދު ވިދާޅުވީ، ފަތުވާ ކޮމިޓީން މޮނިއުމަންޓާ ގުޅޭގޮތުން ނެރުނު ފަތުވާއަށް ހުރާ ކައުންސިލުން ގޮންޖަހައި މީޑިއާއަކާ ވާހަކަދެއްކިކަމަށް ބުނާ ވާހަކާގައި އެއްވެސް އަސްލެއްނެތް ކަމަށެވެ. އެގޮތުން މޮނިއުމަންޓްތައް ބެހެއްޓުމާ ގުޅޭގޮތުން ފަތުވާ މަޖިލީހުން ނެރުނު ނިންމުމަށް ގޮންޖަހައި ހުރާގައި ހުރި މޮނިއުމަންޓް ނުނަގާނޭކަމަށް ބުނެ، މީޑިއާއަށް މައުލޫމާތު ހިއްސާކޮށްފައި ނުވާނޭކަމަށާއި މިކަމުގައި ބައެއް މީޑިއާތަކުން ހަބަރު ގެނެސްދީފައިވަނީ ޒިންމާދާރުކަން ކުޑަގޮތަކަށް ކަމަށްވެސް އޭނާ ފާހަގަކުރެއްވިއެވެ.

އީސަ ވިދާޅުވީ ހުރާ ކައުންސިލަކީ ސަރުކާރުގެ ކަމާބެހޭ އިދާރާތަކުން ނިންމާ ނިންމުންތަކަށް އިހުތިރާމުކުރަމުން އަންނަ ކައުންސިލެއް ކަމަށާއި، ފަތުވާކޮމިޓީތަކުން ނިންމާ ނިންމުންތަކަށް ގޮންޖަހައި ކަންކަން ކުރުމަކީ ހުރާ ކައުންސިލުން އަމަލުކުރާނޭ ގޮތެއް ނޫންކަމަށެވެ. އެގޮތުން ފަތުވާ ކޮމިޓީން ނިންމާ ނިންމުމަކާ ގުޅިގެން ސަރުކާރުގެ ކަމާބެހޭ އިދާރާއިން އެ ނަގަން އަންގައިފިނަމަ އެކަން ކައުންސިލަށް ހުއްޓުވުމުގެ ބާރެއް ނޯންނާނޭކަމަށާއި، ކައުންސިލުން އެކަމާ ދެކޮޅަށް މަސައްކަތްކުރުމުގެ މާނައެއްވެސް ނެތްކަމަށް ކައުންސިލްގެ ރައީސް ފާހަގަކުރެއްވިއެވެ.

ބަޔަކު ހަރާމްކަމެއް ކަމަށް ނިންމި ނަމަވެސް ހުރާގައި ބަހައްޓާފައިހުރި މޮނިއުމަންޓް ނުނަގާނޭކަމަށް އެރަށުކައުންސިލްގެ ނައިބުރައިސް ވިދާޅުވެފައިވާކަމަށް ބައެއް މީޑިއާތަކުން ވަނީ ރިޕޯޓްކޮށްފައެވެ. އެގޮތުން ފަތުވާއިން އެކަން ނިންމި ނަމަވެސް މޮނިއުމަންޓް ނެގުމުގެ ވިސްނުމެއް ނެތްކަމަށްވެސް ކައުންސިލުން ބުނެފައިވާކަމަށް މީޑިއާއިން ވަނީ ފާހަގަކޮށްފައެވެ.

މާކަނައެއް ފެންނަގޮތަށް ހުރާގައި މޮނިއުމަންޓެއް ބަހައްޓާފައިވަނީ މިއަހަރުގެ ސެޕްޓެމްބަރުމަހުގެ ތެރޭގައެވެ. ހުރާ ބަނދަރުމަތި ސަރަހައްދުގައި މި މޮނިއުމަންޓް ބަހައްޓާފައިވަނީ ހުރާގެ ގިނަ އަދަދެއްގެ ރައްޔިތުންގެވެސް ބައިވެރިވުމާއެކުގައެވެ. އެ މޮނިއުމަންޓަށް އޮގަސްޓްމަހު ގެއްލުންދިން ނަމަވެސް ލިބުނު ގެއްލުންތައް ވަނީ މަރާމާތުކޮށް ރަނގަޅުކޮށްފައެވެ.

މާލެއަތޮޅު ހުރައަކީ ވަރަށް ގިނަ އަދަދަކަށް ފަތުރުވެރިން ޒިޔާރަތްކުރާ ރަށެކެވެ. ހުރާގައި ގިނަ އަދަދެއްގެ ގެސްޓްހައުސްތައް ހުންނައިރު، ރަށަށް މައިގަނޑުގޮތެއްގައި އާމްދަނީ ލިބެމުން އަންނަ އެއް ދާއިރާއަކީވެސް ޓޫރިޒަމްކަން ފާހަގަކޮށްލެވެއެވެ.