އެމްޑީޕީން ފުލެޓް ދިނީ އަރިސް މީހުންނަށާއި އާއިލީ މީހުންނަށް - ނިހާދު

ނިމިދިޔަ އެމްޑީޕީ ސަރުކާރުން ފުލެޓްދިން އިރު ފުލެޓް ދީފައިވަނީ އެޕާރޓީގެ އިސްވެރިންގެ އާއިލީ މީހުންނަށާއި އެބޭފުޅުންގެ އަރިސް މީހުންނަށް ކަމަށް ނިމިދިޔަ އިބްރާޙިމް މުޙައްމަދު ޞާލީޙުގެ ސަރުކާރުގައި އެމަނިކުފާނުގެ އެންމެ އަރިހުގައި މަސައްކަތް ކުރެއްވި އެއް މެމްބަރުކަމަށްވާ އައްޑޫ ފޭދޫ ދާޢިރާގެ މެމްބަރ މުޙައްމަދު ނިހާދު ވިދާޅުވެއްޖެއެވެ.

ނިހާދު މިފަދައިން ވިދާޅުވެފައި ވަނީ މިއަދު ކުރެއްވި އެކްސް ޕޯސްޓެއްގައެވެ. އެ ޕޯސްޓުގައި ނިހާދު އިތުރަށް ވިދާޅުވެފައިވަނީ އެމްޑީޕީ ސަރުކާރުން ނުހައްޤުން އެތައްކަމެއް ކޮށްފައިވާކަމަށެވެ. އެގޮތުން އޭނާގެ ޕޯސްޓުގައި ވަނީ އޭގެ ލިސްޓެއް ހިމަނުންވާފައެވެ.

އޭގެތެރޭގައި ނިމިދިޔަ އެމްޑީޕީ ސަރުކާރަށް ޢާއްމުންގެ ނުރުހުން އެންމެ ބޮޑަށް އަމާޒުވި ބޯހިޔާވަހި ކަމުގެ ތެރޭގައި ހިމެނޭ ގޯތި ދިނުމާއި ގުޅޭގޮތުންވެސް ވިދާލުވެފައި ވަނީ ގޯތި ދިނީތީ ދީފައިވަނީ ހަމަ އާއިލީ މީހުންނަށާއި އެންމެ އަރިސް މީހުންނަށް ކަމަށެވެ. ހަމަ އެއާއިއެކު އެސްއެމްއީ ލޯނުގެ ކަންތައްވެސް ހަމަ ކުރެއްވީ އެހެން ކަމަށެވެ.

އޭގެ އިތުރުން އަޑީތެލާއި ހޮޅި ނުއަގުގައި ގަނެފައިވާ ކަމަށާއި، އަނބިދަރީންނަށް ނުހައްޤުން ބޮޑަތި ވަޒީފާތައް ދީފައިވާ ކަމަށެވެ.

ނިމިދިޔަ އެމްޑީޕީ ސަރުކާރު ދިފާޢުކުރެއްވުމުގައި އެންމެ ގަދައަށް މަސައްކަތް ކުރެއްވި އެއް މެމްބަރުގެ ގޮތުގައި އޭރު ފާހަގަ ކުރެވުނު އައްޑޫ ފޭދޫ ދާޢިރާގެ މެމްބަރ ނިހާދު މިވަގުތު ހުންނެވީ އެމްޑީޕީގެ ސިޔާސަތުތައް ކަމުނުދާކަމަށް ވިދާޅުވެ، މިހާރުގެ ވެރިކަންކުރާ ޕާރޓީ ޕިއެންސީއަށް ސޮއިކުރައްވާ އެޕާރޓީގެ މަޖިލިސް މެމްބަރެއްގެ ގޮތުގައެވެ.

އެމްޑީޕީ ސަރުކާރުން ނުހައްޤުން ކުރިކަންތައްތަކުގެ ތެރެއިން ބައެއް ލިޔުއްވާ ލިސްޓެއްގެ ގޮތުގައި ކުރެއްވި އެކްސް ޕޯސްޓް ނިންމާލައްވަމުން ނިހާދު ވިދާޅުވެފައި ވަނީ ނުހައްޤުން ކަންތައްތައް ކުރައްމުންގެންދާ އެފަދަ މީޙުންގެ ކިބައިން ޤައުމު ސަލާމަތްކުރުން ލާޒިމްކަށެވެ.

"މިފަދަ މީހުންގެ ކިބައިން ޤައުމު ސަލާމަތްކުރުން ލާޒިމް ! " ނިހާދުގެ އެކްސް ޕޯސްޓު ނިންމާލައްވަމުން ވިދާޅުވެފައިވެއެވެ.

މެމްބަރ ނިހާދު މިފަދައިން ވިދާޅުވެފައިވާއިރު ނިމިދިޔަ އެމްޑީޕީގެ ސަރުކާރުން ކަރްޕްޝަނުގެ އެތަށް ކަމެއް ކޮށްފައިވާކަމަށް އާއްމުން ގެންދަނީ ބުނަމުންނެވެ. އަދި އޭގެ ތެރެއިން ގިނަ މައްސަލަތަކެއް ކަމާއި ގުޅުންހުރި މުއައްސަސާތަކުން މިހާރު ގެންދަނީ ތަޙްޤިގުވެސް ކުރަމުންނެވެ.