އިދިކޮޅުގެ މުޒާހަރާ ރޫޅާލުމަށް ފުލުހުން ބާރުގެ ބޭނުންކޮށް އެތައް ބަޔަކަށް އަނިޔާކޮށްފި

ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމު މިނިވަންކުރުމަށް ގޮވާލާ ބުރާސްފަތި ދުވަހުގެ ރޭ އިދިކޮޅުން މާލޭގައި ކުރި މުޒާހަރާ ރޫޅާލުމަށް ފުލުހުން ހާލަތާއި ނުބައްދަލު ބާރުގެ ބޭނުންކޮށް މުޒާހަރާގެ ބައިވެރިންނަށް އަނިޔާކޮށްފި އެވެ.

މިދިޔަ ޑިސެމްބަރު މަހުގެ 25 ވަނަ ދުވަހު ކްރިމިނަލް ކޯޓުން ރައީސް ޔާމީންގެ މައްޗަށް 11 އަހަރުގެ ޖަލު ހުކުމެއް ކުރުމާއި ގުޅިގެން އިދިކޮޅުން ގެންދަނީ އެ ހުކުމް ބާތިލުކޮށް އެމަނިކުފާނު މިނިވަންކުރުމަށް ގޮވާލާ ސިލްސިލާގޮތެއްގައި މުޒާހަރާ ކުރަމުންނެވެ.

ބުރާސްފަތި ދުވަހުގެ ރޭވެސް ކުރިއަށް ގެންދިޔައީ ހަމަ އެ ސިލްސިލާގެ މުޒާހަރާއެކެވެ. އެހެން ނަމަވެސް، މުޒާހަރާ ރޫޅާލުމަށް ފުލުހުން ވަނީ ބައިވެރިންގެ ގަޔަށް ޕެޕާ ސްޕްރޭ ޖަހާފައެވެ. އެގޮތުން ބައެއް މީހުންގެ މޫނާ ދިމާކޮށް ޕެޕާ ސްޕްރޭ ޖެހުމާއި ގުޅިގެން ބޮޑެތި އަނިޔާތަކެއް ވަނީ ލިބިގެން ގޮސްފައެވެ.

މުޒާހަރާ ރޫޅާލުމަށް ފުލުހުން ހާލަތާއި ނުބައްދަލު ބާރުގެ ބޭނުންކޮށްފައިވާއިރު، މުޒާހަރާ ރޫޅާލުމުގެ ތެރެއިން 3 މީހުން ވަނީ ހައްޔަރުކޮށްފަ އެވެ. އޭގެތެރޭގައި މާލޭ ސިޓީގެ ކައުންސިލް މެމްބަރު އަހުމަދު އައިފާނުވެސް ހިމެނެެއެވެ.

އައިފާނު ހައްޔަރުކުރުމުގެ ތެރޭގައި ފުލުހުން އޭނާގެ މޭމައްޗަށް ކޮޅުފައިން އަރާ އަނިޔާކުރަމުންދާ މަންޒަރު ފެންނަ ވީޑިއޯއެއްވެސް ވަނީ އާންމުވެފަ އެވެ.

އިދިކޮޅުން ކުރިއަށް ގެންދާ މުޒާހަރާތަކުގައި ބައިވެރިވާ މީހުން އިތުރުވަމުން އަންނަކަމަށް އިދިކޮޅުން ވަނީ ބުނެފައެވެ. އަދި ރައީސް ޔާމީނަށް އިންސާފު ހޯދާދީފައި ނޫނީ އެ މުޒާހަރާތައް ހުއްޓާނުލާނެކަމުގެ ޔަގީންކަންވެސް އިދިކޮޅުން ދެއެވެ.