ސަރުކާރުން ޝަންގްރިއްލާގެ ހިއްސާ ދޫކޮށްލައިފި، ސެޕްޓެމްބަރުގައި ހުޅުވަން ތައްޔާރުވަނީ
އައްޑޫ ސިޓީގެ ޝަންގްރިއްލާ ރިސޯޓުގައި އޮތް ސަރުކާރުގެ ހިއްސާ ދޫކޮށްލަން ނިންމާ އެކަން އެ ރިސޯޓު ހިންގާ ކުންފުންޏަށް އަންގާފައިވާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެ އެވެ.
ބުރާސްފަތި ދުވަހުގެ ރޭ އައްޑޫ ސިޓީގައި އޮތް ރައީސް ޞާލިހުގެ ކެމްޕޭނު ޖަލްސާގައި ވާހަކަދައްކަވަމުން އެމަނިކުފާނު ވިދާޅުވީ ކޯވިޑާއި ގުޅިގެން ޝަންގްރިއްޔާ ރިސޯޓު ބަންދުކުރުމާއި ގުޅިގެން އައްޑޫ ސިޓީއަށް ނިސްބަތްވާ ވަރަށް ގިނަ ޒުވާނުންގެ ވަޒީފާތައް ގެއްލި، އެމީހުންގެ އާމްދަނީއަށް ބުރޫއަާފައިވާ ކަމުގެ ކަންބޮޑުވުންތައް އެމަނިކުފާނާއި ހަމަޔަށް އައިސްފައިވާކަމަށެވެ.
އައްޑޫ ސިޓީގައި މީގެކުރިން ބޭއްވި ޖަލްސާއެއްގައި ވާހަކަދައްކަވަމުން ރައީސް ޞާލިހު ވިދާޅުވީ ޝަންގްރިއްލާ އަލުން އޮޕަރޭޝަނަށް ގެނެވޭނީ ސަރުކާރުގެ ހިއްސާ ދޫކޮށްލައިގެން ކަމަށެވެ.
އެއާއެކު ރޭ އެމަނިކުފާނު ވަނީ ސަރުކާރުގެ ހިއްސާ ދޫކޮށްލަން ނިންމާފައިވާކަން އިއުލާނުކޮށްފަ އެވެ. ރައީސް ޞާލިހު ވިދާޅުވީ އެ މައްސަލައިގައި މީގެ ދެ ދުވަސް ކުރިން އިކޮނޮމިކް ކައުންސިލުން ގޮތެއް ނިންމާފައިވާކަމަށެވެ. އެގޮތުން އެ ކައުންސިލުން ނިންމާ ސަރުކާރުގެ ހިއްސާ ދޫކޮށްލަން ކަމަށާއި، އެކަން ސިޓީއަކުން ސިޓީ ކައުންސިލާއި ޝަންގްރިއްލާގެ ވެރިންނަށް އަންގާފައިވާނެކަމަށް ރައީސް ޞާލިހު ވިދާޅުވި އެވެ.
އެކަން ފާހަގަކުރައްވާ ރައީސް ޞާލިހު ވިދާޅުވީ ދެން އޮތީ ޝަންގްރިއްލާ ރިސޯޓު ހިންގާ ފަރާތުން ގޮތެއް ނިންމުން ކަމަށެވެ. މިހާތަނަށް އެ ފަރާތާއި ދެކެވުނު ވާހަކަތަކުގެ ތެރޭގައި އަންނަ ސެޕްޓެމްބަރު ހިސާބުގައި އަލުން އެ ރިސޯޓު ހުޅުވޭނެކަމުގެ ޔަގީންކަން އެ ފަރާތުން ދެއްވާކަމަށް ރައީސް ޞާލިހު ވިދާޅުވި އެވެ.
"އަޅުގަނޑުމެން މިތިބީ ސަރުކާރުގެ ހިއްސާ ދޫކޮށްލަން ތައްޔާރަށް. އެކަން މިހާރު ފާސްކޮށް ނިންމާ ޝަންގްރިއްލާގެ ވެރީންނަށް މިހާރު ވާނީ އަންގާފައި. އެއްމަސް ދުވަހުގެ ތެރޭގައި އެ ބޭފުޅުން ޑިޒިޝަނެއް ނަގަން ޖެހޭނެ. މިހާރު އެ ބޭފުޅުން އަޅުގަނޑުމެންނަށް މައުލޫމާތު ދީފައިވާ ގޮތުގައި އޮގަސްޓް / ސެޕްޓެންބަރުގައި އިރާދަކުރެއްވިއްޔާ ހުޅުވޭވަރަށް މަސައްކަތް ކުރާނެ ކަމަށްވެސް އޮތީ އަންގާފާއި"
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު
ޝަންގްރިއްލާއަކީ އައްޑު އަތޮޅުގެ ގިނަ އަދަދެއްގެ ބަޔަކު ވަޒީފާ އަދާކުރަމުން ދިޔަ ރިސޯޓެކެވެ. ކޯވިޑާއި ގުޅިގެން އެ ރިސޯޓު ބަންދުކޮށްފައި އޮންނަތާ 3 އަހަރު ވެއްޖެ އެވެ. ރިސޯޓު އަނބުރާ ހުޅުވުމަށްޓަކައި ސަރުކާރުގެ ހިއްސާ ދޫކޮށްލަން ނިންމާފައިވާއިރު އެކަމަށްޓަކައި 70 މިލިއަން ޑޮލަރު ސަރުކާރުން ދައްކަން ޖެހޭނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
