ނާކާމިޔާބު ޤަބޫލު ނުކުރެވޭ މީހުން އިންތިޚާބަށް ކުރިމަތިލައިގެން ނުވާނެ: ހުސެއިން ރަޝީދު
ނާކާމިޔާބީ ޤަބޫލުނުކުރެވޭ މީހުން އިންތިޚާބަށް ކުރިމަތިލައިގެން ނުވާނެކަމަށް ޖުމްހޫރީ ޕާޓީގެ ކުރީގެ ޑެޕިއުޓީ ލީޑަރު އަދި ޖޭޕީގެ ސްލޮޓެއްގައި ފިޝަރީސް މިނިސްޓަރުގެ މަޤާމުގައި ހުންނެވި ޑރ ހުސެއިން ރަޝީދު ވިދާޅުވެއްޖެ އެވެ.
ޑރ ހުސެއިން ރަޝީދު މިފަދައިން ވިދާޅުވެފައިވަނީ ޖުމްހޫރީ ޕާޓީގެ 4ވަނަ ޤައުމީ ކޮންފަރެންސް ނިންމުމަށް ބޭއްވި ޖަލްސާގައި ވާހަކަދައްކަވަމުން ނެވެ.
ޑރ ހުސެއިން ރަޝީދު ވިދާޅުވީ އިންތިޚާބަށް ކުރިމަތިލާއިރު، ބަލިވެދާނެކަން ޤަބޫލުކުރަން ޖެހޭ ކަމަށެވެ. އަދި ބަލި ޤަބޫލު ކުރުމަކީ ޑިމޮކްރަސީގެ ރިވެތި އުސޫލުތަކަށް ޑރ ހުސެއިން ވިދާޅުވިއެވެ.
އެމަނިކުފާނު ވިދާޅުވީ އިންތިޚާބަކުން ނާކާމިޔާބުވީމާ އެކަމާއި ދެރަވެ ހިތާމަކޮށް، ބަލި ޤަބޫލު ނުކުރާނެކަމަށް ބުނާ ފަރާތްތައް އިންތިޚާބަށް ކުރިމަތިލައިގެންވެސް ނުވާނެ ކަމަށެވެ.
"އިންތިހާބަކުން ނާކާމިޔާބުވީމާ އެކަމާ ދެރަވާ މީހުން، އިންތިހާބަށް ކުރިމަތިލައިގެން ނުވާނެ. ބަލި ޤަބޫލު ކުރެވެން ޖެހޭނެ. އެހެންވީމާ ޑިމޮކްރެޓިކް އުސޫލުން ކަންކަމާ ކުރިމަތި ލައިގެން ތިމާއަށް ވޯޓުލާ މީހުންގެ ތެރޭގައި އޮތް ތާއިދަކީ ދޭތެރެ ދޭތެރެއިން ޓެސްޓުކޮށްލަން ޖެހޭނެ."
ޑރ ހުސެއިން ރަޝީދު
ޑރ ހުސެއިން ރަޝީދުގެ ވާހަކައިގައި ވަނީ މީގެ ކުރިން ޖުމްހޫރީ ޕާޓީން ވާދަކުރި އިންތިޚާބުތަކުގައި ކުރިމަތިލާން ޖެހުނު ނާކާމިޔާބީތަކުގެ ހަނދާން އާކުރައްވާފަ އެވެ.
އެހެން ނަމަވެސް އިންތިޚާބުން ބަލިވެގެން ޖޭޕީ ފަހަތަށް ޖެހި ޕާޓީގެ މަސައްކަތްތައް ހުއްޓާލާފައި ނުވާކަން ޑރ ހުސެއިން ފާހަގަކުރެއްވި އެވެ. އަދި ވިދާޅުވީ ޖޭޕީން އިންތިޚާބުތަކުގައި ބަލިވެގެން ދިޔަ ނަމަވެސް އަބަދުވެސް އާ ހިތްވަރާއެކު އަނެއްކާވެސް މަސައްކަތް ކުރަމުންދާ ކަމަށެވެ.
ޖޭޕީއަކީ މަސް ނުބޭނުނީމާ ކަނޑު ގޯސްކޮށް ފަހަތަށް ޖެހި ފިލާނެ ޕާޓީއެއް ނޫންކަމަށް ޑރ ހުސެއިން ވިދާޅުވިއެވެ. އަދި ޖޭޕީގެ ތެރޭގައި އަބަދުވެސް އޮންނަނީ ވާދަކޮށް، އިންތިޚާބުތައް ކާމިޔާބު ކުރުމަށް މަސައްކަތް ކުރުމުގެ ރޫހުކަމަށް ވިދާޅުވިއެވެ.
ޑރ ހުސެއިން މި މޭރުމުން ވާހަކަފުޅު ދައްކަވާފައިވާއިރު، ޖުމްހޫރީ ޕާޓީން ވަކި ކެންޑިޑޭޓެއް ނެރެގެން ނުވަތަ ޖުމްހޫރީ ޕާޓީ އިސްވެ އޮވެ ހިންގާ ކޯލިޝަނަކާއެކު ކުރިއަށް އޮތް ރިޔާސީ އިންތިޚާބުގައި ވާދަކުރުމަށް އެ ޕާޓީގެ ޤައުމީ ކޮންފަރެންސްގެ އިއްތިފާގުން ވަނީ ފާސްކޮށްފަ އެވެ. އަދި އެކަމާއި މެދު ރަސްމީކޮށް ގޮތެއް ނިންމުމަށް ޕާޓީގެ ކައުންސިލަށް ހުށައެޅުމަށް ވަނީ ލަފާދެއްވާފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
