ނާއިބު ރައީސް ލައްވާ ރައީސް ކަމުގެ ހުވާ ކުރުވީ، ރައީސް ޞާލިހަށް ލަނޑެއް ދެއްވަން: އިދިކޮޅު

ނާއިބު ރައީސް ފައިސަލް ނަސީމް ލައްވާ ރައީސުލްޖުމްހޫރިއްޔާ ކަމުގެ ހުވާ ކުރުވި މައްސަލަ އަކީ، ސިޔާސީ ގޮތުން ބަލާނަމަ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ސިޔާސީ ގޮތުން ލަނޑެއް ދެއްވުމުގެ ނިޔަތުގައި، ރައްޔިތުންގެ މަޖިލީހުގެ ރައީސް މުހައްމަދު ނަޝީދު ކުރެއްވި ކަމެއް ކަމަށް އިދިކޮޅުން ތުހުމަތު ކޮށްފިއެވެ.

ރައީސް އިބްރާހީމް މުޙައްމަދު ޞާލިޙު ސިންގަޕޫރުގައި ކުރެއްވި ތައިރޮއިޑް އޮޕަރޭޝަނަކަށް އެމަނިކުފާނު ހޭނައްތަންޖެހުމާ ގުޅިގެން ވަގުތީ ގޮތުން ރައީސުލްޖުމްހޫރިއްޔާގެ މަޤާމާ ހަވާލުވެވަޑައިގަތުމަށް ނައިބުރައީސް ފައިސަލް ނަސީމް ހުވައިކުރެއްވުމާ ގުޅިގެން ރައީސުލްޖުމްހޫރިއްޔާގެ މަޤާމުގައި މިހާރު ހުންނެވީ ކޮން ބޭފުޅެއްކަން ކަށަވަރުކުރުމަށް އިދިކޮޅު ޕްރޮގްރެސިވް/ ކޮންގުރެސް ކޯލިޝަނުގެ ފަރާތުން މައްސަލައެއް ދިވެހިރާއްޖޭގެ ސުޕްރީމް ކޯޓަށް މިއަދު ވަނީ ހުށަހަޅައިފަ އެވެ.

އެ މައްސަލަ ސުޕްރީމް ކޯޓަށް ހުށަހެޅުއްވުމަށްފަހު ނޫސްވެރިންނާ ވާހަކަދައްކަވަމުން އިދިކޮޅުގެ ޕާލަމެންޓްރީ ގްރޫޕްގެ ލީޑަރު، އަދި މަޑުއްވަރި ދާއިރާގެ މެންބަރު އާދަމް ޝަރީފް ޢުމަރު ވިދާޅުވީ، އެ މައްސަލަ އަކީ، ކުޑަ މައްސަލައެއް ނޫން ކަމަށާ، އޭގެ ސަބަބުން ވަރަށް ބައިވަރު، ގާނޫނީ މައްސަލަތަކެއް ކުރިމަތިވެގެންދާނެ ކަމަށެވެ.

އެހެނީ، ނާއިބު ރައީސްގެ ހުވާގައި، ރައީސުލްޖުމްހޫރިއްޔާ އަށް އެހީވުމަށް އޮންނައިރު، އެފަދަ ހުވާއެއް ކުރުމަށްފަހު، އަލުން ރައީސުލްޖުމްހޫރިއްޔާގެ ހުވާ އެމަނިކުފާނު ކުރައްވާފައިވާ ކަމަށާ، އޭގެ ފަހުން ރައީސް ޞާލިހު އަލުން ރައީސުލްޖުމްހޫރިއްޔާ ކަމުގެ ހުވާ ކޮށްފައިވާކަން ވެސް އެނގިފައި ނުވާ ކަން ޝަރީފް ފާހަގަކުރެއްވިއެވެ. އަދި އޭގެ ފަހުން ނާއިބު ރައީސް ޢަމަލު ކުރެއްވި ގޮތެއްވެސް ދާފު ނުވާއިރު، އެއީ ގާނޫނީ، ދުސްތޫރީ ވަރަށް ބޮޑު މައްސަލައެއް ކަމުގައި ދެކެވޭ ކަމަށްވެސް ވިދާޅުވި އެވެ.

ޝަރީފް އިތުރަށް ވިދާޅުވީ، މިއީ ރާއްޖޭގެ ގާނޫނު ހެދުމުގެ ބާރު އޮންނަ ފަރާތެއް ކަމަށްވާ، ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި، އަދި ރާއްޖޭގެ އެންމެ މަތީ ކޯޓުގެ، އުއްތަމަ ފަނޑިޔާރާއި، ނާއިބު ރައީސް އަށްވެސް އޮޅިގެން ހިނގާފައިވާ ކަމެއް ނޫން ކަމަށެވެ. އަދި މިކަމަކީ، ސިޔާސީ ގޮތުން ބަލާ ނަމަ، ރައީސް ޞާލިހަށް ސިޔާސީ ލަނޑެއް ދެއްވުމުގެ ނިޔަތުގައި ރައީސް ނަޝީދު ކުރެއްވި ކަމެއް ކަމަށްވެސް ޝަރީފް ތުހުމަތު ކުރެއްވިއެވެ.

ދެން މި ކަމަކީ، ސިޔާސީ ގޮތުން ބަލާނަމަ، ސީދާ އިބްރާހީމް މުހައްމަދު ޞާލިހަށް ސިޔާސީ ގޮތުން ލަނޑެއް ދިނުމުގެ ނިޔަތުގައި، ރައްޔިތުންގެ މަޖިލީހުގެ ރައީސް ކުރައްވާފައި އޮތް ކަމެއް ކަމުގައި އަޅުގަނޑުމެން ދެކެނީ.

ޕީޕީއެމްގެ ޕާލިމެންޓްރީ ގްރޫޕްގެ ލީޑަރު އާދަމް ޝަރީފު އުމަރު

ޝަރީފް ވިދާޅުވީ، ނާއިބު ރައީސް ފައިސަލް ނަސީމް، ރައީސް ކަމުގެ ހުވާ ކުރެއްވުމަށްފަހު ދެން ޢަމަލު ކުރެއްވި ގޮތަކީ، ދައުލަތުގެ ކަމާބެހޭ މުއައްސަސާތަކުން ދިރާސާ ކުރަންޖެހޭ ކަމެއް ކަމަށާ، އަދި ޕީޕީއެމްގެ ރައީސް، އަދި ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް ގެ ވެރިކަމުގައި އެ މައްސަލަ ބައްލަވާނެ ކަމަށެވެ.