ރާއްޖޭގެ 80% ދީނީ އިލްމުވެރިން އަދާލަތުގެ ނިންމުމާއި ދެކޮޅު: ޝަފީއު

ރާއްޖޭގެ 80 އިންސައްތަ ދީނީ އިލްމުވެރިން އެމްޑީޕީއާއެކު އަދާލަތު ޕާޓީން ކޯލިޝަން ހަދަން ނިންމި ނިންމުމާއި ދެކޮޅުކަމަށް ޝެއިޚް ޝަފީއު އަބްދުالله ވިދާޅުވެއްޖެ އެވެ.

ޝަފީއު މިފަދައިން ވިދާޅުވެފައިވަނީ އަދާލަތުގެ ނިންމުމަށް ސަލަފު ޖަމުއިއްޔާގެ އިލްމުވެރިން ފާޑުވިދާޅުވިޔަސް، އެކަމާއި ގުޅިގެން ރައްދު ނުދޭނެކަމަށް އަދާލަތު ޕާޓީގެ ރައީސް އަދި މި ސަރުކާރުގެ ހޯމް މިނިސްޓަރު އިމްރާނު އަބްދުالله ވިދާޅުވުމާއި ގުޅިގެން ކުރެއްވި ޓްވީޓެއްގަ އެވެ.

އިމްރާނު ވިދާޅުވީ އަދާލަތުގެ ނިންމުމަށް ސަލަފުން ކިތަންމެ ވަރަށް އެއްޗެހި ކިފާ، ފާޑުކިޔުން އަމާޒުކުރި ނަމަވެސް، ރައްދު ޖަވާބު ނުދިނުމަށް އަލާދަތު ޕާޓީިން ނިންމާފައިވާކަމަ ށެވެ.

"އަޅުގަނޑުމެން އަދާލަތުގެ އިލްމުވެރިން މިތިބީ ސަލަފު ޖަމުއިއްޔާގެ އިސް ބޭފުޅުން އަޅުގަނޑުމެންނާއި ދިމާލަށް ކިތަންމެ އެއްޗެތި ކިޔަސް، އަޅުގަނޑުމެން އެބޭފުޅުންނާއި ދިމާލަށް އެއްޗިހި ކިޔާ ރައްދު ނުދިނުމަށެވެ. އެ ހަމަ އަޅުގަނޑުމެން ހިފަހައްޓާތާ އަހަރުތަކެއް ވެއްޖެއެވެ"

އަދާލަތު ޕާޓީގެ ރައީސް އިމްރާނު އަބްދުالله

އިމްރާނުގެ އެ ވާހަކަތަކާއި ގުޅިގެން ޝަފީއު ވިދާޅުވީ ރާއްޖޭގައި ދީނީ އިލްމުވެރިން ތިބީ ހަމައެކަނި އަދާލަތާއި ސަލަފު ޖަމުއިއްޔާގައި އެކަނި ނޫން ކަމަށެވެ. ވަކި ސިޔާސީ ޕާޓީއަކަށް ނިސްބަތް ނުވާވެސް އެތައް ދީނީ އިލްމުވެރިން ރާއްޖޭގައި ތިއްބެވިކަމަށް ޝަފީއު ވިދާޅުވިއެވެ.

އެއާއެކު އެބޭފުޅާ ވިދާޅުވީ ރާއްޖޭގައި ތިބި ދީނީ އިލްމުވެރިންގެ ތެރެއިން 80% އިލްމުވެރިން އަދާލަތުގެ ނިންމުމާއި ދެކޮޅު ކަމަށާއި، އެއީ އެކަމަށްޓަކައި ނެގި ޕޯލްގެ ނަތީޖާއިން ދައްކާފައިވާ ގޮތް ކަމަށެވެ.

"ރާއްޖޭގައި ތިބީ ހަމައެކަނި ޢަދާލަތު ޕާޓީއާއި ސަލަފް ޖަމްޢިއްޔާގެ ޢިލްމުވެރިންނެއް ނޫނެވެ. އެއީ ނިސްބަތުން މަދު ޢިލްމުވެރީންކޮޅެކެވެ. އެއަށް ވުރެ ގިނަ ޢިލްމުވެރީން ރާއްޖޭގައި އެބަ ތިއްބެވެ. ރާއްޖޭގެ ޢިލްމުވެރީންގެ 80% ބޭފުޅުން ޢަދާލަތުގެ ނިންމުމާ ދެކޮޅެވެ. މިއީ ޕޯލްގެ ނަތީޖާއެވެ"

ޝެއިޚް ޝަފީއު އަބްދުالله

ކުރިއަށް އޮތް ރިޔާސީ އިންތިޚާބުގައި އަދާލަތު ޕާޓީން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ފަހަތްޕުޅަށް އަރާވަޑައިގަންނަވަން ނިންމެވީ، އެ ޕާޓީގެ އާންމު މެމްބަރުންގެ ރުހުން ހޯދައިގެން ނޫންކަމަށް ސޯޝަލް މީޑިއާގައި ޚިޔާލު ފާޅުކުރި ބައެއް މެމްބަރުން ވަނީ ބުނެފައެވެ.

އެހެން ނަމަވެސް، އަދާލަތުން ބުނީ، އެ ޕާޓީން އެ ނިންމުން ނިންމީ ވަރަށް ގިނަ ހިސާބުތައް ޖަހާފައި ކަމަށާއި، ރައީސް ޞާލިހަށް ދެވަނަ ދައުރެއް ހޯދުމަކީ މި ހާލަތުގައި އެންމެ ފައިދާހުރި ގޮތް ކަމަށް އަދާލަތު ޕާޓީން ޤަބޫލުކުރާ ކަމަށެވެ.