އިރާން އާއި ސަޢުދީގެ އިސްވެރިން ވަރަށް އަވަހަށް މަޝްވަރާކުރާނެ ކަމަށް ބުނެފި

ހީނަރުވެފައި އޮތް އިރާން އާއި ސަޢޫދީޢަރަބިއްޔާގެ ގުޅުން އަލުން ޤާއިމް ކުރުމަށްފަހު ދެ ޤައުމުގެ މެދުގައި ބޭއްވޭ މަޝްވަރާ ކުރުންތައް ރަމަޟާން މަސް ނިމުމުގެ ކުރިން ބާއްވާނެ ކަމަށް ދެޤައުމުން އިއްލާނުކޮށްފިއެވެ.

މިގޮތައް ނިންމާފައިވަނީ ސަޢުދީޢަރަބިއްޔާގެ ފޮރިންގ މިނިސްޓަރު ޕްރިންސް ފައިސަލް ބިން ފަރްހާން އާއި އިރާންގެ ހޮސެއިން އާމިރް ޢަބްދޮލާހިއާން އާއި ފޯނުން ގުޅުއްވައި ދެއްކެވި ވާހަކައިންނެވެ.

ސަޢުދީ ޕްރެސް އެޖެންސީ އިން ބުނެފައިވަނީ ފޯނުން ގުޅައިގެން ދެކެވުނު ވާހަކައިގެ ތެރޭގައި، ޗައިނާ ހިމެނޭހެން ސޮއިކުރެވުނު ތްރީޕާޓީ އެގްރީމެންޓްގައި ވާގޮތުގެ މަތިން ގިނަ ކަންކަމަކާއި ދެ ޤައުމުން މަޝްވަރާ ކޮށްފައިވާކަމަށެވެ. އަދި ދެޤައުމުގެ މިނިސްޓަރުން ރަމަޟާން މަސް ނިމުމުގެ ކުރިން ބައްދަލުވެ މަޝްވަރާކުރުމަށް އެއްބަސްވެފައި ވާކަމަށެވެ.

ނަމަވެސް ބައްދަލުވުން ބައްވާނެ ވަކި ތާރީޚަކާއި ވަކި ތަނެއް އަދި އިޢްލާނުކޮށްފައެއް ނުވެއެވެ.

ސަޢުދީގެ އޮފިޝަލުން ހާމަކޮށްފައިވާ ގޮތުގައި ދެން ބޭއްވޭ ބައްދަލުވުމެއްގައި ފާއިތުވި ހަތް އަހަރުތެރޭގައި ދެޤައުމުގެ ދެމެދުގައި ހީނަރުވެފައިވާ ގުޅުންތަކާއި މެދު މަޝްވަރާ ކުރެވޭނެއެވެ.

ސަޢުދީޢަރަބިއްޔާ އާއި އިރާން އާއި ދެމެދު އޮތް ގުޅުން ކެނޑިގެން ދިޔައީ އިރާން ގައި ހުންނަ ސަޢޫދީގެ ޑިޕްލޮމެޓިކް މިޝަން އަށް އިރާންގެ ޝީޢާ މުސްލިމުން ކުރި އިހްތިޖާޖެއްގެ ތެރޭގައި ހަމަލާތަކެއް ދިނުމާއި ގުޅިގެނެވެ.

ޗައިނާ މެދުވެރިވެގެން ކުރެވެމުންދާ ސަޢޫދީއާއި އިރާންގެ ގުޅުން އަލުން ބަދަހު ކުރުމުގެ މިމަސައްކަތުގެ މިހާރުގެ އަމާޒަކީ ޝީޢާ މުސްލިމުންގެ އާބާދީ ބޮޑު އިރާން އާއި ސުންނީ މުސްލިމުން ގިނަ ސަޢުދީގެ ގުޅުން އަލުން އާލާކޮށް ބަދަހި ކުރުވޭތޯ ބެލުމެވެ.

އިރާންގެ ސަރުކާރުގެ އޮފިޝަލަކު ހާމަކޮށްފައިވާ ގޮތުން އިރާންގެ ރައީސް އިބްރާހިމް ރައީސީ އަށް ސީދާ ސަޢޫދީއަށް އައުމުގެ ދައުވަތެއް ސަޢުދީގެ ސަރުކާރުން ފޮނުވައިފައިވެއެވެ. ނަމަވެސް ސަޢުދީ ސަރުކާރުން މިކަން ރަސްމީކޮށް ހާމަކޮށްފައެއް ނުވެއެވެ.