ރައްޔިތުންނަށް "އުޖާލާ ޒަމާނެއް" ހޯދައިދޭނީ އަޅުގަނޑު: ނާޒިމް
އެމްއެންޕީގެ ކެންޑިޑޭޓު މަޖިލީހުގެ ދަނގެތީ ދާއިރާގެ މެމްބަރު މުޙައްމަދު ނާޒިމުގެ ވެރިކަމުގައި ރާއްޖޭގެ ރައްޔިތުންނަށް "އުޖާލާ ޒަމާނެއް" ހޯއްދަވާ ދެއްވާނެކަމަށް އެމަނިކުފާނު ވިދާޅުވެއްޖެ އެވެ.
ނާޒިމު މިފަދައިން ވިދާޅުވެފައިވަނީ އެމް.އެން.ޕީގެ ރިޔާސީ ޓިކެޓު ހަވާލުކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން ނެވެ.
ނާޒިމު ވިދާޅުވީ ސިޔާސީ މައިދާނުގައި ހަގު ލީޑަރަކަށް ވީ ނަމަވެސް، ވާދަކުރަން ތިބި އެހެން ސިޔާސީ ޕާޓީތަކުގެ މައްޗަށް ކުރި ހޯދާނެ ގޮތް އެނގިވަޑައިގަންނަވާ ކަމަށެވެ.
އެގޮތުން ސިޔާސީ ޕާޓީތައް އުފައްދައިގެން މިވީ 15 އަހަރު ރާއްޖެއަށް ދިމާވެފައިވާ މައްސަލަތަކަށް ލިބުނު މާބޮޑު ކުރިއެރުމެއް ނެތް ކަމަށާއި، އެމަނިކުފާނު މަސައްކަތްޕުޅު ކުރައްވާނީ ޤައުމީ ފިކުރު އިސްކުރައްވައިގެން ކަމަށެވެ.
ޤައުމީ ފިކުރު އިސްކޮށްގެން ކުރާ މަސައްކަތުގެ ތެރެއިން ރައްޔިތުންގެ ދިރިއުޅުން މިހާރަށްވުރެ އެތައް ގުނައެއް ކުރިއަށް ޖައްސާ ދިވެހިރާއްޖެއަކީ ރައްޔިތުން ފަޚުރުވެރިވާ ޤައުމަކަށް ހެދިދާނެކަމުގެ ޔަގީންކަން އޮތްކަމަށް ނާޒިމު ވިދާޅުވި އެވެ.
"ދުނިޔޭގެ އެންމެ ފުރަތަމަ ލަގްޒަރީ އެއާލައިނަކީ ރާއްޖޭގެ އެއާލައިން. އެހެނަސް ރާއްޖޭގެ ގައުމީ އެއާލައިން މިދަނީ ބަނޑުގޫޓުވުމުގެ މަގުމަތީގައި. ރާއްޖޭގެ ރެއަކަށް 1 ލައްކަ ޑޮލަރު ނުވަތަ 1.5 މިލިއަން ރުފިޔާ ލިބޭ ކޮޓަރި ވިއްކާ ރިސޯޓުތައް އެބަހުރި. އެހެން ނަމަވެސް ދިވެހި ދަރިން ނިދަނީ އާއިލާ އާއި އެކީ އެއްކޮޓަރީގައި. މަހަކު އެއްލައްކަ ރުފިޔާއަށްވުރެ މަތިން މުސާރަ ލިބޭ މެނޭޖަރުން އެބަތިއްބޭ. އެހެންނަސް ރާއްޖޭގެ ފުރަތަމަ ޑިގްރީ ހަދައިގެން އަންނަ ކުއްޖާއަށް މި ލެބެނީ 8000 ރުފިޔާ. ކުލި ދައްކާފަ، ސުކޫލަށް ޚަރަދުކޮށްފަ ބާކީ އެއްޗެއް އޮންނަނީ މަދުފަހަރަކު"
އެންއެންޕީގެ ކެންޑިޑޭޓު ނާޒިމް
ނާޒިމް ވިދާޅުވީ ހާލަތު ބަދަލުކުރެވޭނީ ރައްޔިތުން ބޭނުންވެގެން ހާލަތު ބަދަލުކުރުމުގެ މަސައްކަތް ކޮށްގެން ކަމަށެވެ.
އޭނާއަށް ވުރެ ވަކި އިތުރަށް ޤައުމުދެކެ ލޯބިވާ އެއްވެސް ލީޑަރެއް ނުހުންނާނެ ކަމަށާއި، ރިޔާސީ އިންތިޚާބަށް ނިކުތީ ތަސައްވަރެއް އޮވެގެން ހާލަތު ބަދަލުކުރުމަށްކަމަށް ނާޒިމް ވިދާޅުވި އެވެ.
އެގޮތުން ރައްޔިތުންގެ ދިރިއުޅުން ފާގަތިކޮށް ނެތެމުންދާ ގައުމިއްޔަތު ކޮޅަށް ޖެހުމަކީ އޭނާ އެންމެ އިސްކަން ދެއްވާނެ މަސައްކަތްތަކުގެ ގޮތުގައި ނާޒިމްގެ ވާހަކައިގައި ފާހަގަކުރެއްވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
