އެމްޑީޕީއަށް ބާރުލިބޭ ކޮންމެ ފަހަރަކު ރައްޔިތުންނަށް ހިތުން ނުފިލާ ވަރުގެ ލަގާއެއް ދޭ: ސައީދު

މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އަށް ބާރެއް ލިބޭ ކޮންމެ ފަހަރަކު ރައްޔިތުންނަށް ހިތުން ނުފިލާވަރުގެ ލަގާއެއް ދޭކަމަށް ކުރީގެ އިކޮނޮމިކް މިނިސްޓަރު އަދި މަޖިލީހުގެ މާވަށު ދާއިރާގެ މެމްބަރު މުޙައްމަދު ސައީދު ވިދާޅުވެއްޖެ އެވެ.

ސައީދު މިފަދައިން ވިދާޅުވެފައިވަނީ ބިއޮންޑް ނަމަކަށް ކިޔާ އެއާލައިނަކަށް ރާއްޖޭގެ ޤައުމީ ކެރިއާގެ ދަރަޖަ ދީފިކަމަށް އެ އެއާލައިންގެ ސީއީއޯ ޓެރޯ ޓަސްކިލާ ހާމަކުރެއްވުމާއި ގުޅިގެން ނުރުހުން ފާޅުކުރައްވާ ކުރެއްވި ޓްވީޓެއްގަ އެވެ.

ވިޔަފާރީގެ ދާއިރާގެ ޕްރޮގުރާމުތައް ގެނެސްދިނުމަށް މަޝްހޫރު ރިޗާޑް ކުއެސްޓުގެ "ދަ ކުއެސްޓް މީންސް ބިޒްނަސް" ޕްރޮގުރާމުގައި ވާހަކަދައްކަމުން ޓަސްކިލާ ވިދާޅުވީ ރާއްޖޭގެ ޤައުމީ ކެރިއާގެ ދަރަޖަ ލިބުމުން، ރާއްޖެއަށް ފުލައިޓު އޮޕަރޭޓުކުރުމުގައި ޚާއްޞަ އިމްތިޔާޒުތަކަކާއި ޙައްޤުތަކެއް އެ އެއާލައިނަށް ލިބޭނެ ކަމަށެވެ.

އެ އެއާލައިނުގެ ވެބްސައިޓުގައި ބުނެފައިވާ ގޮތުގައި އެ އެއާލައިނަކީ ރާއްޖެއަށް ދަތުރުކުރާ ފަތުރުވެރިންނަށް ލަގްޒަރީ އެއާލައިން ޚިދުމަތް ދިނުމަށް އުފައްދާފައިވާ ކުންފުންޏެކެވެ. އަދި ޤައުމީ ކެރިއާގެ ދަރަޖަ އެ އެއާލައިނަށް ލިބުމާއެކު، ބައިނަލްއަޤުވާމި ފުލައިޓުތައް ދަތުރުކުރަން ސަރުކާރުގެ ފަރާތުން އެހެން އެއާލައިންތަކަށް ނުލިބޭ އިމްތިޔާޒުތަކެއް ލިބޭނެެވެ.

އެކަމަށް އަލިއަޅުވާލައްވާ ސައީދު ވިދާޅުވީ އެމްޑީޕީގެ ފުރަތަމަ ވެރިކަމުގައި މެގަމޯލްޑިވްސްގެ ނަމުގައި އުފެއްދި ކުންފުންޏަކަށް ނޭޝަަނަލް ކެރިއާ ސްޓޭޓަސް ދީފައިވާ ކަމަށެވެ.

އޭގެ ސަބަބުން ޤައުމީ އެއާލައިންގެ ކުރިއެރުމަށް ބޮޑެތި ހުރަސްތަކެއް އެޅިގެން ދިޔަކަން ސައީދު ފާހަގަކުރެއްވި އެވެ.

އަނެއްކާ މިފަހަރުވެސް އެމްޑީޕީ ވެރިކަމަށް އައިސް ބޮއިންޑު ނަމަކަށް ކުރާ ކުންފުންޏަކަށް ރާއްޖޭގެ ޤައުމީ ކެރިއާގެ ދަރަޖަ ދީފައިވާއިރު، މިފަދައިން ހަދާ އެއްބަސްވުންތައް ސިއްރުކުރަމުންދާ ދިއުމަކީ އިންތިހާއަށް ކަންބޮޑުވާ ކަމެއްކަމަށް ސައީދު ވިދާޅުވި އެވެ.

"ބާރެއްހަމައަތުޖެހޭ ކޮއްމެފަހަރަކު ޤައުމުގެހަރުމުދަލާއި މާމަގެ ފައްޓަރުބައިވިއްކާފަ އަދި ނުވިތާކަށް ރައްޔިތުންހިތުންނުފިލާވަރުގެ ލަގާއެއްނުދީ މިމީހުން މައިތިރިނުވާނެ"

ކުރީގެ އިކޮނޮމިކް މިނިސްޓަރު މުޙައްމަދު ސައީދު

ސައީދު ވިދާޅުވީ އެމްޑީޕީގެ ފުރަތަމަ ވެރިކަމުގައި މެގަ މޯލްޑިވްސްއަށް ދިން ސްޓޭޓަސް އަނބުރާ ގެނައީ ރައީސް އަބްދުﷲ ޔާމީން އަބްދުލްގައްޔޫމު ވަރަށް ބުރަ މަސައްކަތް ކުރައްވައިގެން ކަމަށެވެ.

އަނެއްކާ އެމްޑީޕީގެ ދެވަނަ ވެރިކަމުގައި ހަމަ އެފަދަ ޖަރީމާތައް ހިންގަމުންދާއިރު، މިއީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ދެވަނަ ދައުރެއް ދޭން ހެޔޮނުވާ ސަބަބުތައްކަމަށް ސައީދު ވިދާޅުވި އެވެ.