ހިލޭ ބެހި ގޯތިތަކުގަ ގެސްޓްހައުސް އަޅަން މަނަލެއް ނޫން: އަސްލަމް

މާލޭ ރައްޔިތުންނަށް ގޯތި ދިނުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ވައުދުފުޅުގެ ދަށުން ގޯތި ލިބުނު މީހުންގެ ލިސްޓު އާންމުކޮށްފައި ވާއިރު، އެތަނުގައިި ގެސްޓްހައުސް އަޅަން މަނާ ނުކުރާ ކަމަށް ޕްލޭނިންގް މިނިސްޓަރު މުހައްމަދު އަސްލަމް ވިދާޅުވެއްޖެއެވެ.

ހިލޭ ގޯތި ދިނުމާ ބެހޭގޮތުން އިއްޔެ ރައީސް އޮފީހުގައި ކުރިއަށް ގެންދިޔަ ނޫސްވެރިންގެ ބައްދަލުވުމުގައި "ވޮއިސް" އިން ކުރި ސުވާލަށް ޖަވާބު ދެއްވަމުން އަސްލަމް ވިދާޅުވީ ބިން ދޫކުރަނީ ދިރިއުޅެން ކަމަށެވެ. ނަމަވެސް ރާއްޖޭގެ އެއްވެސް ތަނެއްގައި އެގޮތަށް ދޫކުރާ ބިމެއްގައި ވިޔަފާރި ކުރުން މަނާ ނޫން ކަމަށް އަސްލަމް ވިދާޅުވިއެވެ.

"ބަންޑާރަ ބިން ދެނީ އަބަދުވެސް ދިރިއުޅެން. އެހެންނަމަވެސް ރާއްޖޭގެ އެއްވެސް ތަނެއްގަ އަދި މަނަލެއް ނުއެއް ކުރޭ ބަންޑާރައިން ދީފަ އޮތް ބިމެއްގަ ވިޔަފާރިއެއް ކުރާކަށެއް. އެއީ ރާއްޖޭގަ ޕްރެކްޓިސް ކުރަމުން އައި ގޮތެއް ނޫން . އެހެންވީމަ ދިރިއުޅުމުން އަދި އެހެން ކަންކަން ކުރެވިދާނެ. އެކަން ދެމިއޮތީވެސް އެގޮތަށް" އަސްލަމް ވިދާޅުވިއެވެ.

އަސްލަމް ވިދާޅުވީ ބިން ދޫކުރަނީ އެތަނުގައި ދިރި ނޫޅި ހޮޓާ އަޅަން ނޫން ކަމަށެވެ. ނަމަވެސް އެތަނުގައި ދިރިއުޅެމުން ނަފާ ހޯދިދާނެ ކަމަށް އަސްލަމް ވިދާޅުވިއެވެ.

ބިންވެރިޔާ ސްކީމްގެ ދަށުން ގޯއްޗަށް ހުށައެޅި މީހުންގެ ތެރެއިން 19،857 މީހުން ގޯއްޗަށް ޝަރުތު ހަމަވާކަމަށް އަސްލަމް  ވިދާޅުވިއެވެ.

އެގޮތުން އަސްލަމް ވިދާޅުވީ ބިންވެރިޔާ ސްކީމްގެ ދަށުން ގޯއްޗަށް ހުށައަޅައިފައިވަނީ 15،164 ފޯމު ކަމަށެވެ. އެއީ މުޅި އެކު 23،088 މީހަކު ބައިވެރިވާ ފޯމުތަކެއް ކަމަށެވެ.އޭގެ ތެރެއިން 12،794 ފޯމެއްގެ ޝަރުތު ހަމަވާ ކަމަށާއި އެއީ 19،857 މީހަކު ބައިވެރިވާ ފޯމެއް ކަމަށްވެސް އެމިނިސްޓްރީ އިން ބުނެފައިވެއެވެ.

ބިންވެރިޔާ ސްކީމްގެ ދަށުން ގޯތި ލިބުނު މީހުންގެ ލިސްޓް މިހާރު ވަނީ ގެޒެޓުގައި ޝާއިޢު ކޮށްފައެވެ. އެ ލިސްޓު އަންނަނިވި ލިންކުން ބަލައިލެވޭނެއެވެ.

ލިސްޓު

އަސްލަމް ވިދާޅުވެފައިވަނީ ފުރަތަމަ ދޭނީ މިހާރު އިއުލާނުކޮށްފައިވާ 5،000 ގޯތި ކަމަށާއި މި ސްކީމަށް 15،164 ފޯމް ހުށަހެޅި ކަމަށެވެ. އޭގެ ތެރޭގައި ސިންގަލް އެޕްލިކަންޓް އާއި އެކި މީހުން ގުޅިގެން ޖުމްލަ 23،088 މީހުން ހިމެނޭ ގޮތަށް ފޯމް ހުށަހެޅި ކަމަށް އޭނާ ވިދާޅުވި އެވެ. އޭގެ ތެރެއިން ޝަރުތު ހަމަވީ 12،794 ފޯމް ކަމަށާއި އޭގެ ތެރޭގައި ހިމެނެނީ 19،857 މީހުން ކަމަށް އޭނާ ވިދާޅުވި އެވެ.

މިއަދު ގެޒެޓް ކޮށްފައި އެވަނީ އޭގެ ތެރެއިން 10،314 މީހަކަށް ލިބޭ ގޯއްޗެވެ.

15،000 އެއްހާ ފޯމު ހުށައަޅައިފައިވާއިރު ޝަރުތު ހަމަނުވާ 2،370 ފޯމެއް ވާކަމަށް ޕްލޭނިންގ މިނިސްޓްރީ އިން ބުނެފައިވެއެވެ.