ޠާރިޤް ސަރުކާރަށް: 'މަރަށް ތެޅޭތަން' ނޫން ތަނެއް ނުފެނޭ!
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މި ސަރުކާރު 'މަރަށް ތެޅޭތަން' ނޫން ތަނެއް ނުފެންނަ ކަމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެންބަރު އަހުމަދު ޠާރިގު ވިދާޅުވެއްޖެއެވެ.
މާލޭން ހިލޭ ގޯތި ލިބޭ މީހުންގެ ވަގުތީ ލިސްޓް އިއްޔެ ސަރުކާރުން އާންމު ކޮށްފައިވާއިރު، ދޭނެ ކަމަށް ބުނާ އެ ގޯތި ތަކުގެ ތެރެއިން ގިނަ ގޯތި ދިނުމަށް ހަމަޖެހިފައިވާ ބިންތައް އަދި ނުވެސް ހިއްކާއިރު, އެތަނުން ގޯތި ދިނުމުން ސަރުކާރަށް ފާޑުކިޔަމުންނެވެ. އެހެނީ 'ބިންވެރިޔާ' ސްކީމުގެ ދަށުން ގޯތި ދޫކުރަނީ ހުޅުމާލެ އާއި ގުޅީފަޅު އަދި ގިރާވަރު ފަޅު ހިއްކައިގެން ކަމަށް ސަރުކާރުން ބުނާއިރު، އެތަންތަން ހިއްކުމުގެ މަސައްކަތް ރަނގަޅަށް ނުވެސް ފެށެއެވެ.
އެކަމާއި ގުޅުވައި ޠާރިގު ކުރެއްްވި ޓުވީޓެއްގައި ވިދާޅުވީ، ދިވެހިން ގަމާރު ނޫން ކަމަށެވެ. އަދި ރައީސް ޞާލިހް ދެއްވާ ގޯތި، ހިކިފަސްތަނެއްގައި ނެތް ކަމަށާ، އެ ގޯތިތައް ހުރީ ކަނޑުގައި ކަމަށެވެ.
"ރައީސް ސޯލިހުއެވެ. ދިވެހިން ޤަމާރެއް ނޫނެވެ. ތި އިއުލާން ކުރާ ގޯތިތައް ހުރީ ކަނޑުގައެވެ. ހިކިފަސްތާކު މަނިކުފާނުދޭނެ ގޯއްޗެއް ނެތެވެ. ހަނދު ދިނަސް ވޯޓުދޭނެ މީހަކު ދެނެއްނުވާނެއެވެ. މަރަށް ތެޅޭތަން ނޫންތަނެއް ނުފެނެއެވެ." ޠާރިޤް ވިދާޅުވި އެވެ.
ރައީސް އޮފީހުގައި ބިންވެރިޔާ ސްކީމްގެ ދަށުން ގޯތި ދޭ އުސޫލާއި ގުޅޭ ގޮތުން މައުލޫމާތު ދިނުމަށް ހައުސިންގ މިނިސްޓްރީ އިން ބޭއްވި ނޫސްވެރިންގެ ބައްދަލުވުމުގައި މައުލޫމާތު ދެއްވަމުން، ބިންވެރިޔާ ސްކީމްގެ ދަށުން ގޯއްޗަށް ހުށައެޅި މީހުންގެ ތެރެއިން 19،857 މީހުން ގޯއްޗަށް ޝަރުތު ހަމަވާކަމަށް ހައުސިންގ މިނިސްޓަރ އަސްލަމް ވަނީ ވިދާޅުވެފަ އެވެ. އަދި ޝަރުތު ހަމަވާ އެންމެނަށް ގޯތި ދޭނޭ ކަމަށް ސަރުކާރުން ބުނެފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
