ޙައްޖުވުމަށް މިއަހަރު 2 މިލިއަން މީހުން ޖަމާވެފައިވޭ

މިއަހަރުގެ ޙައްޖު މޫސުމާއި ދިމާކޮށް 2 މިލިއަން މީހުން ޖަމާވެފައިވާކަމަށް ޢަރަބް ނިއުސް އިން ބުނެފިއެވެ.

ކޮވިޑް 19 އާއި ގުޅިގެން ހައްޖަށް މީހުން އެތެރެވާ ޢަދަދު ކޮންޓްރޯލް ކުރުމަށްފަހު މިއަހަރަކީ ޙައްޖުވުމަށް ކުރިއެކޭ އެއްގޮތައް ހުޅުވާލި ފުރަތަމަ އަހަރެވެ.

ޢަރަބް ނިއުސް އިން ބުނެފައިވަނީ ސަޢުދީ ސަރުކާރުން ލަފާ ކޮށްފައިއޮތީ 2 މިލިއަނަށްވުރެ ގިނަ މީހުން ޙައްޖުވުމަށް ޖަމާވާނެ ކަމަށެވެ.

2 މިލިއަން މީހުން ޙައްޖުވުމަށް ޖަމާވެފައި ވާއިރު އޭގެ ތެރެއިން 1.6 މިލިއަން މީހުންނަކީ އެހެން ޤައުމު ތަކުން ދަތުރުކޮށް ޖަމާވެފައިވާ މީހުން ކަމަށް ޢަރަބް ނިއުސް އިން ބުނެފައިވެއެވެ.

ހޯމަ ދުވަހު ސަޢުދީގެ އޮފިޝަލުން ޙައްޖުގެ އެންމެ ފަހުގެ އަދާހަމަތައް ހިއްސާ ކުރަމުން ބުނެފައިވަނީ ޙައްޖުވެރިންގެ ރައްކާތެރިކަމާއި ސިއްޙީ ކަންކަމުގެ ހުރިހާ އިންތިޒާމެއް ހަމަޖެހިފައިވާ ކަމަށެވެ.

ހެލްތް މިނިސްޓްރީގެ ފަރާތުން ވާހަކަ ދެއްކި މުޙައްމަދު އަލް އަބްދުލައިލި ވިދާޅުވީ 6000 އެނދާއި އެކު 32 ހޮސްޕިޓަލެއް ހައްޖުވެރިންނަށް ދިމާވެދާނެ ސިއްޙީ ޙާލަތެއްގައި އެހީތެރިވުމަށް ތައްޔާރަށް އޮތް ކަމަށެވެ.

ޙައްޖުވުމަށް ސަޢުދީ އަށް ދާ މުސްލިމުންނަށް ދޭން ޖެހޭ މެހެމާންދާރީ ފުރިހަމަ ކަމާއި އެކު ދިނުމަށް ސަޢުދީ ސަރުކާރުން ކޮންމެ އަހަރަކުވެސް އެތައް މަސައްކަތްތަކެެއް ކުރެއެވެ.
އަދި އެ ކަންކަން އެއް އަހަރުން އަނެއް އަހަރަށް ރަނގަޅުކުރުމަށް ސަޢުދީ ސަރުކާރުން ވަރަށް ބޮޑު އިސްކަމެއް ދެއެވެ.