މާފަރުން ފެނުނީ "ބޮޑު ބުޅަލެއް" ކަމަށް ނިންމައިފި

ނ.އަތޮޅު މާފަރުން ފެނުނީ "ބޮޑު ބުޅަލެއް" ކަމަށް ނިންމައިފިއެވެ.

މިނިކާވަގެއް ކަމަށް ބެލެވޭ ޖަނަވާރެއް ހިނގައިފައި ދާ މަންޒަރު ފެންނަ ވީޑިއޯއެއް އިއްޔެ ވަނީ ސޯޝަލް މީޑިއާގައި އާއްމުވެފަ އެވެ. އަދި އެ ޖަނަވާރު ފެނިފައިވަނީ އެ ސަރަަހައްދުގައި މަސައްކަތްކުރަން އުޅޭ ބިދޭސީ މަސައްކަތްތެރިންތަކަކަށެވެ. އެ ވީޑިއޯ ވެސް ކޮށްފައިވަނީ އެމީހުން ކަމަށް މާފަރު ކައުންސިލްގެ ރައީސް މުހައްމަދު އަދުނާން 'ވޮއިސް' އަށް މައުލޫމާތު ދެއްވައެވެ.

އެކަމާއި ގުޅިގެން އިއްޔެ އާއި ރޭ ވެސް ސިފައިން ވަނީ މިނިކާވަގު ފެނޭތޯ މަސައްކަތް ކޮށްފައެވެ. ނަމަވެސް އެމަސައްކަތް ކާމިޔާބު ނުވުމުން ސިފައިންގެ އިތުރު ޓީމެއް ހާތިޔާރާއިއެކު މިހާރު އެރަށް ގޮސްފައިވާ ކަމަށް އަދުނާނު ވިދާޅުވިއެވެ. އަދި އެ ޓީމުން އެ ޖަނަވާރު ހޯދަން މަސައްކަތް ކުރަމުންދާއިރު، މިހާތަނަށް އޭތި ފެނިފައިވާ ނުވާ ކަމަށް އަދުނާނު ވިދާޅުވިއެވެ.

އެ ކަމާއި ގުޅިގެން އެރަށު ކައުންސިލުން މިއަދު އެންމެ ފަހުން ނެރުނު ދެންނެވުމުގައި ބުނެފައި ވަނީ، އެމްއެންޑީއެފް އިން ބެލިބެލުމުން މިހާތަަށް އެއާޕޯޓް ސަރަހައްދުން މިނިކާވަގެއް ފަދަ ޖަނަވާރެއް ފެނިފައެއް ނުވެއެވެ.

އަދި ދައުރުވަމުންދާ ވީޑިއޯ އެނެލައިޒް ކުރުމުން ވީޑިއޯއިން ފެންނަނީ ގެއްލުންދެނިވި ޖަނަވާރެއް ކަމަށް ނުބެލެވޭ ކަަމަށް އެފަރާތުން މައުލޫމާތު ދެއްވާފައިވާ ކަމަށްވެސް ބުނެފައި ވެއެވެ.

އެހެންކަމުން އެރަށުން ފެނުނީ "ބުޅަލެއް" ކަމަށް މިހާރު ވަނީ ނިންމާފައެވެ.

މިކަމާއި ގުޅިގެން 'ވޮއިސް' އަށް މައުލޫމާތު ދެއްވަމުން އެމްއެންޑީއެފްގެ މީޑިއާ އޮފިޝަލް ވިދާޅުވީ، މާފަރު އެއަރޕޯރޓުގެ ފެންސުގެ އެތެރެއިން ހޭޅިފަށުން ގޮތްނޭގޭ ޖަނަވާރެއް ފެނުނުކަމުގެ ރިޕޯޓެއް އިއްޔެ ހަވީރު 5 ޖަހާކަންހާއިރު މާފަރު އެއަރޕޯރޓުގައި ތިބޭ ސިފައިންނަށް ލިބިފައިވާ ކަމަށެވެ.

މިގޮތުން މިމަޢުލޫމާތާއިއެކު ލިބިފައިވާ ވީޑިއޯ ކްލިޕުން އެއީ ކޮން އެއްޗެއްކަން ޔަޤީންކުރެވިފައިނުވާތީ، މާފަރުގައި ތިބޭ ސިފައިން މާފަރު އެއަރޕޯރޓާއި ގުޅިގެން އެހޯދުމުގެ މަސައްކަތްކުރަމުން ދިޔަ ކަމަށާ، އިއްޔެއާއި ރޭ ކުރެވުނު މަސައްކަތުން އެއްވެސް އެއްޗެއް ފެނިފައިނުވާ ކަމަށް އޮފިޝަލް ވިދާޅުވި އެވެ.

މިއާއެކު މީޑިއާ އޮފިޝަލް ވިދާޅުވީ، ވީޑިއޯ ކްލިޕުން ފެނުނީ ކޮންއެއްޗެއްކަން ކަށަވަރު ކުރުމަށްޓަކައި މިއަދު އިތުރު ސިފައިން މާފަރަށްގޮސް މާފަރު އެެއަރޕޯރޓްގެ ސަރަހަައްދު އެއްކޮށް ބަލާފައިވާ ކަމަށާ، ނަމަވެސް ބުޅަލެއް ފިޔަވައި އިތުރު ޖަނަވާރެއް ފެނިފައިނުވާ ކަމަށެވެ.

"ބޮޑަށް ލަފާކުރެވެނީ ބުޅަލެއް ހިނގާފައި ފަނިކޮށް ވީޑިއޯ ކުރެވިފައިއިން ދުރުމިނާއި އެންގަލްގެ ގޮތުން އަސްލު ސައިޒަށްވުރެ ބޮޑުކޮށް ފެންނާތީ ހީވާ ހީވުމެއްކަމަށެވެ." މީޑިއާ އޮފިޝަލް ވިދާޅުވި އެވެ.