ގެއްލުނު ކަނޑުގެ ސަރަހައްދުގައި މައުދަންތައް ހުރިކަން ސައިންޓިފިކް ރިސާޗުތަކުން އެބަ އެނގޭ: ޢަލީ ހުސައިން

ދިވެހިރާއްޖޭގެ ކަނޑުގެ ސަރަހައްދުން ގެއްލުނު، 45,000 އަކަ ކިލޯމީޓަރު ސަރަހައްދުގައި އެކި ފާޑުގެ މައުދަންތައް ހުރިކަން ސައިންޓިފިކް ރިސާޗުތަކުން އެނގެން ހުރި ކަމަށް ކެންދޫ ދާއިރާގެ މެންބަރު ޢަލީ ހުސައިން ވިދާޅުވެއްޖެއެވެ.

ރިޔާސީ ކެންޕެއިނަށް ޖޭޕީން އދ އަތޮޅުގެ ރަށްތަކަށް ކުރައްވަމުންދާ ދަތުރުގައި އދ. ދިއްދޫގައި ރައްޔިތުންނާއެކު ބޭއްވި ބައްދަލުވުމުގައި ވާހަކަ ދައްކަވަމުން ޢަލީ ހުސައިން ވިދާޅުވީ، ޖުމްހޫރީ ޕާޓީން ރިޔާސީ އިންތިޚާބުގެ ކެންޕެއިން ތެރެއިން ދައްކަމުންދަނީ ސިޔާސީ ވާހަކަތަކެއް ނޫން ކަމަށާ އެއީ ގައުމީ ވާހަކަ ކަމަށެވެ.

އެގޮތުން، 2018 ވަނަ އަހަރު، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އާއި ވެރިކަން ހަވާލުކުރެއްވިއިރު، ދިވެހި ރާއްޖޭގެ ކަނޑުގެ ސަރަހައްދުގެ ގޮތުގައި ބަލަހަށްޓަމުންއައި ސަރަހައްދުން 200 ނޮޓިކަލް މޭލު މިހާރު ގެއްލުވާލާފައިވާތީ، އެކަމާއި ކަންބޮޑުވުން ފާޅުކޮށް އެވާހަކަ ދައްކަވަމުންދާ ކަމަށް ޢަލީ ވިދާޅުވި އެވެ.

2018 ވަނަ އަހަރު ރައީސުލްޖުމްހޫރިއްޔާ އާއި ވެރިކަން ހަވާލުކުރި އިރު، ރާއްޖޭގެ ދެކުނުން ވެސް އައްޑު އަތޮޅާ، ފޯޅަވައްސާ ދޭތެރޭގައި އޮންނާނެ 200 ނޮޓިކަލް މޭލުގެ ސަރަހައްދެއް. އެއީ އަޅުގަނޑުމެންގެ ސަރަހައްދެއް. އެއީ އަޅުގަނޑުމެންގެ ޚާއްސަ އިގްތިޞާދީ ސަރަހައްދު. އެ ހިސާބުގައި، ބައެއް ފަހަރު ކަންތައްތައް ދިމާވެގެން، ދިވެހި ސިފައިންވެސް އެބަހުރި 199 ނޮޓިކަލް މޭލަށް އެކި ކަންތައް ތަކުގައި ގޮއްސަ. އަދި އަޅުގަނޑުމެން އެމްއެންޑީއެފްގެ ލޮގް ފޮތްތައް ބަލައިފި ނަމަ، އެ މުޅި ސަރަހައްދުގައި ސެކިޔުރިޓީ ބަލަހައްޓާ ފައިވާ ކަން ، ނުވަތަ އެއީ އަޅުގަނޑުމެންގެ ސަރަހައްދުކަން ސާބިތުވާނެ ކިތާބީ ހެކި، މިއަދުވެސް އެމްއެންޑީއެފްގައި ހުންނާނެ.

ޢަލީ ހުސެއިން

ޢަލީ ހުސެއިން ވިދާޅުވީ، ރާއްޖޭގެ ކަނޑުގެ އެ ސަރަހައްދު ގެއްލިގެން ދިޔައީ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ވާނުވާ ނޭނގޭ ހާލުގައި ހުންނަވަނިކޮށް 'ބަޔަކު' ދިއްކޮށްލި ސިޓީ އެއްގައި ސޮއި ކުރައްވައިގެން ކަމަށާ، އެކަން ކޮށްފައިވަނީ ބޭރު ގައުމެއްގެ ނުފޫޒުން ކަމަށެވެ.

"ހަގީގަތުގައި ސިޓީގައި ސޮއި ކުރެވުނުއިރުގައި އެނގިވަޑައިނުގަންނަވާ އެ ސިޓީގައި ސޮއި ކުރެވުނީމާ އޭގެ ނަތީޖާ އަކަށް ވާނީ ކޮން ކަމެއް ކަމެއް. އެކަން އެޓާރނީ ޖެނެރަލް ކިޔުއްވާދެއްވާފައިވާ ކަމަކަށްވެސް އަޅުގަނޑުމެންނަށް ގަބޫލެއް ނުކުރެވޭ."

ޢަލީ ހުސެއިން

ޢަލީ ވިދާޅުވީ، ރައީސް ޞާލިހަށް ނޭނގިހުންނަވައިގެން އެ ސޮއި ކުރެއްވި ސިޓީގެ ސަބަބުން ފޯޅަވައްސާ މާ ދުރުގައި އޮތް ގައުމަކަށް، އެއްވެސް އުސޫލެއް، ގާނޫނީ ހަމައެއް ނެތި، ރާއްޖޭގެ ކަނޑުގެ ސަރަޙައްދުން ބައެއް ދެވިގެން ގޮސްފައިވާ ކަމަށެވެ.

"ދޫކޮށްލީ 45000 އަކަ ކިލޯމީޓަރު ގެ ސަރަހައްދެއް. އެއާއެކީގައި އަޅުގަނޑުމެންނަށް މި އެނގެނީ، ދުނިޔޭގައި، މިހާރު ބޮޑެތި ސަރަހައްދު ތަކުގައި މިހާރު އޮފްޝޯ ޑްރިލިންގ ފެށިއްްޖެކަން. އޮފްޝޯ ޑްރިލިންގ އަކީ، މާކަނޑުގައި ތޮރުފައިގެން، އެތަނުގައި ހުރި މައުދަންތަކަކީ ކޮންޗެއްތޯ ބަލައި، މި އެއްޗެހި ނަގަން ފެށިއްޖެ." ޢަލީ ހުސެއިން ވިދާޅުވި އެވެ.

އެހެންވީމާ، ބައެއް ސައިންޓިފިކް ރިސާރޗް ތަކުން އެބަ ދައްކާ، މި ގެއްލުނު ސަރަހައްދުގައި ވަކި ފާޑުފާޑުގެ މައުދަންތައް އެބަ ހުރިކަން. އެހެންވީމާ، މިއީ ދުނިޔޭގެ ވަކި ގައުމަކުން، އެ ސަރަހައްދުގައި ހުރި މުދާތައް ނޫނީ ވަސީލަތްތައް ބޭނުންވާތީ ކުރެވުނު ކަމެއް ކަން.

ޢަލީ ހުސެއިން

އެހެންކަމުން ދިވެހި ގައުމުން 45,000 އަކަ ކިލޯމީޓަރު ދުއްވާލި ބަޔަކަށް ދެވަނަ ދައުރެއް ދޭން ދިވެހިން ބޭނުންވާނެތޯ ސުވާލު ކުރައްވަމުން ޢަލީ ވަނީ ގައުމު ދެކެ ލޯބިވާ އެއްވެސް ދިވެއްސެއް އެކަން ކުރަން ބޭނުން ނުވާނެ ކަމަށް ވިދާޅުވެފައެވެ.