އިއްތިހާދަކީ ގާނޫނު އަސާސީއާއި ވަރަށް ބީރައްޓެހި ކަމެއް: ރައީސް ނަޝީދު

އިއްތިހާދަކާއެކު ނުވަތަ ގިނަ ސިޔާސީ ޕާޓީތަކުން ކޯލިޝަން ހަދައިގެން ވެރިކަމަށް އައުމަކީ ގާނޫނު އަސާސީއާއި ވަރަށް ބީރައްޓެހިކަމެއްކަމަށް ކޯލިޝަން ސަރުކާރުގެ މައި ޕާޓީ އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ނަޝީދު މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ ތިން ވަަނަ ދައުރުގެ 17 ވަނަ ޖަލްސާގައެވެ.

އެ ޖަލްސާގައި މަޖިލީހަށް ނައިފަރު ދާއިރާގެ މެމްބަރު އަހުމަދު ޝިޔާމު ހުށައެޅުއްވި ކުއްލި މައްސަލައަށް ވާހަކަފުޅު ދައްކަވަމުން ވިދާޅުވީ މަސްވެރިކަމުގެ ސިނާއަތަށް އެހާ ބޮޑަށް އިހުމާލުވަމުން ދަނީ އަދި މަސްވެރިންނަށް ވީ ވައުދުތައް ނުފުއްދެނީ އެމްޑީޕީގެ މެނިފެސްޓޯއެއް ޖުމްހޫރީ ޕާޓީގެ ވަޒީރަކު ތަންފީޒުކުރައްވަމުން ދާތީކަށެވެ.

"މަސްވެރިކަމުގެ މެނިފެސްޓޯ ނުވަތަ މަސްވެރިންނަށްޓަކައި މި ސަރުކާރުން ވެ ވަޑައިގެންނެވި ވައުދު، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވެ ވަޑައިގެންނެވި ވައުދު އިންސައްތައެއް ހާސިލުވެއްޖެތޯ؟ މިއީ ކޮންމެ ދުވަހަކު ވަޒީރަކަށް ހުންނަވާ ބޭފުޅަކަށް އެނގިވަޑައިގެންނަވަން ޖެހޭ އަދަދެއް، ނުވަތަ އިންސައްތައެއް. އެހެން ނަމަވެސް ވަޒީރަކަށް އެނގިވަޑައެއް ނުގަންނަވާ. އަޅުގަނޑު މި ހިތަށް އަރަނީ އަނެއްކާ އެމްޑީޕީގެ މެނިފެސްޓޯ ޖޭޕީގެ ވަޒީރަކަށް ވީމަ ފެނިވަޑައިނުގަންނަވަނީތޯ އޭ"

ނައިފަރު ދާއިރާގެ މެމްބަރު އަހުމަދު ޝިޔާމު

ޝިޔާމު މިފަދައިން ވިދާޅުވުމާއެކު މަޖިލީހުގެ މާމިނގިލީ ދާއިރާގެ މެމްބަރު އަދި ޖުމްހޫރީ ޕާޓީގެ ޕީޖީ ލީޑަރު ގާސިމް އިބުރާހިމް ވަނީ ނިޒާމީ ނުގުތާއެއް ނަންގަވާ، ވަޒީރުންނަކީ ވަކި ސިޔާސީ ޕާޓީއެއް ތަމްސީލުކުރައްވާ ބައެއް ނޫންކަމަށް ރިޔާސަތުގެ ސަމާލުކަމަށް ގެންނަވާފައެވެ.

"އިއްޒަތްތެރި ރައީސް! އަޅުގަނޑު ދެނަހުރީ ދައުލަތުގެ ވަޒީރުންކަމަށް ތިއްބަވަނީ، ޖޭޕީގެ ވަޒީރެއް ނޫނީ އެމްޑީޕީގެ ވަޒީރެއް ހުންނަކަމަކަށް އަޅުގަނޑު ނުދަންނަން"

ޖޭޕީގެ ޕީޖީ ލީޑަރު ގާސިމް އިބުރާހިމް

ގާސިމްގެ ނިޒާމީ ނުގުތާއާއި ގުޅިގެން ނަޝީދު ވަނީ ނިޒާމީ ނުގުތާ ބަލައިގަންނަކަމަށާއި، ވަޒީރުންނާއި މުޚާތަބުކުރައްވާއިރު، ދައުލަތުގެ ވަޒީރުންގެ ގޮތުގައި މުޚާތަބުކުރެއްވުމަށް އެދިވަޑައިގަންނަވާފައެވެ.

އެއާއެކު ނަޝީދު ވިދާޅުވީ އިއްތިހާދަކީ ގާނޫނު އަސާސީއާއި ވަރަށް ބީރައްޓެހި ކަމެއްކަމަށެވެ. އަދި އެއީ ގާނޫނު ދަންނަ އެއްޗެއްވެސް ނޫން ކަމަށެވެ.

"އިއްތިހާދަކީ ގާނޫނު އަސާސީއާއި ވަރަށް ބީރައްޓެހި ކަމެއް. އެއީ ގާނޫނު އަސާސީ ދަންނަކަމެއްވެސް ނޫން. ބަލައިގަންނަ ކަމެއް ނޫން"

މަޖިލީހުގެ ރައީސް މުހައްމަދު ނަޝީދު

ޖުމްހޫރީ ޕާޓީގެ ސްލްޓެއްގައި ފިޝަރީޒް މިނިސްޓަރުކަމުގެ މަގާމުގައި ހުންނެވި ޑރ ހުސެއިން ރަޝީދު މަޖިލީހަށް ހާޒިރުކޮށް މެމްބަރު ވަޒީރާއި ގިނަ ސުވާލުތަކެއް އަމާޒުކުރައްވާފައިވާއިރު، ވަޒީރު އެމްޑީޕީގެ ސިޔާސަތުތަކާއި ގުޅިފައިވާ ސިޔާސީ ޕާާޓީތަކުގެ މެނިފެސްޓޯއަށް އެމްޑީޕީއިން ހުށައެޅި ކަރުދާސް ގަބޫލުކުރައްވަންތޯ އެމްޑީޕީގެ ބައެއް މެމްބަރުން ވަނީ އައްސަވާފައެވެ.

އަދި މަސްވެރިކަމުގެ ސިނާއަތު ކުރިއެރުވުމަށް ވީ ވައުދުތައް ނުފުއްދެނީ އެމްޑީޕީ ނޫން އެހެން ސިޔާސީ ޕާޓީއަކަށް ނިސްބަތްވެ ވަޑައިގަންނަވާ ވަޒީރަކު ހުރުމުންކަމަށް ދޭހަވާ މޭރުމުން ބައެއް މެމްބަރުން ވަނީ ވާހަކަދައްކަވާފައެވެ.

އަނެއްކޮޅުން ގިނަ ސިޔާސީ ޕާޓީތަކާއެކު ކޯލިޝަންއެއްގެ ތެރެއިން އެމްޑީޕީއަށް ވެރިކަން ލިބިފައިވީނަމަވެސް، ކޯލިޝަންއަކީ ތާއީދުކުރައްވާ ކަމެއް ނޫންކަމަށް އެމްޑީޕީގެ ރައީސް މުހައްމަދު ނަޝީދުވެސް ވަނީ އެތައް ފަހަރަކު ވިދާޅުވެފައެވެ.

އެހެން ނަމަވެސް މިހާރު ވެރިކަމުގައި ހުންނެވި އިބްރާހިމް މުހައްމަދު ސޯލިހު ގެންދަވަނީ ކޮންމެ ހާލެއްގައިވެސް ކޯލިޝަން ދެމެހެއްޓެވުމުގެ މަސައްކަތްޕުޅު ކުރައްވަމުންނެވެ. އަދި ކޯލިޝަންގެ ސިޔާސީ ޕާޓީތަކާއެކު އެއްބަސްވެވިފައިވާ ގޮތަށް ކަންކަން ކުރައްވަމުންދާކަމަށް ރައީސް ސޯލިހު ވިދާޅުވެއެވެ.