ބޮޑު ތަކުރުފާނުގެ ޖިހާދު ހަނދާން ކުރާއިރު މިއަދު ލޮލުން ފާއްދާލަނީ ކަރުނަ: ރައީސް ޔާމީން

ދިވެހިރާއްޖޭގެ ގައުމީ ދުވަހުގައި، ބޮޑު ތަކުރުފާނުގެ މަތިވެރި ޖިހާދުގެ ހަނދާންތައް އާކުރަމުންދާއިރު މިއަދު ލޮލުން ފާއްދާލަނީ ފުން އަސަރުގެ ކަރުނަ ކަމަށް އިދިކޮޅު އިއްތިހާދުގެ ރިޔާސީ ކެންޑިޑޭޓް އަދި ކުރީގެ ރައީސް ޔާމީން އަބްދުލްގައްޔޫމް ވިދާޅުވެއްޖެއެވެ.

ގައުމީ ދުވަހުގެ ތަހުނިޔާ އެންމެހައި ދިވެހި ރައްޔިތުންނަށް އަރިސްކުރައްވައި ރައީސް ޔާމީން ކުރެއްވި ޓުވީޓެއްގައި އެމަނިކުފާނު ވަނީ ގައުމީ ދުވަހުގެ ތަހުނިޔާ އަދާކުރައްވަމުން މިދަނީ ބަނަވެ ނާމާން ވަމުންދާ ދުވަސްތަކެއްގެ ހިތްދަތި ކަމާއެކުގައި ކަމަށް ވިދާޅުވެފައެވެ. އަދި މިއަދު ބޮޑު ތަކުރުފާނުގެ މަތިވެރި ޖިހާދުގެ ހަނދާންތައް އާކުރަމުންދާއިރު މިއަދު ލޮލުން ފާއްދާލަނީ ފުން އަސަރުގެ ކަރުނަ ކަމަށްވެސް ޔަމީން ވިދާޅުވިއެވެ.

"ޤައުމީ ދުވަހުގެ ހެޔޮއެދުންތައް ލޮބުވެތި ރައްޔިތުންގެ އަރިހަށް ފޮނުވަމެވެ. ބޮޑުތަކުރުފާނުގެ މަތިވެރި ޖިހާދެވެ. ނަމަވެސް މިއަދުލޮލުން ފާއްދާލަނީ ފުން އަސަރުގެ ކަރުނައެވެ." ރައީސް ޔާމީންގެ ޓުވީޓުގައި ވެއެވެ.

ރައީސް ޔާމީން މިފަދައިން ވިދާޅުވެ ގައުމީ ދުވަހުގެ ތަހުނިޔާ އަދާކުރައްވާފައި ވާއިރު، އެކި ފަހަރު މަތިން އެމަނިކުފާނު އެކި ޕޯޑިއަމްތަކުގަޔާއި، އިންޓަވިއު ތަކުގައި ވާހަކަދައްކަވަމުންވެސް މި މޭރުމުން ވާހަކަ ދައްކަވާފައިވެއެވެ.

އެގޮތުން ދިވެހިރާއްޖެއަކީ މިނިވަން ގައުމެއް ކަމަށް ދުލުން ކިޔާލާ ނަމަވެސް، މިއަދު ދިވެހިރާއްޖެއަކީ އިންޑިއާ ގެ އަޅުވެތި ކަމުގެ ދަށުގައިވާ ގައުމެއް ކަމަށް ވިދާޅުވެ އެމަނިކުފާނު އަންނަނީ ކަންބޮޑުވުން ފާޅުކުރަމުންނެވެ. އޭގެ ސަބަބެއްގެ ގޮތުގައި، އެމަނިކުފާނާއި، އަދި އިދިކޮޅު ކޯލިޝަންގެ މެންބަރުން ދައްކަވަނީ ދިވެހިރާއްޖެއިން އިންޑިއާ އާއި އެކީ ހަދާފައިވާ ގޮތް ނޭނގޭ އެއްބަސްވުންތަކާއި، ޚާއްޞަކޮށް އުތުރު ތިލަފަޅު އެއްބަސްވުމެވެ.

އެފަދަ އެއްބަސްވުންތަކުގެ ސަބަބުންނާއި އިންޑިއާ ސިފައިން ދިވެހިރާއްޖޭގައި ގާއިމްވެ ތިބުމުގެ ސަބަބުން، ދިވެހިރާއްޖޭގެ މިނިވަންކަމާއި އިސްތިގުލާލަށް ބުރޫ އަރާ ކަމަށް ބުނެ އިދިކޮޅުން ވަނީ "އިންޑިއާ އައުޓް" ނަމުގައި ކެންޕެއިނެއް ވެސް ފަށާފައެވެ.