ބޮޑު ކަންނެލީގެ ފްލޯ ޕްރައިސް ކަނޑައެޅުމަށް މަޝްވަރާ ކުރާކަމަށް ބުނެ މިނިސްޓަރު ހެދީ އިތުރުފުޅެއް: ބީ.ކޭ.އެމް.ޔޫ

ބޮޑުކަންނެލީގެ ފްލޯ ޕްރައިސް ކަނޑަނޭޅި އޮތް ސަބަބާއި ގުޅޭގޮތުން ފިޝަރީޒް މިނިސްޓަރު ޑރ. ހުސެއިން ރަޝީދު ހަސަން ހެއްދެވީ އިތުރުފުޅެއްކަމަށް ބޮޑު ކަންނެލީގެ މަސްވެރިންގެ ޔޫނިއަނުން ބުނެފިއެވެ.

ގިނަ ދުވަސްތަކަކަށްފަހު މަސްވެރިކަން ތިޔާގިވެފައިވާއިރު، މަސް ކިރުމަށް މަސްވެރިންނަށް ބޮޑެތި އުނދަގޫތަކެއް ހުރިކަން ފާހަގަކޮށް، ފިޝަރީސް މިނިސްޓަރު ވަނީ އިއްޔެ މަޖިލީހަށް ހާޒިރުކޮށް މެމްބަރުން ގިނަ ސުވާލުތަކެއް ކުރައްވާފައެވެ.

އެގޮތުން މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދު ވަނީ ބޮޑުކަންނެލީގެ ފްލޯ ޕްރައިސް ކަނޑަނޭޅިގެން އުޅެނީ ކީއްވެތޯ އައްސަވާ މިނިސްޓަރާއި ސުވާލުކުރައްވާފައެވެ.

ސައީދުގެ ސުވާލަށް ޖަވާބުދެއްވަމުން މިނިސްޓަރު ވިދާޅުވީ އެކަމާގުޅިގެން ބޮޑު ކަންނެލި ބާނާ މަސްވެރިން ގެ ޖަމުއިއްޔާއާއި ބޮޑު ކަންނެލި ގަންނަ ކުންފުނިތައް ހިމެނޭ މަޝްވަރާ ކުރެވިފައިވާކަމަށެވެ. އަދި އެ ދެފަރާތައް އެމީހުން ހުށައަޅާ އަގުތަކެއް މިނިސްޓްރީއާއި ހިއްސާކުރުމަށް އަންގާފައިވާކަމަށް މިނިސްޓަރު ވިދާޅުވިއެވެ.

އެފަހުން އެ ދެ ފަރާތުން ހުށައަޅާފައިވަނީ ވަރަށް ތަފާތު ދެ އަގެއްކަމަށާއި، އެހެންކަމުން ދެ ފަރާތުން މަޝްވަރާކޮށްގެން މިނިސްޓްރީއަށް އަގެއް ހުށައެޅުމަށް އަންގާފައިވާނެކަމަށާއި، އަދި އެފަހުން އަގެއް ހުށައަޅާފައި ނުވާކަމަށް މިނިސްޓަރު ވިދާޅުވިއެވެ. އަދި އަގު ކަނޑަނާލާ އޮތީ އެ ދެ ފަރާތުން ހުށައަޅާ އަގެއް ބެލުމަށްކަމަށް މިނިސްޓަރު ވިދާޅުވިއެވެ.

އަދި އެފަހުން މަސް ގަތުމުގެ މައްސަލައެއް ދިމާވެފައިވާކަން ފާހަގަ ނުކުރެވޭކަމަށް މިނިސްޓަރު ވިދާޅުވިއެވެ.

"އަޅުގަނޑުމެން ބޮޑު ކަންނެލި ބާނާ މަސްވެރިން ތަމްސީލުކުރާ ޖަމުއިއްޔާއާއި ބޮޑު ކަންނެލި ގަންނަ ކުންފުނިތައް ހިމެނޭ ޖަމުއިއްޔާއާއި މި ވާހަކަ ދައްކަމުންގޮސް، އެންމެ ފަހުން އަޅުގަނޑުމެން ދެންނެވީ ދެ ފަރާތަށް ތިބޭފުޅުން ހުށައަޅުއްވާ އަގުތަކެއް ގެންނާށޭ. އެ ދެފަރާތުން ހުށައެޅުއްވީ ވަރަށް ތަފާތު ދެ އަގެއް މި ފްލޯ ޕްރައިސްއަށް. އޭގެ ފަހުން އަޅުގަނޑުމެން ދަންނަވާފައިވާނެ މި ދެ ޕާޓީއަށް ދެ ޕާޓީއިން މަޝްވަރާކޮށްގެން މީގެ ދެމެދު އަގެއް ގެނެސްދެއްވުން އެދެމޭ. ފަހުން އެކަހަލަ ކަމެއް ނުހިންގާ"

ފިޝަރީޒް މިނިސްޓަރު ޑރ. ހުސެއިން ރަޝީދު

މިނިސްޓަރުގެ މި ވާހަކަތަކާއި ގުޅިގެން ބޮޑު ކަންނެލީގެ މަސްވެރިންގެ ޔޫނިއަނުން ކުރި ޓްވީޓެއްގައި ބުނީ، ފްލޯ ޕްރައިސް ކަނޑައެޅުމަށް ކުރެވުނު މަޝްވަރާތަކާއި ގުޅިގެން މަޖިލީހުގައި މިނިސްޓަރު ހެއްދެވީ އިތުރުފުޅެއްކަމަށެވެ.

ބޮޑު ކަންނެލީގެ އެންމެ ދަށް އަގެއް މަޝްވަރާތައް ކުރިއަށް ގެންގޮސް ވަކި ހިސާބަކުން ހުއްޓާލީކަމަށް އެ ޔޫނިއަކުން ވަނީ ހާމަކޮށްފައެވެ. އަދި އެކަމާއި މަޝްވަރާ ނުކުރާތާ އެތައް ދުވެހއް ވެފައިވާކަންވެސް އެ ޖަމުއިއްޔާއިން ފާހަގަކޮށްފައިވެއެވެ.

ބޮޑު ކަންނެލީގެ މަސްވެރިންގެ ޔޫނިއަނުން ބުނީ ބޮޑު ކަންނެލި ގަންނަ އެންމެ ދަށް އަގުގެ ގޮތުގައި 30 ކިލޯއިން މަތި 100 ރުފިޔާ، އަދި 30 ކިލޯއިން ދަށް 80 ރުފިޔާއަށް ގަތުމަށް ހުށައަޅާފައިވާކަމަށް އެ ޔޫނިއަނުން ވަނީ ފާހަގަކޮށްފައެވެ.

މަސްވެރިކަމުގެ މި މޫސުމާއި ބައްދަލުކުރިއިރު މަސްކިރުމަށް އެކަށީގެންވާ ތައްޔާރީތަކެއް ވެވިފައި ނުވާކަމަށް ފިޝަރީޒް މިނިސްޓަރު ވަނީ މަޖިލީހުގައި އިއުތިރާފުވެފައެވެ. އަދި މަސްކިރުމަށް ހޯދާނެކަމަށް ބުނި ބޯޓު އަދިވެސް ހޯދިފައިނުވާކަން މިނިސްޓަރު ވަނީ ހާމަކުރައްވާފައެވެ.