އަމާޒަކީ ކުރިއަށް އޮތް ފަސް އަހަރުތެރޭ ތިލަދުންމަތީގައި 8،000 އެނދު ޤާއިމުކުރުން: ރައީސް

އަމާޒަކީ ކުރިއަށް އޮތް ފަސް އަހަރުތެރޭގައި ތިލަދުންމަތީގައި ފަތުރުވެރިކަމުގެ 8،000 އެނދު ޤާއިމުކުރުން ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.

ހއ. އުތީމުގައި އަލަށް ޢިމާރާތްކުރި އާ އިންޖީނުގެއާއި، އޮފީސް ޢިމާރާތް ހުޅުވައި ދެއްވި ރަސްމިއްޔާތު ޝަރަފުވެރި ކޮށްދެއްވައި ވާހަކަދައްކަވަމުން ރައީސް ޞާލިހު ވިދާޅުވީ، އާ އިންޖީނުގެ ހުޅުވިގެން ދިޔުމާއެކު އުތީމުގެ ރައްޔިތުން އުފުލަމުން އައި ތަކުލީފުތަކަށް ނިމުމެއް އައީ ކަމަށެވެ. އަދި މި އިންޖީނުގެއާއި އެކު އުތީމުގައި ކަރަންޓަށް 24 އަހަރު ރައްޔިތުން އުފުލަމުންދިޔަ ބުރަ، މިއަދު ނިމުމަކަށް އައިސްފައިވާ ކަމަށްވެސް ވިދާޅުވިއެވެ.

ރައީސް ޞާލިހު ވިދާޅުވީ، ރާއްޖެ ތަރައްޤީ ކުރެވޭނީ އަތޮޅުތަކުގެ ރަށްތައް ތަރައްޤީ ކޮށްގެންކަމަށާ، ކޯވިޑް-19ގެ ޢާލަމީ ބަލިމަޑުކަމާއި، އިޤްތިޞާދީގޮތުން ދުނިޔެއަށް ދިމާވާ އެކި ގޮންޖެހުންތަކާއެކުވެސް ސަރުކާރުން އަތޮޅުތަކުގެ ތަރައްޤީ ހުއްޓާނުލައި ކުރިއަށް ގެންދިއުމަކީ ލިބޭ އެންމެބޮޑު ހިތްހަމަޖެހުންކަމަށެވެ.

މިއާއެކު ބޮޑު ތިލަދުންމައްޗަށް ފަތުރުވެރިކަން ފުޅާކުރުމަށްޓަކައި ހަނިމަދޫ އިންޓަރނޭޝަނަލް އެއާޕޯޓް ތަރައްޤީކޮށް އިޤްތިޞާދީ ބާރުވެރި ސަރަހައްދަކަށް ހެދުމަކީ ރައީސްގެ އަމާޒުކަން ފާހަގަކުރައްވައި ރައީސް ވިދާޅުވީ، އެއާޕޯޓު ތަރައްޤީ ކުރުމާއެކު ކުރިއަށް އޮތް 5 އަހަރުގެ ތެރޭގައި އަށް ހާސް އެދު ބޮޑު ތިލަންދުން މަތީގައި ޤާއިމް ކުރުމަކީ އެމަނިކުފާނުގެ ތަސައްވުރެއް ކަމަށެވެ. އަދި އެއާޕޯޓްގެ މަސައްކަތް ނިމުން ބޮޑުތިލަދުންމަތީގައި ފަތުރުވެރިކަމަށް އިންވެސްޓުކުރަން ބޭނުންވާ ފަރާތްތައް އިތުރު ވެގެންދާނެކަމަށްވެސް އެމަނިކުފާނު ވިދާޅުވިއެވެ.

"އަޅުގަނޑުމެންގެ އަމާޒަކީ ކުރިއަށް އޮތް ހަތަރު ފަސް އަހަރު ތެރޭގައި އެންމެ ލަސްވެގެން 8000 އެނދު ޕްލޭން ކޮށްގެން ރާވައިގެން ކުރިއަށް ގެންދިއުން، އަޅުގަނޑު ހިތުން މި ސަރަހައްދުގައި ޓޫރިޒަމް ޑިވޮލޮޕް ކުރާނެ އިންވެސްޓަރުން ދެން ފަހަތަށް ނުޖެހޭނެ،" ރައީސް ޞާލިޙު ވިދާޅުވިއެވެ.

ރައީސް ފާހަގަކުރެއްވި ގޮތުގައި ތިލަދުންމަތީގެ ފަތުރުވެރިކަން ކުރިއެރުވުމަށް އޮތް އެންމެ ބޮޑު ހުރަހަކީ އެ ސަރަހައްދުގައި ރަނގަޅު ފެންވަރުގެ އެއާޕޯޓެއް ނެތުން ކަމަށެވެ. ވުމާއެކު މިދައުރު ނިމުމުގެ ކުރިން ހަނިމާދޫ އެއާޕޯޓް ނިންމާލުމަކީ އެމަނިކުފާނުގެ ޢަޒުމެއް ކަމަށް މީގެ ކުރިން ސަރުކާރުން ވަނީ ވިދާޅުވެފައެވެ.