ޝިޔާމް ޢިމްރާނަށް: ކަރުދާސްތަކެއް ހިއްޕަވައިގެން މޭޑޭގައިވެސް ގޮވި މިހުރީ ހެތްކޭ

ހޯމް މިނިސްޓަރ އަދި އަދާލަތުޕާޓީގެ ރައީސް ޢިމްރާން، ކަރުދާސްތަކެއް ހިއްޕަވައިގެން މޭޑޭގައިވެސް މިހުރީ ހެތްކޭ ގޮވި ކަމަށް ވިދާޅުވެ ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަހުމަދު ޝިޔާމް އިމްރާނަށް ފާޑުވިދާޅުވެއްޖެއެވެ.

ފޯޅަވަހީގެ މައްސަލާގައި ރައީސް ހައްދަވަނީ ތެދުކަމަށް ހެކިވެވަޑައިގަންނަވާ ކަމަށް ޢިމްރާން ވިދާޅުވުމާއި ގުޅިގެން ޝިޔާމް ކުރެއްވި ޓުވީޓެއްގައި ވިދާޅުވީ، ކޮނޑުހުޅުން ނެއްޓޭވަރަށް ކަރުދާސްތަކެއް ހިއްޕަވައިގެން މޭޑޭގައިވެސް މިހުރީ ހެތްކޭ ގޮވިކަމަށެވެ.

"ޑރ.އަފްރާޝީމް މަރާލުމުގައި ބައިވެރިވީ މިވެނި ބައެކޭ. މަޖިލީހުގައި އެސުވާލު ކުރުމުން ވިދާޅުވީ ކަރުދާސްތައް ޕޮލިހުން އަތުލައިފިޔޭ. މަޤާމުގެ ދަހިވެތިކަމުގައި ކޮންމެފަދަކަމެއްވެސް ކުރައްވަފާނެ." ޝިޔާމް ވިދާޅުވިއެވެ.

ފޯޅަވަހީގެ މައްސަލާގައި ރާއްޖެއިން މޮރިޝަސް ކޮޅަށް ތާއިދުކުރަން ނިންމެވުމާއި ގުޅިގެން ޚިޔާލު ތަފާތުވުންތައް އުފެދުމާއި ގުޅިގެން  އެ މައްސަލައިގައި ވެސް އެނޫން މައްސަލަ އެއްގައި ވެސް ރާއްޖެއަށް ގެއްލުންވާފަދަ އެއްވެސް ކަމެއް ނުކުރާނެ ކަމަށްވެސް ރައީސް ޞާލިހު ވަނީ ވިދާޅުވިއެވެ.

އަދި އެމަނިކުފާނުގެ އެ ވާހަކަފުޅާއި ގުޅިގެން ޢިމްރާން މިއަދު ކުރެއްވި ޓުވީޓެއްގައި ވިދާޅުވީ، ބަޔަކު ކިތަންމެ ނުރުހުނަސް އިމުގެ މައްސަލާގައި ދޫ ނުދެއްވާނެ ކަމަށް ވިދާޅުވެ ރައީސް ޞާލިހު ދައްކަވަނީ ތެދުފުޅެއް ކަމަށް އޭނާ ހެކިވެވަޑައިގަންނަވާ ކަމަށެވެ.

"މިކަން ހިނގަމުންދާގޮތް އަޅުގަނޑުމެންނަށް ވަރަށް ރަނގަޅަށް އެނގޭ" ޢިމްރާން ވިދާޅުވިއެވެ.

ޢިމްރާން އެފަދައިން ވިދާޅުވެފައި ވާއިރު، އަފްރާޝީމްގެ މަރުގެ ހަގީގަތް ޔާމީނަށް އެނގެނޭ ކަމަށާއި ޑޮކިއުމެންޓްތައް އަތުގައި އެބަހުރި ކަމަށް 1 މެއި 2015ގައި އޭރުގެ އިދިކޮޅު އިއްތިހާދުން ބޭއްވި ބޮޑު އެއްވުމުގައި އިމްރާން ވަނީ ވިދާޅުވެފައެވެ.

"އަފްރާޝީމް[ގެ މަރާ] ގުޅިގެން ގާތްގަނޑަކަށް ހަތް މީހުން މަރާލާފައި މި ބިންމައްޗަށް ވެއްޓުނީ. ކޮބާތޯ ޔާމީނަށް އެނގޭ ހަގީގަތް... މި ހުރީ އަޅުގަނޑު އަތުގައި ހުރި ޑޮކުމަންޓްތައް މިއަދު ވަގުތު ނެތް [ތަފްސީލަށް ދާން]. ދިވެހި ލޮބުވެތި ރައްޔިތުން، މި ހުރީ އަޅުގަނޑު އަތުގައި ޑޮކުމެންޓްތައް." މެއި ޑޭގެ މުޒާހާރާގައި ޢިމްރާން ވިދާޅުވެފައިވެއެވެ.