ބާބާ ގާޑިޔާގެ އޯނަރު، އަތީޤުއަށް ހާޓްއެޓޭކެއް ޖެހި ފަރުވާދެނީ

މަޝްހޫރު ސްޓްރީޓް ފުޑް ޓްރަކް "ބާބާ ގާޑިޔާ" ގެ އޯނަރު، ހަސަން ޢަތީޤް (ބާބާ) އަށް ހާޓް އެޓޭކެއް ޖެހިގެން ފުވައްމުލައް ހޮސްޕިޓަލްގައި ފަރުވާދެމުންދާ ކަމަށް މައުލޫމާތު ލިބިއްޖެއެވެ.

ލިބިފައިވާ މައުލޫމާތުތަކަށް ބަލާއިރު، ބާބާއަށް ހާޓް އެޓޭކް ޖެހިފައިވަނީ އިއްޔެގެ ވަގުތެއްގައި ކަމަށާއި، މިހާރު އޭނާއަށް ފުވައްމުލައް ހޮސްޕިޓަލްގައި އަންނަނީ ފަރުވާ ދެމުންނެވެ ކަމަށެވެ.

ބާބާ ގާޑިޔާއަކީ ޏ. ފުވައްމުލަކުގައި ފެށި، މިހާރު މުޅި ރާއްޖެއަށް މަޝްހޫރުވެފައިވާ ސްޓްރީޓް ފުޑް ޓްރަކެކެވެ. ހަސަން ޢަތީޤް (ބާބާ) 2020 ވަނަ އަހަރު ކުޑަ ގާޑިޔާއަކުން ފެށި މި ވިޔަފާރި މިހާރު ވެފައިވަނީ ފުވައްމުލަކަށް ޒިޔާރަތްކުރާ މީހުން ކޮންމެހެންވެސް ގޮސްލަންޖެހޭ މުހިންމު ރަމްޒަކަށެވެ.

ބާބާ ގާޑިޔާއަކީ ޝަވަރމާ އަދި ގްރިލް ކުރި އެކި ބާވަތްތަކުގެ ކާނާއަށް މަޤުބޫލު ތަނެކެވެ. މީގެ ތެރެއިން އެންމެ ޚާއްޞަވެފައިވަނީ މީރު ރަހަތަކެއް އެކުލެވޭ ޝަވަރމާއަށެވެ. މީގެ އިތުރުން މިއީ ތިމާވެއްޓާ ރައްޓެހި ވިޔަފާރިއެކެވެ. ސޯލާ ޕެނަލް ހަރުކޮށްގެން، އިއާދަކުރަނިވި ހަކަތައިން ހިންގާ ގާޑިޔާއެކެވެ.