މާލެ ސަރަހައްދުގައި ފަޅުން ގޯތި ދެވޭނަމަ އެހެން ސަރަހައްދު ތަކުގައިވެސް ދެވޭނެ: މިނިސްޓަރ ޑރ. ހައިދަރު

މާލެ ސަރަހައްދުގައި ފަޅު ފަޅުން ގޯތު ދޫކުރެވޭ ނަމަ، ރާއްޖޭގެ އެހެން ރަށް ރަށުގައިވެސް ފަޅުން ގޯތި ދުކުރެވޭނެ ކަމަށް ގެދޮރުވެރިކަމާއި، ބިމާއި، އުމްރާނީ ތަރައްގީއާ ބެހޭ ވުޒާރާގެ ވަޒީރު ޑރ. ޢަލީ ހައިދަރު އަޙުމަދު ވިދާޅުވެއްޖެއެވެ.

ނިމިދިޔަ ސަރުކާރުން ގެދޮރުވެރިޔާސްކީމްގެ ދަށުން ދޫކޮށްފައިވާ ފްލެޓްތަކާ ގުޅިގެން، މި ސަރުކާރުން ނިންމާފައިވާ ކަންކަމާ ގުޅޭގޮތުން މަޢުލޫމާތު ސާފުކުރުމަށް، ހައުސިންގް މިނިސްޓްރީގެ ބޭފުޅުން ހާޒިރުކޮށްގެން މަޖިލީހުގެ ޤައުމީ ތަރައްޤީއާއި ތަރިކައިގެ ކޮމިޓީއިން މިއަދު ބޭއްވި ބައްދަލުވުމުގައި އުނގޫފާރު ދާއިރާގެ މުޙައްމަދު ވަޙީދު (ވައްޑެ) ވަނީ، ކުރީގެ ރައީސް، އިބްރާޙީމް މުހައްމަދު ޞާލިހު ގެ ސަރުކާރުން، މާލެ ސަރަހައްދުން ގޯތި ދޫކުރި އިރު، ފަޅުން ގޯތި ދީފައިވާކަން ފާހަގަކުރައްވައި ، ރާއްޖޭގެ އެހެން ސަރަހައްދު ތަކުގައިވެސް އެހެން އެކަން ނުކުރެވެންވީ ކީއްވެތޯ ސުވާލު ކުރައްވާފައެވެ.

"(މާލެ ސަރަހައްދުގެ) މިފަޅު ތަކުގެ އިހްތިޞާސް، މިސާލަކަށް ގިރާވަރު ފަޅުގެ އިހްތިޞާސް އޮތީ ކޮންބައެއްގެ ތޯ؟ ތިލަފަޅުގެ އިހްތިޞާސް އޮތީ ކޮން ބައެއްގެ ތޯ؟ އެތަންތަން ވަކި ބޭނުމަކަށް ކަނޑައެޅުމުގެ އިޖުރާއަތުގެ އޮންނަނީ ކިހިނެއްތޯ؟.. އަދި މިހާރު ހަމަ ހިއްކާފައި ނެތް ތަނަކުން، ފަޅުން ގޯތި ދޭ ކަމަށް ވަންޏާ، ކީއްވެގެންތޯ، އަޅުގަނޑުމެން ރަށުން، ރ.ފައިނު ފަޅުން ގޯތި ނުލިބެންވީ؟ ގާނޫނު އަސާސީ އެބަ ބަޔާންކުރޭ ތަފާތު ނުކުރުން. ހަމަހަމަކަން."

އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ)

ވައްޑެގެ އެ ސުވާލަށް ޖަވާބު ދެއްވަމުން ޑރ. ހައިދަރު ވިދާޅުވީ، ފަޅުން ގޯތި ދެވޭނެތޯ ނުވަތަ ނޫންތޯ، އެއީ ގާނޫނީ ގޮތުން ސުވާލު އުފެދިފައިވާ ކަމެއް ކަމަށެވެ. އަދި، ޞާލިހުގެ ސަރުކާރުން ފަޅުން ގޯތި ދޫކޮށްފައިވަނީ ގަވާއިދު އިސްލާހުކޮށްގެން ފަޅުން ގޯތި ދެވޭގޮތް ހަދައިގެން ކަމަށެވެ.

އެހެންކަމުން، މާލެ ސަރަހައްދުން އެފަދައިން ގޯތި ދެވޭ ނަމަ އެހެން ސަރަހުންވެސް ދެވޭނެ ކަމަށް މިނިސްޓަރު ވިދާޅުވި އެވެ.

"އަޅުގަނޑަށް އެނގިފައިވާ ގޮތުގައި އޮތީ، އޭރު އޮތް ގަވާއިދެއް އިސްލާހު ކޮށްގެން، ފަޅުން ގޯތި ދީފައި. ރެޖިސްޓްރީ އެއް ހަވާލުނުކުރެވޭތީ ލިޔުމެއް ދެވޭގޮތަށް ގަވާއިދު ބަދަލުކޮށްގެން ލިޔުން ދީފައި. އަޅުގަނޑަށް ހީވަނީ މި ސަރަހައްދުން ދެވޭ ކަމަށް ވަންޏާ، ރ. ފައިނު ފަޅުންވެސް އެގޮތަށް ދެވެން ވާނެ. އެހެންނޫނިއްޔާ އެއީ ގާނޫނީ ހަމަހަމަކަން ނެތީ."

ހައުސިންގް މިނިސްޓަރު ޑރ ޢަލީ ހައިދަރު އަޙުމަދު

މާލެ ސަރަހައްދަށް ކުރިމަތިވެފައިވާ ބޯހިޔާވަހިކަމުގެ މައްސަލަ ހައްލުކުރުމަށް މާލޭ ރަށްވެހިންނަށް ގޯތި ދޫކުރުމަށް ކުރީގެ ރައީސް ޞާލިހުގެ ސަރުކާރުން، ވަނީ ގުޅީފަޅުން މަދުވެގެން 2,000 ގޯތި އަދި ގިރާވަރު ފަޅު ހިއްކައި, އެބިމުންވެސް މަދުވެގެން 2,000 ގޯތި އަދި އުތުރު ތިލަފަޅުންވެސް ގޯތި ދެއްވާނެ ކަމަށް ވަޢުދުވެ ވަޑައިގެން، އެ ސަރަހައްދު ތަކުގެ ފަޅު ތަކުން ގޯތި ލިބިފައިވާ ކަމުގެ ލިޔުންވެސް ހަވާލު ކޮށްފައެވެ.