އެމްޑީޕީޕްރައިމަރީ އާއި ގުޅޭ ކޮމިޓީއަށް ރައީސް ޞާލިހު ގެ ފެކްޝަން މެންބަރުން

އެމްޑީޕީގެ ރިޔާސީ ޕްރައިމަރީ އަށް ގައުމީ މަޖިލީހުން ނެގި ފަސް މެމްބަރުންގެ ކޮމިޓީގައި ރައީސް އިބްރާހިމް މުހައްމަދު ސޯލިހް ފެކްޝަންގެ މެމްބަރުން އިންތިހާބުކޮށްފިއެވެ.

ތާޖުއްދީން ސްކޫލްގައި ރޭ ބޭއްވި އެމްޑީޕީގެ ގައުމީ މަޖިލިހުގެ ޖަލްސާގައި ރިޔާސީ ޕްރައިމަރީއަށް ޤައުމީ މަޖިލިހުން ނަގާ 5 މެމްބަރުންގެ ކޮމެޓީ ނެގުމަށް ނަން ހުށަހެޅުމަށް ހުޅުވާލުމުން ހެންވޭރު ދެކުނު ދާއިރާގެ މަޖިލިސް މެމްބަރ ޙުސައިން ޝަޙީމް ހުށަހަޅުއްވާ ކެނދިކުޅުދޫ ދާއިރާގެ މަޖިލިސް މެމްބަރ އަޙްމަދު އީސާ ތާއީދު ކުރެއްވި 5 ނަން އެވަގުތު ޤައުމީ މަޖިލިހަށް ޙާޟިރުވެތިއްބެވި މެމްބަރުންގެ އިއްތިފާޤުން ވަނީ ފާސްކުރައްވާފައެވެ.

1. އިބްރާޙީމް ވަޙީދު (ޗެއަރޕާސަންގެ ނައިބު އިދާރީ)

2. އަލްއުސްތާޛު އަނަސް ޢަބްދުއްސައްތާރު (ސްޕޯކްސްޕާސަން)

3. އަކްރަމް ކަމާލުއްދީން (މަތިއުތުރު ޕްރޮވިންސްގެ ރައީސް)

4. މުޙައްމަދު އީމާން (ކެނދިކުޅުދޫ ދާއިރާގެ ރައީސް)

5. އަލްއުސްތާޛު އަޙްމަދު އަފީފު ( ޤާނޫނީ ކޮމެޓީގެ ކުރީގެ މުޤައްރިރު)

މި ކޮމިޓީ ނަގާފައި ވަނީ އެ އިންތިހާބުގައި ވާދަކުރައްވާ މަޖިލިސް ރައީސް މުހައްމަދު ނަޝީދަށް ތާއީދު ކުރައްވާ ގައުމީ މަޖިލީހުގެ މެމްބަރުންގެ ޖަލްސާ ބޮއިކޮޓް ކުރައްވައި ހޯލް ދޫކުރައްވައި ނުކުމެވަޑައިގެންފައެވެ.

ނަޝީދުގެ ފެކްޝަންގެ މެންބަރުން ޖަލްސާ ބޮއިކޮޓް ކުރައްވާފައިވަނީ، ނަޝީދު ފެކްޝަންގެ ފަރާތުން ދެ ބޭފުޅަކާއި ރައީސް ސޯލިހްގެ ފެކްޝަންގެ ފަރާތުން ދެ ބޭފުޅަކާއި ދެ ފެކްޝަން އެއްބަސްވާ އެއް ނަމެއް ހިމަނައިގެން ފަސް މެމްބަރުންގެ ކޮމިޓީ އެއް އެކުލަވާލުމަށް އެ ފެކްޝަނުން ހުށަހެޅި ހުށަހެޅުމަށް ރައީސް ސޯލިހަށް ތާއީދު ކުރައްވާ ބޭފުޅުން އެއްބަސް ނުވުމުންނެވެ.