ޖޭޕީގެ ޓިކެޓުގައި މަޖިލިހަށް ކުރިމަތިލުމުގެ މުއްދަތު އިތުރުކޮށްފި
އަންނަ އަހަރު ބޭއްވުމަށް ތައްޔާރުވަމުން އަންނަ ރައްޔިތުންގެ މަޖިލީހުގެ އިންތިހާބުގައި ޖުމްހޫރީ ޕާޓީ (ޖޭޕީ) ގެ ޓިކެޓުގައި ވާދަކުރައްވަން ބޭނުންވާ ފަރާތްތަކަށް ހުޅުވާލި ފުރުސަތު އެ ޕާޓިން އިތުރުކޮށްފިއެވެ.
މިކަން ހާމަކޮށް ޖުމްހޫރީ ޕާޓީން ނެރުނު ނޫސްބަޔާނެއްގައި ބުނެފައިވަނީ، މި ދުވަސްވަރަކީ ސްކޫލް ބަންދު ދުވަސް ވަރަކަށްވުމާ ގުޅިގެން ގިނަ ބަޔަކު ރާއްޖެއިން ބޭރަށާއި ރާއްޖޭގެ އެކި ރަށްރަށަށް ދަތުރުކުރާ ދުވަސްވަރެއް ކަމުން އެ ޕާޓީގެ ޓިކެޓުގައި މަޖިލީހަށް ވާދަކުރުމަށް ޝައުގުވެރިކަން ހުރި ގިނަ ފަރާތްތަކަކަށް ކުރިން ހުޅުވާލި މުއްދަތުގައި ފޯމު ހުށަހެޅުމަށް ދަތިތަކެއް ކުރިމަތިވެފައިވާ ކަމަށެވެ.
އެގޮތުން ޖުމްހޫރީ ޕާޓިގެ ޓިކެޓްގައި ރައްޔިތުންގެ މަޖިލިހަށް ވާދަކުރުމުގެ ޝައުގުވެރިކަން ހުރި ފަރާތްތަކަށް، މިމަހުގެ 17 ވަނަ ދުވަހުން 26 ވަނަ ދުވަހުގެ ނިޔަލަށް ކުރިން ހުޅުވާލި ފުރުސަތު މިހާރުވަނީ މި އަންނަ މަހުގެ 25 ވަނަ ދުވަހާއި ހަމައަށް އިތުރުކޮށްފައެވެ.
އެހެންކަމުން މަޖިލިސް އިންތިޚާބުގައި ވާދަކުރެއްވުމަށް ބޭނުންފުޅުވާ ފަރާތްތަކުން އެކަމަށް ހާއްސަކޮށްފައިވާ ފޯމާއެކު ސިވީ އަދި ތައުލީމީ ސެޓްފިކެޓްތަކުގެ ކޮޕީ އައިޑީކާޑާއެކު އެޕާޓީގެ މައި މަރުކަރު މ.ކުނޫޒަށް ސިޓީއަކުން ނުވަތަ އީމެއިލް [email protected] އަށް އީމެއިލް ކުރުމަށް އެޕާޓީން ވަނީ ބުނެފައެވެ.
ކުރިމަތިލާ މެންބަރުންގެ ކެންޑިޑެންސީ ކަށަވަރު ވާނީ އިންތިހާބުގައި ވާދަ ކުރުމަށް އެދި ހުށަހަޅާ ފަރާތްތަކުގެ މައުލޫމާތުގެ ސައްހަކަމާއި ގާބިލުކަން ބެލުމަށް ފަހު، ޕާޓީގެ ކައުންސިލުން ނުވަތަ އެކަަމަށްޓަކައި ކަނޑައަޅާ ކޮމިޓީއަކުން ބެލުމަށް ފަހު ކަމަށް އެޕާޓީން ބުނެއެވެ.
އަންނަ އަހަރު މަޖިލިސް އިންތިޚާބުގައި 93 ދާއިރާ އަކަށް ޖުމްހޫރީ ޕާޓީގެ ފަރާތުން ވާދަކުރާނެ ކަމުގައި އެޕާޓީން ބުނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
