ޚިޔާލު ފާޅުކުރަން ވާނީ އިސްލާމްދީނާއި ޤާނޫނުގެ ޙުދޫދުގެ ތެރެއިން; ނޫނީ މުޖުތަމަޢު ހަލާކުވެދާނެ: ޑރ. ޝަހީމް

ޚިޔާލު ފާޅުކުރުމުގެ މިނިވަންކަމަކީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީން ކަށަވަރުކޮށްދީފައިވާ ޙައްޤެއް ކަމަށާއި، ނަމަވެސް އެ މިނިވަންކަން ބޭނުންކުރަންވާނީ އިސްލާމްދީނާއި ޤާނޫނުގެ ޙުދޫދުތަކުގެ ތެރެއިން ކަމަށް އިސްލާމީ ކަންތައްތަކާއި އައުޤާފާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

ވަޒީރު ޑރ. ޝަހީމް މިހެން ވިދާޅުވީ މީސްމީޑިއާގެ މަންސައެއް ކަމަށްވާ "އެކްސް" ގައި ކުރެއްވި ޕޯސްޓެއްގައެވެ. އެމަނިކުފާނު ވިދާޅުވީ، ރާއްޖޭގެ ނޫސްވެރިންނަށް ފުރިހަމަ މިނިވަންކަން އެބައޮތް ކަމަށް ގަބޫލުކުރައްވާ ކަމަށާއި، އެ މިނިވަންކަން ދަމަހައްޓައި އިތުރަށް ވަރުގަދަ ކުރަންޖެހޭ ކަމަށެވެ. އަދި ދުނިޔޭގެ ނިސްބަތުން ވެސް ނޫސްވެރިކަމުގެ މިނިވަންކަން އެންމެ މަތީ ދަރަޖައަށް އޮތް ޤައުމުތަކުގެ ތެރޭގައި ރާއްޖެ ހިމެނެންޖެހޭނެ ކަމަށް ވެސް ވިދާޅުވިއެވެ.

ނަމަވެސް، ނޫސްވެރިކަމުގެ މިނިވަންކަން ބޭނުންކުރަންވާނީ ޒިންމާދާރުކަމާއެކުކަން ފާހަގަކުރައްވައި ޑރ. ޝަހީމް ވިދާޅުވީ، ނޫސްވެރިކަމަކީ މުޖުތަމަޢުގައި ހުންނަ ނޭދެވޭ ކަންކަމާއި، ކޮރަޕްޝަނާއި، ބޭއިންސާފާ ދެކޮޅަށް މަސައްކަތްކުރުމުގައި މުހިންމު ދައުރެއް އަދާކުރާ ޤައުމީ އަގުހުރި މަސައްކަތެއް ކަމަށެވެ.

”މީސްމީޑިއާ އާއި ނޫސްވެރިކަމުގެ މިނިވަންކަން ބޭނުންކޮށްގެން މީހުންގެ އަބުރާއި ޢިއްޒަތަށް އަރައިގަތުމާއި، އިސްލާމްދީނާއި ޤާނޫނާ ޚިލާފަށް މީހުން ބުލީކުރުމާއި ފުރައްސާރަކުރުމަކީ މުޖުތަމަޢު ފަސާދަވާނެ ކަމެއް“ ވަޒީރު ވިދާޅުވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ނޫސްވެރިކަމުގެ މިނިވަންކަމަށް ވަރަށް ބޮޑު އަހައްމިއްޔަތުކަމެއް ދެއްވާކަން ފާހަގަކުރައްވަމުން ޑރ. ޝަހީމް ވިދާޅުވީ، ރައީސް މުޢިއްޒު ކޮންމެ ހަފުތާއަކު ނޫސްވެރިންނާ ބައްދަލުކުރައްވައި، ސީދާ ސުވާލުތަކަށް ޖަވާބުދެއްވައި، ވަޒީރުން ވެސް އެގޮތަށް ޢަމަލުކުރެއްވުމަށް ބާރުއަޅުއްވާ ކަމަށެވެ. މަޢުލޫމާތު ހާމަކުރުމާއި ދެފުށް ފެންނަ ސިޔާސަތެއް ގެންގުޅުމަކީ މި ސަރުކާރުގެ އިސް އަމާޒެއް ކަމަށް ވެސް ވިދާޅުވިއެވެ.

ވަޒީރުގެ ޕޯސްޓުގައި އިތުރަށް ފާހަގަކުރެއްވި ގޮތުގައި، މިހާރަކަށް އައިސް ބައެއް މީޑިއާތަކާއި ސޯޝަލް މީޑިއާ އެކައުންޓްތަކުން ރައީސް ޑރ. މުޢިއްޒަށާއި، އެމަނިކުފާނުގެ ޢާއިލާއަށާއި، ބައެއް ވަޒީރުންނާއި އެ ބޭފުޅުންގެ ޢާއިލާތަކަށް އަމާޒުކޮށް، މީގެ ކުރިން ރާއްޖޭގައި ނުދެކޭ މިންވަރަށް ހަޤީޤަތާ ޚިލާފު ވާހަކަތައް ފަތުރައި، ޒާތީ ގޮތުން ދިމާކުރަމުންދާ ދިއުމަކީ ހިތާމަހުރި ކަމެކެވެ. މިއީ އިންސާފަށް ލޯބިކުރާ އެއްވެސް ރައްޔިތަކު ބަލައިގަންނާނެ ކަމެއް ނޫން ކަމަށް ވެސް ވިދާޅުވިއެވެ.

”މީހުންނަށް ފުރައްސާރަކުރުމާއި، އަބުރަށް އަރައިގަތުމާއި، ދޮގު ޚަބަރު ފެތުރުމަކީ ކީރިތި ޤުރުއާނާއި ރަސޫލާގެ ސުންނަތުގައި ނަހީކުރައްވާފައިވާ ކަންކަން. އިންސާނެއްގެ އަބުރާއި ޢިއްޒަތަކީ އެމީހެއްގެ އެންމެ ބޮޑު ރައުސްމާލު ކަމަށްވާއިރު، އަބުރު ރައްކާތެރިކުރުމަކީ އިސްލާމީ ޝަރީޢަތުގެ މަތިވެރި މަޤުޞަދުތަކުގެ ތެރޭގައި ހިމެނޭ ކަމެއް“ ޝަހީމް ވިދާޅުވިއެވެ.

ވަޒީރު ޑރ. ޝަހީމްގެ ވަނީ ހެޔޮ ގޮތުގައި މަސައްކަތްކުރައްވާ އެންމެހައި ނޫސްވެރިންގެ މަސައްކަތްތައް ބަލައިގަނެ އަގުވަޒަންކުރައްވާކަމަށާއި، ނޫސްވެރިކަމަކީ އަދަބިއްޔާތުގެ ތެރޭގައި ނަޤުދީ ވިސްނުމާއި ބިނާކުރަނިވި ފާޑުކިއުމުގެ މައްޗަށް ހިނގާ ނިޒާމަކަށް ވެއްޖެ ނަމަ މުޅި މުޖުތަމަޢަށް ފައިދާނެކަމަށް ވިދާޅުވެފައެވެ.