ޤާނޫނު އަސާސީއަށް މި ގެންނަ އިސްލާހުން ދުސްތޫރީ އޮނިގަނޑަށް އެއްވެސް ބަދަލެއް ނާންނާނެ: އުޝާމް

ރިޔާސީ އިންތިހާބާއި، ރައްޔިތުންގެ މަޖިލީހުގެ އިންތިހާބު އެއްދުވަހެއްގައި ބޭއްވުމަށް ނިންމި ނަމަވެސް ޤައުމުގެ ދުސްތޫރީ އޮނިގަނޑަށް އެއްވެސް ބަދަލެއް އަންނާނޭކަމަށް ޤަބޫލު ނުކުރައްވާކަމަށް އެޓާނީ ޖެނެރަލް އަލްއުސްތާޛު އަޙްމަދު އުޝާމް ވިދާޅުވެއްޖެއެވެ.

ދެ އިންތިހާބު އެއްދުވަހެއްގައި ބޭއްވުމާ ގުޅޭގޮތުން ޤާނޫނީ ގޮތުން ރައްޔިތުން ހޭލުންތެރިކަން އުފެއްދުމުގެ ގޮތުން ބާ ކައުންސިލުން މިއަދު ބޭއްވި ފޯރަމްގައި ވާހަަކަދައްކަވަމުން އެޓާނީ ޖެނެރަލް ވިދާޅުވީ، ބާރުތައް ފެށިގެން އަންނަނީ ރައްޔިތުންގެ ކިބައިންކަން ޤާނޫނު އަސާސީގެ ހަތަރުވަނަ މާއްދާގައި ވަރަށް ސާފުކޮށް ބަޔާންކޮށްފައި އޮންނަ ކަމަށެވެ. ރައްޔިތުންގެ ކިބައިން ބާރުތައް ލިބިގަންނަ ދުސްތޫރީ އެންމެ އަސާސީ ސިފައަކީ ރައްޔިތުންނަށް ލިބިދީފަ އޮންނަ އިންތިހާބު ތަކުގަ ވޯޓު ދިނުމުގެ ހައްގެވެ.

އުޝާމް ވިދާޅުވީ، ދެ އިންތިހާބު އެއްދުވަހަކާ ބޭއްވުމަށް ގެންނަ މި އިސްލާހުގެ ސަބަބުން ރައްޔިތުންގެ އެ ހައްޤަށް އުނިކަން ލިބޭނޭކަމަށް ޤަބޫލުފުޅު ނުކުރައްވާކަމަށެވެ.

ރައްޔިތުންގެ ކިބައިން ބާރުތައް ލިބިގަންނަ ދުސްތޫރީ އެންމެ އަސާސީ ސިފައަކީ ރައްޔިތުންނަށް ލިބިދީފަ މިއޮތް އިންތިހާބު ތަކުގަ ވޯޓު ދިނުމުގެ ހައްގު. ރައްޔިތުން އިންތިހާބު ތަކުގަ ވޯޓު ލައިގެން ރައީސުލްޖުމްހޫރިއްޔާއަކު އިންތިހާބު ކުރުމުގެ ހައްގު. ރައްޔިތުން ވޯޓު ލައިގެން ރައްޔިތުންގެ މަންދޫބުން ރައްޔިތުންގެ މަޖިލީހަށް އިންތިހާބު ކުރުމުގެ ހައްޤު. ބޭސިކް އެއް އަސާސް ގާނޫނު އަސާސީގައި ކަނޑައަޅާފައި މިއޮތީ. މި އިސްލާހުގެ ސަބަބުން މިކަމަށް އެއްވެސް ބަދަލެއް އާދޭތޯ؟ އެއްވެސް ބަދަލެއް ނާދޭ

އެޓާނީ ޖެނެރަލް އަހުމަދު އުޝާމް

އެޓާނީ ޖެނެރަލް ވިދާޅުވީ، ދެ އިންތިހާބު އެއްދުވަހެއްގައި ބޭއްވުމަށް ނިންމާ ނިންމުމަކުން ގާނޫނު އަސާސީގެ ހަތަރުވަނަ މާއްދާއިން ރައްޔިތުންނަށް ލިބިދޭ އެންމެ މުހިއްމު ބާރަށް އެއްވެސް ބަދަލެއް ނާންނާނޭކަމަށެވެ. އެހެންކަމުން މިކަމުގެ ސަބަބުން ދުސްތޫރީ އޮނިގަނޑަށް ބަދަލެއް އަންނަކަމަކަށް އެއްވެސް ގޮތަކަށް ގަބޫލެއް ނުކުރައްވާކަމަށެވެ.

ހަމައެކަނި އަންނާނޭ ބަދަލަކީ، ރާއްޖޭގައި ޒަމާނުއްސުރެ އަމަލު ކުރަމުން އައި އިންތިހާބީ އޮނިގަނޑަށް އަންނަ ބަދަލެއް ކަމަށާއި، މިކަމުން ބަދަލު އަންނާނީ އިންތިހާބީ އޮނިގަނޑަށްކަމަށެވެ.

" އެއްވެސް ހާލެއްގައި ގާނޫނު އަސާސީގެ މި ދުސްތޫރުގައި އަޅުގަނޑުމެން ކަނޑައަޅާފަ މިއޮތް އެންމެ އަސާސީ އެއްވެސް ކަމަކަށް ބަދަލެ އަންނާނެ އިސްލާހެއް ނޫން މިއީ" އެޓާނީ ޖެނެރަލް އަހުމަދު އުޝާމް ވިދާޅުވިއެވެ.

މި ފޯރަމްގައި ވާހަކަދައްކަވަމުން ފުންނާބު އުސް ވަކީލާ އާއިޝަތު އާޒިމާ ޝަކޫރުވެސް ވަނީ ޤާނޫނު އަސާސީއަށް މި ގެންނަ އިސްލާހަކީ ގެނައުން ދުސްތޫރީ އޮނިގަނޑު ހުއްދަކުރާ އިސްލާހެއްކަމަށް ވިދާޅުވެފައެވެ. އެހެންކަމުން މިކަމުގައި އުފައްދާނޭ ޤާނޫނީ އެއްވެސް ސުވާލެއް ނެތްކަމަށް އާޒިމާ ވިދާޅުވިއެވެ.