ސްމިތް ފުލުހުންގެ ބަންދުން ދޫކޮށްލައިފި

ހޯމް މިނިސްޓްރީގެ ކުރީގެ ޑެޕިއުޓީ މިނިސްޓަރ އަހުމަދު ސިއްދީގަށް، އިއްޔެ މެންދުރު ކްރިމިނަލް ކޯޓް ކައިރިން ހަމަލާދިންކަމަށް ބުނެ ހައްޔަރުކުރި އެމްޑީޕީގެ އެކްޓިވިސްޓް އަލީ ހާޝިމް (ސްމިތް) ފުލުހުން ދޫކޮށްލައިފިއެވެ.

ފުލުހުންގެ ބަންދުން ސްމިތް ދޫކޮށްލިކަމަށް ސްމިތްވެސް ވަނީ ޓްވީޓަކުން ޔަގީންކޮށްދީފައެވެ. އޭނާ ބަންދުން ދޫކޮށްލީ ކީއްވެކަން އަދި ޔަގީންވެފައިނުވާއިރު، އިއްޔެ މި މައްސަލައިގައި ކްރިމިނަލް ކޯޓުން ވަނީ ސްމިތްގެ މައްޗަށް ހަތްދުވަހުގެ ބަންދުގެ މުއްދަތުވެސް ޖަހާފައެވެ.

ސްމިތް ދޫކޮށްފައިވަނީ އޭނާ ދޫކޮށްލުމަށް އެދި ސޯޝަލް މީޑިޔާގައި ވަރުގަދަ ކެމްޕެއިނެއް ކުރަމުން ދަނިކޮށެވެ. އަދި މިއަދުގެ ވަގުތެއްގައި އެމްޑީޕީގެ ފަރާތްތަކުން ވަނީ ސްމިތް ދޫކޮށްލުމަށް އެދި މުޒާހަރާވެސް ކޮށްފައެވެ.

ސިއްދީގަށް ދިން ހަމަލާ ޕީޕީއެމްގެ ފަރާތުން އެޕާޓީގެ ސެކްރެޓަރީ ޖެނެރަލް މުހައްމަދު ހުސައިން ޝަރީފު (މުންދު) ވަނީ ކުށްވެެރިކުރައްވާފައެވެ. މުންދު ވިދާާޅުވީ، އެ ހަމަލާ ހަރުކަށި އިބާރާތުން ކުށްވެެރިކުރާ ކަމަށާއި، މިނިވަން ކަމާއި އެކު ހިޔާލު ފާޅުކުރުމަކީ ކޮންމެ މީހަކަށްވެސް ލިބިގެންވާ ހައްގެއް ކަމަށެވެ. އަދި މި ހަމަލާާއިން ޕީޕީއެމްގެ އަޒުމަށް އެއްވެސް އުނިކަމެއް ނާންނާނެކަމަށް މުންދު ވަނީ ބަޔާންކުރައްވާފައެވެ.

ނަމަވެސް އެ ސަރަހައްދުގައި ހުރި އެމްޑީޕީގެ އެކްޓިވިސްޓެއް ކަމުގައިވާ މައިމޫން ބުނީ، ސިއްދީގް އަށް ސްމިތް ހަމަލާދީފައި ނުވާ ކަމަށާއި، ސިއްދީގް ފޯނު ނަގައި ވީޑިޔޯ ކުރަން އުޅުމުން، އެކަން ހުއްޓުވަން އުޅުމުގެ ތެރޭގައި ސްމިތްގެ ނިޔަފަތިން، ސިއްދީގުގެ ތެޔޮހަމުން ތަންކޮޅެއް ކެނޑުނީ ކަމަށެވެ