އެމްޑީޕީގެ ރިޔާސީ ޕްރައިމަރީ ރައީސް ޞާލިހު ކާމިޔާބު ކުރައްވައިފި

2023 ވަނަ އަހަރުގެ ރިޔާސީ އިންތިޚާބުގައި އެމްޑީޕީގެ ފަރާތުން ކުރިމަތިލާނެ ކެންޑިޑޭޓެއް ކަނޑައެޅުމަށް މިއަދު ކުރިއަށް ގެންދިޔަ އެޕާޓީގެ ރިޔާސީ ޕްރައިމަރީގެ އިންތިޚާބު ބޮޑު ތަފާތަކުން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ކާމިޔާބު ކުރައްވައިފި އެވެ.

އެމްޑީޕީގެ ރިޔާސީ ޕްރައިމަރީގެ މިހާތަނަށް ގުނި ވޯޓު ފޮށިތަކުގެ ޖުމުލަ ނަތީޖާ ދައްކާގޮތުން ރައީސް ޞާލިހަށް ލިބިފައިވަނީ %63 ވޯޓެވެ. އަދި ރައީސް ނަޝީދަށް ލިބިފައިވަނީ %37 އިންސައްތަ ވޯޓެވެ.

މިހާތަނަށް ނަތީޖާ އިއުލާން ކޮށްފައިވާ ދާއިރާ ތަކުގެ ތެރޭގައި އާބާދީ ބޮޑު ދާއިރާތައްވެސް ހިމެނެއެވެ. އެހެންކަމުން، މި ނަތީޖާއިން ރައީސް ޞާލިހަށް އިންތިހާބު ކާމިޔާބު ވިކަން މިވަނީ ޔަގީންވެފަ އެވެ.

މި އިންތިޚާބުގައި ރާއްޖޭގައި މީހުން ދިރިއުޅޭ ހުރިހާ ރަށެއްގައި 286 ވޯޓު ފޮށި ވަނީ ބަހައްޓާފަ އެވެ.

މިއަދު ހެނދުނު 9:00 ގައި އެމްޑީޕީގެ ރިޔާސީ ޕްރައިމަރީގެ ވޯޓުލުން ފަށާފައިވާއިރު ހަވީރު 5:00 ހަމަޔަށް ވޯޓުލުން ވަނީ ކުރިއަށް ގެންގޮސްފައެވެ.

ވޯޓުލުން ކުރިއަށް ދިޔައިރު ބައެއް ވޯޓު ފޮށިތަކުގައި އެކި މައްސަލަތައް ޖެހި ވޯޓުލުންވެސް މެދުކަނޑާލަން ޖެހުނުކަން ފާހަގަކޮށްލެވެއެވެ. އެހެން ނަމަވެސް އެ މައްސަލަތައް ހައްލުކޮށް އެ ފޮށިތަކުގައިވެސް ވޯޓުލުން ވަނީ ކުރިއަށް ގެންގޮސްފައިވެއެވެ.

އެމްޑީޕީގެ ރިޔާސީ ޕްރައިމަރީ ބޮޑު ތަފާތަކުން ކާމިޔާބު ކުރެވޭނެކަމުގެ ޔަގީންކަން އޮތްކަމަށް ރައީސް ޞާލިހުވަނީ މިއަދުވެސް ވިދާޅުވެފަ އެވެ.

އަދި މި އިންތިޚާބަށްފަހު ކުރިއަށް އޮތް ރިޔާސީ އިންތިޚާބަށް ތައްޔާރީތައް ވާން ފަށާނެކަމަށް އެމަނިކުފާނު ވިދާޅުވިއެވެ.

އެމްޑީޕީ ވެރިކަން ދިފާއުކުރުމަށް ރައީސް ޞާލިހަށް ދެވަނަ ދައުރެއް ދޭން ޖެހޭކަމަށް ރައީސް ޞާލިހަށް ތާއީދުކުރައްވާ މެމްބަރުން ވަނީ ވިދާޅުވެފައެވެ. އަދި ވެރިކަން ދެމެހެއްޓުމަށް އެހެން ސިޔާސީ ޕާޓީތަކުގެ ތާއީދުވެސް ހޯދުން މުހިންމު ކަމަށާއި، އެކަން ކުރެވޭނީ ރައީސް ޞާލިހަށްކަންވެސް އެ ފަރާތްތައް ވަނީ ފާހަގަކުރައްވާފަ އެވެ.

އަނެއްކޮޅުން މި އިންތިޚާބުން ނާކާމިޔާބުވެއްޖެ ނަމަ ރައީސް ޞާލިހާއެކު މަސައްކަތްޕުޅު ނުކުރައްވާނެކަމަށް މި އިންތިޚާބުގައި ރައީސް ޞާލިހާއި ވާދަކުރެއްވި މަޖިލީހުގެ ރައީސް މުހައްމަދު ނަޝީދު ވަނީ ވިދާޅުވެފަ އެވެ. އެހެންކަމުން، މި އިންތިޚާބާއި ގުޅިގެން އެމްޑީޕީގެ އެތެރޭގެ މަޝްރަހަށް ބޮޑެތި ބަދަލުތަކެއް އަންނާނެކަމަށް ބެލެވެއެވެ.