ރިޝްވަތު ނެގި މީހާގެ މައްސަލަ ފޮނުވާފައި، އެ ދިން މީހާގެ މައްސަލަ ނުފޮނުވުނީ ހެކިނެތިގެންތޯ؟: މުޢިއްޒު

ރިޝްވަތު ދިން މީހާގެ މައްސަލަ ނުފޮނުވުނީ ހެކި ނެތިގެންތޯ ކުރީގެ ޕްރޮސިކިޔުޓާ ޖެނެރަލް އަހުމަދު މުއިއްޒު ސުވާލުކުރައްވައިފިއެވެ.

މުޢިއްޒު މިގޮތަށް ސުވާލު ކުރައްވާފައި މިވަނީ އެމްއެމްޕީއާރްސީ ޚީޔާނާތުގެ މައްސަލައިގައި ހިމެނޭ އެމްއެންޑީއެފްގެ މޭޖާ ނަވީން ޒުބައިރުގެ އެކައުންޓަށް ފައިސާ ޖަމާކުރި މައްސަލައިގައި އޭނާގެ މައްޗަށް ދައުވާކުރުމަށް ޕްރޮސެކިއުޓާ ޖެނެރަލް (ޕީޖީ) އޮފީހަށް އެންޓި-ކޮރަޕްޝަން ކޮމިޝަން (އޭސީސީ) އިން މިއަދު ހުށަހަޅި މައްސަލައިގައެވެ.

އެކޮމިޝަނުން ބުނީ، ނަވީންގެ މައްޗަށް ހަ ދައުވާ އެއް ކޮށްދެއްވުމަށް ޕީޖީގައި އެދިފައިވާނެ ކަމަށެވެ. އެގޮތުން ރިޝްވަތު ހިފުމުގެ ދައުވާ، ރިޝްވަރު ލިބިގަތުމަށް އެދުމުގެ ދައުވާ، ރިޝްވަތު ލިބިގަތުމަށް އެއްބަސް ވުމުގެ ދައުވާ، ސިފައިންގެ ކެޕްޓަނެއްގެ މަގާމުގައި ހުރެ މަގާމުގެ ނުފޫޒު ބޭނުންކޮށްގެން ވަކި މީހަކަށް ނުވަތަ ފަރާތަކަށް ނާޖާއިޒު ފައިދާ ހޯދައިދިނުމުގެ ކުށުގެ ދައުވާ، ރިޝްވަތުގެ ކުށުން ހޯދާފައިވާ ފައިސާ އަތުގައި ބަހައްޓައި، ބޭނުންކުރުމުގެ ކުށުގެ ދައުވާ އަދި މަނީ ލޯންޑަރިންގެ ކުށުގެ ދައުވާ އެވެ.

އަދި މިއާއެކު މި މައްސަލައިގައި ދައުލަތަށް ލިބެން ޖެހޭ 100،000 ޑޮލަރު އަނބުރާ ހޯދުމަށް އެމްއެމްޕީއާރްސީ އަށް ވަނީ އަންގައިފަ އެވެ.

މިކަމާއި ގުޅިގެން މުއިއްޒު ކުރައްވާފައިވާ ޓްވީޓެއްގައި އޭނާ ވަނީ މޭޖާ ނަވީން ޒުބައިރުގެ މައްޗަށް ދައުވާ އުފުލި އިރު ރޝްވަތު ދިން މީހާގެ މައްސަލަ ނުފޮނުވުނީ ހެކިނެތިގެންތޯ ނޫނީ އެއްބާރުލުމުގެ އެއްބަސްވުމުގެ ދަށުން ދައުވާ ކުރެވެން ނެތިގެންތޯ ސުވާލު ކުރައްވާފަ އެވެ.

"މިކަންކަން ސާފު ކޮށްދެއްވާ. ޑިޔުޓީ ޕްރޮސިކިޔުޝަންގެ އެހީތެރިކަން ލިބުނުކަން ހީކުރަން." މުއިއްޒު ވިދާޅުވި އެވެ.

ނަވީން ނެގި ކަމަށް ބުނާ ރިޝްވަތުގެ ފައިސާ ދިން ކަމަށް އޭސީސީން ބުނަނީ އެސްއޯއެފް ކުންފުނިން ނެވެ. އަދި އެމްއެމްޕީއާރުސީގެ ޚިޔާނާތުގެ މައްސަލައިގައި އެ ކުންފުނީގެ މައްޗަށް ދައުވާ ނުކުރަން ދައުލަތުން ވަނީ ނިންމާފައެވެ.

ނަވީންގެ އެކައުންޓަށް އެސްއޯއެފް ކުންފުނީގެ އެކައުންޓުން 100،000 ޑޮލަރު ޖަމާވި ކަމަށް އޭސީސީގެ ތަހުގީގު ރިޕޯޓުން ހާމަވެފައި ވާތީ، 2019 ވަނަ އަހަރު އެ މައްސަލައިގައި އެމްއެންޑީއެފުން އޭނާ ސަސްޕެންޑް ވެސް ކުރި އެވެ. ނަމަވެސް ފަހުން ހަމަ އެ އަހަރު އޭނާގެ ސަސްޕެންޝަން އުވާލައި އަލުން ވަޒީފާއަށް ނުކުތުމުގެ ހުއްދަ ވަނީ ދީފައެވެ. ނަވީން މިހާރު ވެސް ހުންނެވީ ހަމަ އެ މަގާމުގަ އެވެ.

އޭސީސީ އާއި ފުލުހުން ގުޅިގެން ހިންގާ އެމްއެމްޕީއާރުސީގެ ބޮޑު ހިޔާނާތުގެ ތަހުގީގުގައި، ތުހުމަތުކުރެވޭ 338 މީހެއްގެ މައްސަލަ ބަލަން ނިންމާފައިވާއިރު، މިހާތަނަށް ނިމުނީ 38 މައްސަލައެކެވެ.