ސެންޓް ޖެހިޔަސް، ރަށްފުށުގެ ކަނބަލުންގައިން މީގެ ކުރިން މާ މީރުވަހެއް ނުދުވާ: ރާޝިދު

ކިތަންމެ މީރުވަސް ދުވާ ސެންޓެއް ޖެހި ނަމަވެސް، މީގެ ކުރިން ރަށްފުށުގެ ކަނބަލުންގައިން މާ މީރުވަހެއް ނުދުވާ ކަމަށް ކޮމަަންޑޫ ދާއިރާގެ މެންބަރު މުހައްމަދު ރާޝިދު ވިދާޅުވެއްޖެ އެވެ.

މިއަދުގެ ރައްޔިތުންގެ މަޖިލީހުގެ ޖަލްސާގައި ދަރަނި ރީސްޓްރަކްޗާ ކުރުމަށް ސަރުކާރަށް ދީފައިވާ ލަފާ ތަންފީޒު ކުރުމަށް ގޮވާލައި ގަލޮޅު އުތުރު ދާއިރާގެ މެންބަރު އީވާ އަބްދުالله ހުށަހެޅުއްވި ގަރާރަށް ބަހުސް ކުރައްވަމުން ރާޝިދު ވިދާޅުވީ، މީގެ ކުރީ ސަރުކާރުތަކުންވެސް ލޯނު ތަކެއް ނަގާފައިވާ ކަމަށާ، އެހެން ނަމަވެސް އެ ލޯނުތައް ނަގައިގެން ކުރި ކަމެއް ފެންނަން ނެތް ކަމަށެވެ.

އެގޮތުން، ހއ އަތޮޅުން ފެށިގެން އައްޑު އަތޮޅާއި ހަމައަށް ބަލައިލި ނަމަވެސް، އަތޮޅުތެރޭގެ ރަށްރަށުގައި ޕްރޮޖެކްޓް ތައް ހިންގަން، 20 ބިލިއަނުން, 40 ބިލިއަނުން ކުރީ ސަރުކާރު ތަކުން ލީނު ނަގާފައިވާއިރު، އެ ފައިސާ "އޮއްސާލި" ތަނެއް ނޭނގޭ ކަމަށް ރާޝިދު ވިދާޅުވި އެވެ.

އެހެންނަމަވެސް، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ މިސަރުކާރުން، ކޮވިޑްގެ ދަތިހާލަތުގައިވެސް ލޯނުތައް ހޯދައިގެންނާއި އެނޫން ގޮތް ގޮތުންވެސް ރައްޔިތުންނަށް ކަންކަން ކޮށްދެމުންދާކަމަަށް ރާޝިދު ވިދާޅުވި އެވެ. އަދި އެކަންކަން ފެންނަން ހުރި ކަމަށްވެސް އޭނާ ވިދާޅުވި އެވެ.

"އަޅުގަނޑު ގަބޫލު ކުރާގޮތުގައި ލޯނު ކީއްކުރަން، ކޮންމެ ގޮތަކުން ވިޔަސް ފައިސާ ހޯދައިގެން، އަޅުގަމޑުމެންގެ ރައްޔިތުންނަަށް ބޭނުންވާ ކަންކަން ކޮށްދޭނަމަ އަޅުގަނޑުމެންނަށް އެއްވެސް މައްސަލައެއް ނެތް."

މެންބަރު މުހައްމަދު ރާޝިދު

ރާޝިދު އިތުރަށް ވިދާޅުވީ، މި ސަރުކާރުން ލޯނު ނަގައިގެން ދަރަނި ނުދެއްކޭ ވާހަކަ ދައްކަން ނުޖެހޭ ކަމަށާ، މި ސަރުކާރަަކީ އެއަށްވުރެ މާ ބަރާބަރު, މާ "އޯގަނައިޒް" ކޮށް ހިންގާ ސަރުކާރެއް ކަމަށެވެ. އަދި ކުރިއަށް އޮތް ތަނުގައިވެސް ރައްޔިތުންނަށް ކޮށްދޭންޖެހޭ ކަންކަން ކޮށްދިނުމަށް ލޯނު ނަގައިގެން ނަމަވެސް، އެ ނޫން ގޮތަކަށް ނަމަވެސް ކޮށްދޭ ނަމަ ކޮށްދޭނެނަމަ ރައްޔިތުން އެކަން އުފަލުން ބަލައިގަންނާނެ ކަމަށްވެސް އޭނާ ވިދާޅުވި އެވެ.

މިއާއެކު ރާޝިދު ވިދާޅުވީ، ފެނުގެ ނިޒާމް ރަށްރަށުގައި ގާއިމް ކުރެވުމާއި އެކު އޭގެ އަސަރު ރަށްރަށުގެ ލޯބި ޗާލު އަންހެން ކުދިންގެ މޫނުމަތިން ފެންނަމުންދާ ކަމަށެވެ.

"އެ ބޭފުޅުން ކިތަންމެ އަގުބޮޑު ސެންޓެއް ޖަހައިގެން ނުކުތަސް މީގެ ކުރިން އެ ބޭފުޅުން ގައިން މާ މީރު ވަހެއް ނުދުވާ، އެއީ ޗަކަ ފެނުން ފެން ވަރަން ޖެހޭތީ، މިއަދު ވަރަށް ރީތި ސާފު ލޯބި ފެނުން ފެންވަރައިގެން އެ ތިބީ،"

މެންބަރު މުހައްމަދު ރާޝިދު

ރާޝިދު އެފަދައިން ވިދާޅުވުމުން ހުޅުދޫ ދާއިރާގެ މެމްބަރު އިލްޔާސް ލަބީބު ވަނީ ނިޒާމީ ނުކުތާ ނަންގަވައި ދިވެހި އަންހެން ކަނބަލުންނަށް ނިސްބަތް ކުރައްވައި އެހާ ބޭއަދަބީ ބަހެއް ބޭނުން ކުރުމަކީ މެންބަރުން ކޮށްގެން ނުވާނެ ކަމަށާ އެއީ ބަލައިގަނެވޭނެ ކަމެއް ނޫން ކަމަށެވެ.

އެއާއެކު މަޖިލީހުގެ ރައީސް މުހައްމަދު ނަޝީދު ވެސް ވަނީ އިލްޔާސްއާ އެއްބައިވެ އެއީ ބޭ އަދަބީ ކަމެއް ކަން ހަނދާން ކޮށްދެއްވައިފަ އެވެ.

"ރާއްޖޭގެ ރައްޔިތުންގެ އެއްވެސް ޖިންސެއްގެ ރައްޔިތުންނަށް ކުޑައިމީސް ވާ ގޮތަށް ވާހަކަ ދެއްކެވުމަކީ ބަލައިގަނެވޭނެ ކަމެއް ނޫން،" ނަޝީދު ވިދާޅުވި އެވެ.