އަންހެނުން ވިހާކަންވެސް އެނގުނީ ރައީސް ޞާލިހުގެ ސަރުކާރަށް: ސަނީފު
އަންހެނުންނަކީ ވިހާ ބައެއްކަންވެސް އެނގުނީ ހަމައެކަނި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ސަރުކާރަށްކަމަށް ރައްޔިތުންގެ މަޖިލީހުގެ ތިނަދޫ ދެކުނު ދާއިރާގެ މެމްބަރު އަބްދުالله ސަނީފު ވިދާޅުވެއްޖެ އެވެ.
މެމްބަރު ސަނީފު މިފަދައިން ވިދާޅުވެފައިވަނީ ރައީސް ޞާލިހުގެ ސަރުކާރުން އަންހެނުންގެ ހައްގުތައް ކަށަވަރުކޮށްދިނުމަށް އެކުލަވާލި ސިޔާސަތުތަކަށް ތައުރީފުކުރައްވާ މަޖިލީހުގައި ވާހަކަދައްކަވަމުން ނެވެ.
ސަނީފު ވިދާޅުވީ އަންހެނުން ބާރުވެރި ކުރުވާ، އަންހެނުންގެ ހައްގުތައް ރައްކާތެރިކޮށްދިނުމަށް އެންމެ ވަރުގަދަ ސިޔާސަތެއް އެކުލަވާލާފައިވަނީ ރައީސް ޞާލިހުގެ ސަރުކާރުން ކަމަށެވެ.
އެގޮތުން މި ސަރުކާރުން އަންހެނުންނަށް ޚާއްސަ ގޮނޑިތަކެއް ކައުންސިލްގައި ކަނޑައަޅާދީ، އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގައި ތިއްބަވާ ފަރާތްތަކަށް އިނާޔަތް ކަނޑައަޅުއްވާދީފައިވާކަން އޭނާ ފާހަގަކުރެއްވި އެވެ.
އެއާއެކު އޭނާ ވިދާޅުވީ ވިހެއުމާއި ގުޅިގެން އަންހެނުންނަށް 6 މަސް ދުވަހުގެ ޗުއްޓީއެއް ލިބޭނެ އިންތިޒާމުވެސް ހަމަޖައްސާދީފައި ވަނީ ރައީސް ޞާލިހުގެ ސަރުކާރުން ކަމަށެވެ.
މީގެ ކުރީ ސަރުކާރުތަކަށް، އަދި ވެރިކަން ކުރެއްވި ބޭފުޅުންނަށް އަންހެނުންނަކީ ވިހާ، އަދި ދަރިފުޅަށް ގާތުން ކިރުދޭން ޖެހޭ ބައެއްކަންވެސް އެނގިނުލައްވާކަމަށް ސަނީފު ވިދާޅުވި އެވެ.
"އަންހެނުން ވިހާކަން.. ދަރިން ވިހާކަން އެނގުނީ ކާކަށްތޯ؟ ކޮން ސަރުކާރަކަށްތޯ އެނގުނީ؟ މި ސަރުކާރަށް އިބްރާހިމް މުހައްމަދު ޞާލިހުގެ. އެއާ ގުޅިގެން 6 މަސް ދުވަހުގެ ޗުއްޓީ އެބޭފުޅުންނަށް. ގާތުން ދަރިއަށް ކިރުދޭން ޖެހޭކަން އެނގިގެން 6 މަސް ދުވަހުގެ ޗުއްޓީއެއް ދިނީ ކާކުތޯ؟ އިބްރާހިމް މުހައްމަދު ޞާލިހު ދިނީ. ދެވަނަ ދައުރެއް ދޭން ޖެހެނީ މި ސަބަބާ ހުރެ"
ތިނަދޫ ދެކުނު ދާއިރާގެ މެމްބަރު އަބްދުالله ސަނީފު
އެކަން ކަން ފާހަގަކުރައްވާ ސަނީފު ވިދާޅުވީ އަންހެނުންގެ ހައްގުތައް ކަށަވަރުކޮށްދިނުމަށް މި ސަރުކާރުން ކޮށްފައިވާ ކަންކަމަށް އެކަނި ބަލާލި ނަމަވެސް ރައީސް ޞާލިހަށް ދެވަނަ ދައުރެއް ދޭން ޖެހޭ ކަމަށެވެ.
އެމަނިކުފާނު އަންހެނުންގެ ހައްގުގައި ކުރައްވާ ބުރަ މަސައްކަތްޕުޅު ރާއްޖޭގެ އަންހެނުން ބަލައިގަންނަ ކަމަށާއި، އެ ފަރާތްތައް ތިބީ ރައީސް ޞާލިހު ދެވެނަ ދައުރަކަށް އިންތިޚާބުކުރަން ކެތްމަދުވެފައި ކަމަށް މެމްބަރު ސަނީފު ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
