ދިފާއުގައި ރާޝިދު ވިދާޅުވީ ސެންޓު ވަސް ދުވަން ފެށީ ގުއިފެނުން ފެންވެރުން ހުއްޓާލުމުން ކަމަށް!
ކިތަންމެ މީރުވަސް ދުވާ ސެންޓެއް ޖެހި ނަމަވެސް، މީގެ ކުރިން ރަށްފުށުގެ ކަނބަލުންގައިން މާ މީރުވަހެއް ނުދުވާ ކަމަށް ވިދާޅުވެ ކޮމަަންޑޫ ދާއިރާގެ މެންބަރު މުހައްމަދު ރާޝިދު ދެއްކެވި ވާހަކަތައް އޭނާ ދިފާއުކުރައްވައިފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަދައްކަވަމުން ރާޝިދު ވިދާޅުވީ މީގެ ކުރިން ކިތަންމެ އަގުބޮޑު ސެންޓެއް ޖެހިޔަސް ރަށްފުށުގެ އަންހެނުންގެ ގައިން މީގެ ކުރިން މީރުވަސް ނުދުވާކަމަށް ރާޝިދު ވިދާޅުވި އެވެ.
"އެ ބޭފުޅުން ކިތަންމެ އަގުބޮޑު ސެންޓެއް ޖަހައިގެން ނުކުތަސް މީގެ ކުރިން އެ ބޭފުޅުން ގައިން މާ މީރު ވަހެއް ނުދުވާ، އެއީ ޗަކަ ފެނުން ފެން ވަރަން ޖެހޭތީ، މިއަދު ވަރަށް ރީތި ސާފު ލޯބި ފެނުން ފެންވަރައިގެން އެ ތިބީ"
ކޮމަަންޑޫ ދާއިރާގެ މެންބަރު މުހައްމަދު ރާޝިދު
ރާޝިދުގެ އެ ވާހަކަތަކާއި ގުޅިގެން ސޯޝަލް މީޑިއާގައި އޭނާއަށް ބޮޑެތި ފާޑުކިޔުންތަކެއް ވަނީ އަމާޒުވެފަ އެވެ. އެގޮތުން އޭނާގެ އެ ވާހަކަތަކީ ރަށްފުށުގައި ދިރިއުޅޭ އަންހެނުންނަށް ކުޑައިމީސްވާ ބަސްތަކެއްކަމަށް ސޯޝަލް މީޑިއާގައި ޚިޔާލުފާޅުކުރަމުންދާ ފަރާތްތައް ދަނީ ބުނަމުން ނެވެ.
ސޯޝަލް މީޑިއާގައި ރާޝިދަށް ގިނަ ބައެއްގެ ފާޑުކިޔުން އަމާޒުވުމާއި ގުޅިގެން އޭނާ ވަނީ މަޖިލީހުގައި ދެއްކެވި ވާހަކަތައް ދިފާއު ކުރައްވާފަ އެވެ.
އެގޮތުން ރާޝިދު ކުރެއްވި ޓްވީޓެއްގައި ވިދާޅުވީ މީގެ ކުރިން ރަށްފުށުގެ އަންހެން ކަނބަލުންގެ ގައިން މީރުވަސް ނުދުވާކަމަށް ބުނީ، މީގެ ކުރިން އެމީހުން ތިބީ ނަޖިސް ފެނުން ފެންވަރައިގެން ކަމަށް ވާތީ ކަމަށެވެ. އަދި އެކަން ނިނުމަކަށް ގެނައީ މި ސަރުކާރުންކަން ބުނެދިނުމަށް ކަމަށެވެ.
"ޒަމާނުންސުރެ އަތޮޅުތެރޭ ރައްޔަތުން ބޭނުން ކުރަމުންދިޔަ ގުއި ފެނަށް ނިމުމެއްގެނެސް ސާފް ފެން ކަށަވަރު ކޮށްދެއްވީ މި ސަރުކާރުން. އެހެންކަމުން ސެންޓްގެ އަސްލުވަސް މިހާރު ދުވާ"
ކޮމަަންޑޫ ދާއިރާގެ މެންބަރު މުހައްމަދު ރާޝިދު
ރާޝިދު އެ މޭރުމުން ވާހަކަ ދެއްކެވީ މި ސަރުކާރުން ރަށްރަށުގައި އަޅަމުންދާ ފެނާއި ނަރުދަމާގެ މަޝްރޫއަށް ތައުރީފު ކުރުމުގެ ގޮތުންކަމަށް އޭނާ ވަނީ ސިފަކުރައްވާފަ އެވެ.
އެހެން ނަމަވެސް، ރާޝިދުގެ އެ ވާހަކަތަކާއި ގުޅިގެން ނުރުހުން ފާޅުކުރަމުންދާ މީހުން ބުނަމުންދަނީ ސަނާ ކިޔުމުގައިވެސް ހައްދެއް އޮންނަން ޖެހޭ ކަމަށެވެ. އަދި ރާޝިދުގެ އެ ވާހަކަތަކަށް މާފަށް އެދެން ޖެހޭކަމަށް ސޯޝަލް މީޑިއާގައި ޚިޔާލު ފާޅުކުރަމުންދާ ފަރާތްތައް ދަނީ ބުނަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
