ބިރު ފަހަނައަޅާ ގޮސްގެން ނޫނީ ދެން ޤައުމު ސަލާމަތެއް ނުކުރެވޭނެ: މުޙައްމަދު އިސްމާއިލް

ބިރު ފަހަނައަޅާ ގޮސްގެން ނޫނީ ދެން ޤަައުމު ސަލާމަތް ނުކުރެވޭނެކަމަށް އިދިކޮޅު ކޯލިޝަންގެ އެކްޝަން ޑިޕާޓުމަންޓުގެ ޗެއާ އަދި މަޖިލީހުގެ ހޯރަފުށީ ދާއިރާގެ ކުރީގެ މެމްބަރު މުޙައްމަދު އިސްމާއިލް ވިދާޅުވެއްޖެ އެވެ.

މުޙައްމަދު އިސްމާއިލް މިފަދައިން ވިދާޅުވެފައިވަނީ ރައީސް ޔާމީން މިނިވަންކުރުމަށް ގޮވާލާ އިދިކޮޅުން ކުރިއަށް ގެންދިޔަ މުޒާހަރާގައި ހައްޔަރުކުރި ފަރާތްތައް ދޫކޮށްލުމާއި ގުޅިގެން މީޑިއާއަށް ދެއްވި އިންޓަވިއުއެއްގަ އެވެ.

އެގޮތުން މުޙައްމަދު އިސްމާއިލް ވިދާޅުވީ މިހާރު ގައުމު މި އޮތް ހާލަތުން ނަގައިގަތުމަށް އާންމުން މަގުތަކަށް ނިކުންނަން ޖެހޭ ކަމަށެވެ. އަދި އިދިކޮޅުގެ މަސައްކަތާއި ގުޅެން ޖެހޭ ކަމަށެވެ.

މިއަދު މި މަސައްކަތް ނުކޮށްފިނަމަ ގައުމު އަނބުރާ ހޯދަން އުންދަގޫވާނެ ކަމަށާއި، ސަރުކާރުން ދައްކާ ބިރު ރައްޔިތުން ފަހަނައަޅާ ހާލަތު ބަދަލުކުރުމަށް ނިކުންނަން ޖެހޭ ވަގުތު ޖެހިއްޖެކަމަށް މުޙައްމަދު އިސްމާއިލް ވިދާޅުވި އެވެ.

"ދިވެހިރާއްޖޭގެ ތާރީހުގައި ޕީޕީއެމުން ހިންގާފައި އޮތް ހަރަކާތްތައް ބަލަންވީ. ދުވަހަކުވެސް ރައްޔިތެއްގެ މުދަލަކަށް، ދައުލަތުގެ މުދަލަކަށް، ރައްޔިތަކަށް އަނިޔާވެރިވާނެ އެއްވެސް ކަމެއް މުޒާހަރާތެރޭގައި ނުވަތަ ސުލްހަވެރިކަމާއެކު ހިންގާ ހަރަކާތްތަކުގައި ހިންގާފައެއް ނޯންނާނެ. އެހެން ނަމަވެސް ވަށާ ޕޮލިހުން ބައިތިއްބައިގެން މަގު ހިނގާލާ ރީތިކޮށް އަޑުއުފުލުމުގެ ފުރުސަތު ނުދީ ގެއްލިފަ މި އޮތީ. އެހެންވީމަ ކޮންމެ ރެއަކު އަޅުގަނޑުމެން މި ބާއްވާ މުޒާހަރާގައި ގައުމު ދެކެ ލޯބިވާ ގައުމުގެ މިނިވަންކަމާއި ސިޔާދަތު ދިފާއުކުރަން ބޭނުންވާ ރައްޔިތުން ތިބިކަން އެނަ އެނގޭ. އެ ރައްޔިތުން އަޅުގަނޑުމެންނާއި ބައިވެރިވާންވީ. ބައިވެރިވެގެން އެ ރައްޔިތަކަށް ލިބޭނެ ގެއްލުމެއް ނޯންނާނެ. އެ ބައިވެރިވާ ބޭފުޅުންގެ މުސްތަގުބަލާއި އެބޭފުޅުންގެ ދަރިންގެ މުސްތަގުބަލު ދިފާއުކުރުމަށްޓަކައި މިއަދު ނިކުމެ މި މަސައްކަތް ނުކޮށްފިނަމަ މިއަށްވުރެ މާ އަނދިރި ދުވަސްތަކަކަށް އަޅުގަނޑުމެން ވެއްޓިގެން ހިނގައިދާނެ"

އިދިކޮޅު ކޯލިޝަންގެ އެކްޝަން ޑިޕާޓުމަންޓުގެ ޗެއާ މުޙައްމަދު އިސްމާއިލް

ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމު މިނިވަންކުރުމަށް ގޮވާލާ އިދިކޮޅުން އަޑުއުފުލަމުންދަނީ އެމަނިކުފާނުގެ މައްޗަށް މިދިޔަ ޑިސެމްބަރު މަހު ކްރިމިނަލް ކޯޓުން އިއްވި ހުކުމަކީ "ހަރާން ހުކުމެއް" ކަމަށް ބުނަމުންނެވެ.

ރާއްޖޭގެ ޖުޑިޝަރީއަށް އޮތް ސިޔާސީ ނުޒޫފު ނައްތާލާ ދިވެހިން ބޭނުންވާ އަދުލު އިންސާފު ރާއްޖޭގައި ގާއިމްކުރުމަށް އެ ހުކުމާއި ދެކޮޅަށް އަޑުއުފުލަން ޖެހޭކަމަށް މުޙައްމަދު އިސްމާއިލް ވިދާޅުވިއެވެ.

އޭގެ އިތުރުން އޭނާ ވިދާޅުވީ ރައީސް ޔާމިނަކީ ސަރުކާރުން ހިންގާ ޖަރީމާތަކާއި ދެކޮޅަށް އަދި ރާއްޖޭގެ މިނިވަންކަން ދިފާއުކުރުމަށް ފާޅުގައި ވަކާލާތު ކުރައްވަން ކެރިވަޑައިގަންނަވާ ހަމައެކަނި ލީޑަރެވެ.

އެހެންކަމުން އެމަނިކުފާނަށް ރިޔާސީ އިންތިޚާބުގައި ވާދަކުރެވޭނެ ފުރުސަތު ހޯދައިދިނުމަށް ރައްޔިތުން މަސައްކަތް ކުރުމަކީ މިއަދު ރައްޔިތުންގެ ކޮނޑުގައި އެޅިފައިވާ ޒިންމާއެއްކަމަށް މުޙައްމަދު އިސްމާއިލް ވިދާޅުވިއެވެ. އަދި ވިދާޅުވީ، އެ ޒިންމާ އަދާކުރަން މިއަދު ރައްޔިތުން ފާޅުގައި ކެރިގެން ނިކުތުމަށް ގޮވާލައްވާ ކަމަށެވެ.