އެންމެ ފަހުން ޕީޕީއެމްގެ ޝިއާރު ވެސް ވަގަށް ނަގައިފި: ހީނާ
ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިހު, ޕީޕީއެމްގެ އަސާސީ ޤަވައިދުގައި ކަނޑައަޅާފައިވާ އެ ޕާޓީގެ ޝިއާރުވެސް ވަގަށް ބޭނުންކުރައްވަމުން ގެންދަވާކަމަށް އިދިކޮޅު އިއްތިހާދުގެ ތަރުޖަމާނު ހީނާ ވަލީދު ތުހުމަތުކުރައްވައިފި އެވެ.
ހީނާ މިފަދައިން ތުހުމަތުކުރައްވާފައި ވަނީ ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ގެ މެނޭޖިންގ ޑިރެކްޓަރ ގެ މަގާމުން ހުސެއިން އަމްރު ވަކިކުރެއްވުމަށް ރައީސް ޞާލިހު ނިންމެވި ނިންމެވުމަކީ ޤައުމީ ނިންމެވުމެއްކަމަށް ސިފަކުރައްވާ އެމަނިކުފާނުގެ ޕީއާރުޓީމުން ހަދާފައިވާ ޕޯސްޓަރެއްގައި ޕީޕީއެމްގެ ޝިއާރުކަމަށްވާ "އެންމެ ފުރަތަމަ ގައުމު" ބޭނުންކޮށްފައި ވުމުންނެވެ.
ރައީސް ޞާލިހުގެ އެ ޕޯސްޓަރު ޓްވީޓާގައި ހިއްސާކުރައްވާ ހީނާ ވިދާޅުވީ "އެންމެ ފުރަތަމަ ގައުމު" އެ ޝިއާރަކީ ޕީޕީއެމްގެ އަސާސީ ޤަވައިދުގައި ބަޔާންކޮށްފައިވާ އެ ޕާޓީގެ ރަސްމީ ޝިއާރުކަމަށެވެ.
ރައީސް ޞާލިހަށް އެކަން އެނގިނުލެއްވީތީ ހިތާމަކުރައްވާކަމަށާއި، ޕީޕީއެމްގެ ޝިއާރު ރައީސް ޞާލިހު ބޭނުންކުރެއްވުމަކީ އެ ޝިއާރު ވަގަށް ނެގުންކަމަށް ހީނާ ވިދާޅުވި އެވެ.
ހީނާ އިތުރަށް ވިދާޅުވީ މި ސަރުކާރުން ޕީޕީއެމްގެ ރައީސް ޔާމީންގެ ގިނަ މަޝްރޫއުތަކެއް އަމިއްލަކޮށް، އެ މަޝްރޫއުތަކުގެ ކްރެޑިޓް ނަގާފައިވާއިރު، އެންމެފަހުން ޕީޕީއެމްގެ އަސާސީ ގަވައިދުންވެސް ވައްކަންކުރަމުންދާ ކަމަށެވެ.
"އެންމެ ފުރަތަމަ ގައުމު އެއީ ޕީޕީއެމްގެ އަސާސީ ގަވައިދުގައިވެސް ބަޔާންވެފައިވާ ރަސްމީ ޝިއާރުކަން އިބްރާހީމަށް ނޭނގުމަކީ ދެރަކަމެއް. ޝިއާރުންވެސް ވައްކަން. ޕީޕީއެމްގެ ޕްރޮޖެކްޓުތަކުގެ ކްރެޑިޓް ނަގާފަ އެންމެފަހުން އަސާސީ ގަވައިދުންވެސް ވައްކަން"
އިދިކޮޅު އިއްތިހާދުގެ ތަރުޖަމާނު ހީނާ ވަލީދު
ރައީސް ޞާލިހު ޕްރޮމޯޓުކުރުމަށް ހަދާފައިވާ ޕޯސްޓަރުގައި ޕީޕީއެމްގެ އަސާސީ ގަވައިދުގައި ބުނާ އެ ޕާޓީގެ ޝިއާރުކަމަށްވާ "އެންމެ ފުރަތަމަ ޤައުމު" ބޭނުން ކުރުމާއި ގުޅިގެން ގިނަ ބައެއްގެ ފާޑުކިޔުންތައް ވަނީ އަމާޒުވެފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
