މީދޫ ވޮލީ ޓީމް ބަލިކޮށް ޓީމް ވޯރިއަރސް ފައިނަލަށް

ސަދަން ސްޕޯޓްސް އަންހެން ވޮލީބޯޅަ މުބާރާތުގެ ސެމީ ފައިނަލު މެޗުގައި މީދޫ ވޮލީ ޓީމް ބަލިކޮށް ޓީމް ވޯރިއަރސް ފައިނަލަށް ދަތުރުކޮއްފިއެވެ.

ރޭ ކުޅުނު ފޯރިގަދަ މެޗު، ޓީމް ވޯރިއަރސް އިން ކާމިޔާބު ކޮށްފައިވަނީ 2-3 ސެޓުންނެވެ. 2-1 ސެޓުން މީދޫ ވޮލީ ޓީމުން މޮޅުވަމުން ދަނިކޮށް ހަތަރުވަނަ ސެޓުން ޓީމް ވޯރިއަރސް ވަނީ ނަތީޖާ ބަދަލުކޮއް މެޗު ކާމިޔާބުކޮއްފައެވެ.

މި މެޗުގެ އެންމެ މޮޅު ކުޅުންތެރިއަކަށް ހޮވިފައިވަނީ ޓީމް ވޯރިއަރސްގެ ޖާރޒީ ނަންބަރ 7، ފާތިމަތު ނުސްރާ އެވެ.

ސަދަން ސްޕޯޓްސް އަންހެން ވޮލީބޯޅަ މުބާރާތުގެ ފައިނަލް މެޗުގައި ޓީމް ވޯރިއަރސް ބައްދަލު ކުރާނީ، މި މުބާރާތުގެ ފައިނަލުގެ ފުރަތަމަ ޖާގަ ކާމިޔާބުކޮށްފައިވާ މަރަދޫފޭދޫ ޓީމް އައިވީވައި އާ އެވެ. ޓީމް އައިވީވައި އިން ފައިނަލް ޖާގަ ހޯދާފައިވަނީ ލީގު ސްޓޭޖުގައި ކުޅުނު ހުރިހާ މެޗަކުން މޮޅުވެގެންނެވެ.

މި މުބާރާތުގެ ފައިނަލު މެޗު ކުޅުމަށް ހަމަޖެހިފައިވަނީ މިރޭ 08:30 ގައި ފޭދޫ ވޮލީ ކޯޓުގައި އެވެ.