ރައީސް ޔާމީން އައްޑޫއަށް ވަޑައިގެންފި

ކުރީގެ ރައީސް ޢަބްދުالله ޔާމީން އައްޑޫ ސިޓީއަށް ވަޑައިގެންފި އެވެ.

ރައީސް ޔާމީން އައްޑޫއަށް ވަޑައިގެންނެވީ އެމަނިކުފާނުގެ ޕީއެންއެފްގެ ހަރަކާތްތަކެއް ކުރިއަށް ގެންދިއުމަށެވެ.

އެމަނިކުފާނަށް މަރުހަބާ ދެންނެވުމަށް އެއާޕޯޓް ސަރަހައްދަށް ގިނަ ބަޔަކު ވަނީ ޖަމާވެފަ އެވެ. އެމަނިކުފާނު ވަނީ އެ ރައްޔިތުންނާއި ސަލާމް ކުރައްވާފަ އެވެ.

ޕީޕީއެމާއި ޕީއެންސީގެ އިސް ލީޑަރެއްގެ ގޮތުގައި ކުރީން ހުންނެވި ރައީސް ޔާމީން ޕީއެންއެފް ނަމުގައި އައު ޕާޓީއެއް އުފެއްދެވީ އުފެދުނު ހިޔާލުތަފާތުވުންތަކާއި ގުޅިގެން ޕީޕީއެމުން ވަކިވެވަޑައިގަތުމަށް ފަހު އެވެ.

ރައީސް ޔާމީން ވަނީ ކުރިއަށް އޮތް ރިޔާސީ އިންތިހާބުގައި ވާދަ ކުރައްވާނެ ކަމަށް ވިދާޅުވެފަ އެވެ. ނަމަވެސް އެމަނިކުފާނުގެ މައްޗަށް ކޯޓްގައި އަދިވެސް ޝަރީއަތެއް އެބަ ހިނގަ އެވެ.

އެންމެ ފަހުން އޮތް އިންތިހާބުން ވެސް ފުރުސަތު ގެއްލުނީ ހުކުމެއް އޮތުމުންނެވެ. ނަމަވެސް ކޯޓުން ވަނީ އެ ހުކުމް ބާތިލުކޮށްފަ އެވެ.