ވިއްސާރައިގައި އައްޑޫ ލިންކު ރޯޑުގެ ހާލަތު ގޯސްވެ، ޒަރޫރީ ބޭނުންތަކަށް މެނުވީ މަގަށް ނުނިކުތުމަށް އެދިއްޖެ
އައްޑޫ ސިޓީއަށް މިހާރު ކުރަމުންދާ ވިއްސާރައިގެ ސަބަބުން އައްޑޫ ލިންކް ރޯޑުގެ ހާލަތު އިތުރަށް ގޯސްވެ، ނުރައްކާތެރި ހާލަތަކަށް ގޮސްފައިވާތީ، ޒަރޫރީ ބޭނުންތަކަށް މެނުވީ އެ މަގުގައި އުޅަނދުފަހަރު ނުދުއްވުމަށް އައްޑޫ ސިޓީ ކައުންސިލުން އިލްތިމާސްކޮށްފިއެވެ
އައްޑޫ ސިޓީ ކައުންސިލުން ބުނީ، މެދުކެނޑުމެއްނެތި ވެހެމުންދާ ބޯވާރޭގެ ސަބަބުން ރަށުތެރޭގައި ފެންބޮޑުވެފައިވާތީ، ފެން ހިންދުމުގެ މަސައްކަތް ހުއްޓުމެއްނެތި ކުރިއަށްދާ ކަމަށެވެ. އެގޮތުން ފެން ހިންދުމަށްޓަކައި ޕަމްޕުތައް ބޭނުންކޮށްގެން އެކި ސަރަހައްދުތަކުގައި ހޮޅި އަޅާފައިވާތީ، މަގުތައް ބޭނުންކުރާ އެންމެހާ ފަރާތްތަކުން އެކަމަށް ސަމާލުވުމަށް ކައުންސިލުން ވަނީ އެދިފައެވެ.
މީގެއިތުރުން، މަގުތައް ބޭނުންކުރާ އެންމެހާ ރައްޔިތުންގެ ސަލާމަތާއި ރައްކާތެރިކަމަށްޓަކައި، ލިންކް ރޯޑާއި އެހެނިހެން މަގުތައް ބޭނުންކުރުމުގައި ފެންބޮޑުވެފައިވާ ސަރަޙައްދުތަކަށް ހާއްސަ ސަމާލުކަމެއް ދިނުމަށާއި، އުޅަނދުފަހަރުގެ ސްޕީޑް މަޑުކޮށްގެން ދުއްވުމަށް ވެސް ކައުންސިލުން ވަނީ އިލްތިމާސްކޮށްފައެވެ.
ރާއްޖޭގެ މޫސުމާ ބެހޭ ގައުމީ އިދާރާ (މެޓް އޮފީސް) އިން މުޅި ރާއްޖެއަށް ހުދު ސަމާލު ނެރެފައިވާއިރު، މިހާރު ކުރަމުންދާ ވިއްސާރައިގެ އެންމެ ބޮޑު އަސަރެއް ކުރަމުންދަނީ ރާއްޖޭގެ ދެކުނުގެ އަތޮޅުތަކަށެވެ. އަދި ކުރިއަށް އޮތް ވަގުތުތަކުގައި ވެސް ވިއްސާރަ ދެމިއޮންނާނެ ކަމަށް ލަފާކުރެވޭތީ، ރައްކާތެރިކަމުގެ ފިޔަވަޅުތައް އެޅުމަށް ކަމާބެހޭ އިދާރާތަކުން ވަނީ އިރުޝާދު ދީފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
