އިންޑިއާގެ އައު މަޖިލިސްކުރާ ގެ ހުޅުވާ ރަސްމިއްޔާތަށް ފާދިރީންނަށްވެސް ދައުވަތުދިން؛ ނުދިނީ އެގައުމުގެ ރައީސްއަށް

އިންޑިޔާގެ ރައްޔިތުންގެ މަޖިލީހުގެ އައުގެ ހުޅުވުމަށްބޭއްވި ރަސްމިއްޔާތަށް އެ ގައުމުގެ ހިންދޫ ފާދިރީންނަށްވެސް ދައުވަތު ދިންއިރު އެ ގައުމުގެ ރައީސް ދްރޫޕަދީ މުރްމޫ އަށް ދައުވަތު ނުދިނުމުން ގިނަ ބައެއްގެ ފާޑުކިޔުންތައް އަމާޒުވެއްޖެ އެވެ.

އިންޑިޔާގެ އައު މަޖިލިސްކުރާގެ ހުޅުވާފައިވަނީ މިއަދު އެކަމަށްޓަކައި ބޭއްވުނު ޚާއްސަ ރަސްމިއްޔާތެއްގައެވެ. ހިންދޫ ދީނުގެ އެކި އަޅުކަންތަކާއިއެކު މަޖިލިސް ކުރާގެ ހުޅުވީ އެ ގައުމުގެ ބޮޑުވަޒީރު ނަރެންދުރަ މޯދީ އެވެ.

ހިންދޫ ދީނުގެ ބޮޑެތި ގިނަ ފާދިރީންތަކަކަށް ދަޢުވަތު ދީގެން ކުރިއަށް ގެންދެވުނު އެ ރަސްމިއްޔާތު، މަޖިލީހުގެ އިދިކޮޅު 19 ޕާޓީގެ 100 އަށްވުރެ ގިނަ މެންބަރުން ވަނީ ބޮއިކޮޓް ކޮށްފަ އެވެ. އޭގެ ސަބަބެއް ކަމުގައި އެ މެންބަރުން ވިދާޅުވަނީ، އެ ގައުމުގެ ރަސްމީ އެފަދަ ތަންތަން ހުޅުވުންފަދަ ކަންކަމަކީ ރައީސުލްޖުމްހޫރިއްޔާގެ މަސްއޫލިއްޔަތެއް ކަމަށެވެ. އެހެންކަމުން، އެ އިމާރާތް މޯދީ ހުޅުވުމަކީ މަޖިލީހުގެ ގަވާއިދާއި، އެ ގައުމުގެ ގާނޫނު އަސާސީއާއި ވެސް ޚިލާފް ކަމެއް ކަމުގައި އެ މެންބަރުން ވަނީ ބުނެފައެވެ.

އަދި މޯދީގެ އެ ޢަމަލަކީ ޚުދުމުހުތާރު ޢަމަލެއް ކަމަށާ، "މަޖިލިސް ކުރާގެ ހުޅިވުމުގެ ރަސްމިއްޔާތުން ރައީސް މުރްމޫ އެކަހެރިކޮށް، މޯދީ އަމިއްލައަށް އެ އިމާރާތް ހުޅުވުމަކީ، ޑިމޮކްރަސީއަށްވެސް ކުރެވޭ މަލާމާތެއް ކަމަށްވާއިރު، ޑިމޮކްރަސީގެ ރޫހު، މަޖިލީހުން ބޭރުކުރުމުން، އައު އިމާރާތުގެ އެއްވެސް އަގެއް ނެތް" ކަމަށްވެސް އެ މެންބަރުން ނެރުނު ބަޔާނެއްގައި ވަނީ ބުނެފައެވެ.

އިދިކޮޅުގެ އެ ބަޔާނާއި ދެކޮޅަށް ބީޖޭޕީން ނެރުނު ބަޔާނެއްގައި ވަނީ އިދިކޮޅު ޕާޓީތަކުގެ އެ އަމަލަކީ މަޖިލިސް ގެ ހުޅުވުމުގެ ރަސްމިއްޔާތު ސިޔާސީ ކޮށްލުމަށް ހިންގުނު އަމަލެއްގެ ގޮތުގައި ސިފަ ކޮށްފައެވެ.

މީގެ އިތުރުންވެސް މަޖިލިސްކުރާގެ ހުޅުވުމުގެ އެ ރަސްމިއްޔާތާއި ގުޅޭ ގޮތުން އިދިކޮޅު އެންމެ ބޮޑު ޕާޓީ، ކޮންގްރެސްގެ މެންބަރު ސްޕްރިޔާ ސޫލް ވަނީ، އެފަދަ ބޮޑު ރަސްމިއްޔާތެއް އިދިކޮޅުގެ މެންބަރުންގެ ޣައިރު ހާޒިރުގައި ބޭއްވުމަކީ ޑިމޮކްރަސީ އާއި މުޅިން ޚިލާފް ކަމެއްގެ ގޮތުގައި ބުނެފައެވެ. އަދި އިދިކޮޅާއި ނުލައި އެ ރަސްމިއްޔާތު ފުރިހަމަވެސް ނުވާނެ ކަމަށް އޭނާ ވަނީ ބުނެފަ އެވެ.

މިރަސްމިއްޔާތުގައި ރައީސް ދްރޯޕަދީ މުރްމޫ ބައިވެރި ނުކުރި ސަބަބު ހާމަކޮށްފައި ނުވި ނަމަވެސް، އެކަމަނާ ބައިވެރި ނުކުރީ ހިންދޫ ދީނުގެ ދީނީ ސަބަބަކާއި ހުރެ ކަމަށް ތުހުމަތު ކުރެވެއެވެ. އެގޮތުން ދްރޯޕަދީ މުރްމޫ އަކީ ޝެޑިއުލްޑް ޓްރައިބް ކޮމިޔުނިޓީ ނުވަތަ ދަލިޓް ގްރޫޕް ބޭކަނބަލެއް ކަމަށް ވުމުން، ބައިވެރިނުކުރީ ކަމަށް ތުހުމަތު ކުރެވެއެވެ. ހިންދޫ ދީނުގެ މީހުން، މައިގަނޑު ހަތަރު ފަންތިއަށް ބެހިފައިވާއިރު، ދަލިތުންނަކީ ދެވަނައަށް އެންމެ ދަށް ފަންތީގެ މީހުންނެވެ. އެމީހުންނަކީ ވޯކިންގް ކްލާސްއަށް ނިސްބަތްވާ މީހުންކަމުން، އޭގެ މަތީ ދެފަންތީގައި ހިމެނޭ މީހުން ދެކެނީ އެއީ ވަރަށް ދަށު ދަރަޖައިގެ ބައެއްގެ ގޮތުގައެވެ. އަދި އެފަދަ ގުރޫޕަކުން އަންނަ މީހަކު މަތީ މަގާމެއް އަދާކުރި ނަމަވެސް އޭނާގެ އެ ލޭބަލް އަބަދުވެސް އިނދެއެވެ.

އެހެންކަމުން ދުރޯޕަދީ މުރްމޫ އަށްވެސް ހިންދޫ ފާދިރީން ހިމެނޭހެން ބޭއްވުނު މިރަސްމިއްޔާތަށް ދައުވަތު ނުދިނީ އެ ސަބަބާއި ހުރެ ކަމަށް ގިނަ ބަޔަކު އަންނަނީ ބުނަމުންނެވެ.

އައު މަޖިލިސްކުރާގެ ހުޅުވުމުގެ ރަސްމިއްޔާތަށް ރައީސް ދްރޫޕަދީ އަށް ދައުވަތު ނުދިން ނަމަވެސް، އޭނާގެ ހާއްސަ މެސެޖު، މަޖިލީހުގެ ޑެޕިއުޓީ ޗެއާޕާސަން ވަނީ ޖަލްސާގެ ތެރެއިން އިއްވާފައެވެ. އެ މެސުޖުގައި ރައީސް ވަނީ މޯދީ އަކީ މަޖިލީހުގެ އިތުބާރު ގެ ގޮތުގައި ސިފަކުރައްވާފައެވެ. އަދި މޯދީ އެ އިމާރާތް ހުޅުވުމަކީ ރައީސް ވަރަށް އުފާކުރައްވާ ކަމެއް ކަމުގައިވެސް ވިދާޅުވެފައިވެއެވެ.