އުޟުހިޔާ ކަތިލުމާއި، އުފާވެރި ޢާއިލީ ހަވީރަކާއިއެކު ދަނގެތީ 'ޢީދު އުފާ'ގެ ހަރަކާތްތައް ފެށިއްޖެ!

ބަރަކާތްތެރި އަޟުހާ ޢީދުގެ މަތިވެރިވެގެންވާ އަޅުކަމެއް ކަމުގައިވާ އުޟުހިޔާ ކަތިލުމާއި އެކު، އދ. ދަނގެތީ ޖަމިއްޔަތުލް ޤަލަމްގެ ޢީދު އުފާ ހަރަކާތްތައް ފެށިއްޖެއެވެ.

މިއަދު ހެނދުނު ދަނގެތީ އޯޕަން ސްޓޭޖް ސަރަހައްދުގައި،  ކުރިއަށް ދިޔަ މި ހަރަކާތުގައި، ފަސް ބަކަރި ވަނީ އުޟުހިޔާގެ ގޮތުގައި ކަތިލާފައެވެ. މިހަރަކާތް ބަލާލުމަށް ދަނގެތީގެ ކުދި ބޮޑު ގިނަ ބަޔަކު ވަނީ އެ ސަރަހައްދަށް ގޮސްފައެވެ.

މީގެ ކުރިން އަހަރު ތަކުގައިވެސް، ދަނގެތީ ގައި ތިބި ޢާއިލާ ތަކުގެ ތެރެއިން އުޟުހިޔާ ކަތިލަން ބޭނުންވާ ފަރާތްތަކަށް އެކަން މަގުފަހި ކޮށްދިނުމުގެ ގޮތުން އެކަން ކުރަން ބޭނުންވާ ފަރާތްތަކުން އުޟުހިޔާގެ ގޮތުގައި ކަތިލާ ބަކަރީގެ އަގު ދެއްކުމުން އެއްވެސް ފީ އަކާއި ނުލައި، އެ އުޟުހިޔާ ގެނެސްދީ، އެ ބަލަހައްޓައި، ކަތިލައި އަދި އޭގެ ބެހެނިވެރިންނަށް އެ ބެހުމުގެ ކަންތައް ޖަމިއްޔަތުލް ގަލަމުން ވަނީ ކޮށްދީފައެވެ.

އުޟުހިޔާ ކަތިލުމުގެ ހަރަކާތަށްފަހު، މިއަދު ހަވީރު އެ ރަށުގައި ވަނީ ޢާއިލީ ހަވީރެއް ބާއްވާފައެވެ. މި އާއިލީ ހަވީރަށް އައި ހުރިހާ ކުދިންނަށްވެސް ވަނީ ހަދިޔާ ދީފައެވެ.

މި ހަވީރުގައި އެކި ގްރޭޑްތަކުގެ ކުދިންނަށް ޚާއްސަކޮށްގެން ކުޅިވަރުތައް ކުރިއަށް ގެންގޮސްފައިވާއިރު, ކޮންމެ ގްރޭޑަކުންވެސް 1 ވަނަ ޓީމުގެ ހުރިހާ ކުދިންނަށް ހަދިޔާއެއްގެ ގޮތުގައި ކުޅޭ ތަކެތި ވަނީ ދީފައެވެ.

ކްލާސްތަކުގެ މެދުގައި ކުރިއަށް ދިޔަ ކުޅިވަރު ތަކުގެ އިތުރުން މިއަދުގެ އާއިލީ ހަވީރުގެ ތެރެއިން އެކި ގްރޭޑް ތަކުގެ ދަރިވަރުންގެ ފަރާތުން ސްޓޭޖް އައިޓަމްތައްވެސް ވަނީ ހުށަހަޅައިދީފައެވެ.

އެގޮތުން، މަދަހަ ކިޔުމާއި، ސްޓޭޖް ޑްރާމާ ފަދަ، ކުދިންގެ ހުނަރު ދައްކާލުމުގެ ހަރަކާތްތައް ސްޓޭޖްމަތިން ވަނީ ފެނިގެން ގޮސްފައެވެ.

ސްޓޭޖް ހަރަކާތްތަކާއި، ކުޅިވަރުތަކާއިއެކު، އާއިލީ ހަވީރުގައި ގިނަ ސްޓޯލްތަކުގައިވެސް ކުދިންނަށް ޚާއްސަ ތަފާތު އެކި ކުޅިވަރުތައް ވަނީ ކުރިއަށް ގެންގޮސްފައެވެ. އަދި ސްޓޯލް ތަކުގެ ކުޅިވަރު ތަކުގައި ބައިވެރިވެ، ފަސް ސްޓޯލް ގެ ކުޅިވަރުތައް ނިންމި ކުދިންނަށް އިނާމެއްގެ ގޮތުން ހަދިޔާ ވަނީ ދީފައެވެ.

ކުޅިވަރު އައިޓަމް ތަކުން ލިބުނު ހަދިޔާގެ އިތުރުން، ޢާއިލީ ހަވީރަށް ޒިޔާރަތްކުރި ކުދިންނާއި މީހުންގެ ތެރެއިން ގުރުއަތުން ނެގޭ ފަރާތްތަކަށް ބޮޑެތި އަގުހުރި އިނާމްތަކެއް މިއަދު ވަނީ ދީފައެވެ.

އެގޮތުން އެ ހަވީރަށް ދިޔަ ކުޑަކުދިންގެ ތެރެއިން ގުރުއަތުން ހޮވުނު ކުއްްޖާއަށް ބައިސްކަލެއް ލިބިފައިވާއިރު، ބޮޑެތި މީހުންގެ ތެރެއިން ގުރުއަތުން ހޮވުނު ފަރާތަށް ކައްކާ ތެލި ސެޓެއް ވަނީ ދީފައެވެ.

މީގެ އިތުރުންވެސް ސްޓެލްކޯގެ ފަރާތުން ވަނީ އެ ހަވީރަށް ދިޔަ ކުދިންގެ ތެރެއިން ގުރުއަތުން ހޮވުނު ކުދިންނަށް ފައިސާގެ އިނާމް ދީފައެވެ.

ޢާއިލީ ހަވީރަށްފަހު މިރޭ ބޮޑުމަސް ޝޯއެއްވެސް ވަނީ ކުރިއަށް ގެންގޮސްފަ އެވެ.

މީގެ އިތުރުން މާދަމާ، މަސް ރޭހާއި، ޢާއިލީ ހަވީރުގެ ދެވަނަ ބައި، އިސްރަށްވެހިންގެ ހަވީރާއިއެކު ކުރިއަށް ގެންދިޔުމަށް ހަމަޖެހިފައިވާ ކަމަށް ޖަމިއްޔަތުލް ގަލަމުން މައުލޫމާތު ދެއެވެ. އަދި މާދަން ރޭ، ކަނބަލުންނަށް ޚާއްސަ ކެއްކުމުގެ މުބާރާތް، ރަނިރަހަގެ ފުރަތަަމަ ރައުންޑާއި، މަސްރޭހުން ވަނަވަނައަށް އައި ފަރާތްތަކަށް ފައިސާގެ އިނާމް ދިނުން ކުރިއަށް ގެންދިޔުމަށް ހަމަޖެހިފައިވާ ކަމަށްވެސް އެ ޖަމިއްޔާއިން ބުނެއެވެ. ހަމަ އެހެންމެ، އޭގެ އަނެއް ދުވަހުގެ ރޭ ވާދެމުގެ މުބާރާތެއް ބާއްވާއިރު، އީދު އުފާ ހަރަކާތްތައް ނިންމާލާ ރޭގައި ރައްޔިތުންގެ ބާބަކިޔު އަކާއިއެކު، ރަނިރަހަގެ ފައިނަލް ރައުންޑް ބާއްވާނެ ކަމަށް ޖަމިއްޔަތުލް ޤަލަމުން މައުލޫމާތު ދެއެވެ.

ދީނީ ހަމަތަކާއި އުސޫލުތަކާއި އެއްގޮތަށް ޢީދު ފާހަގަކޮށް އެންމެން އެ އުފަލުގައި ބައިވެރިކުރުވުމުގެ މަގުސަދުގައި ދަނގެތީ ޖަމިއްޔަތުލް ޤަލަމުން އިސްނަގައިގެން އެ ރަށު، މަސައްކަތްތެރިންގެ ޖަމިއްޔާއާއި، ޖަމިއްޔަތުލް އަންވާރާއި، ސްޓެލްކޯ އާއި, އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ އިތުރުން ދަނގެތީ ޔޫތު ސެންޓަރާއި ފުލުހުންނާއި ގުޅިގެން މި ޢީދުގައި ކުރިއަށް ގެންދާ ހަރަކާތްތަކުގެ މެއިން ސްޕޮންސަރަކީ ބީއެމްއެލް އިސްލާމިކް އެވެ. އަދި މެޖޯ ސްޕޮންސަރުންގެ ތެރޭގައި، ކޮންޕަސް ބީޗް އެންޑް ބިސްޓްރޯ ކެފޭ އާއި، އެޓޯލް ރެސިޑެންސް ގެސްޓް ހައުސް އާއި، އެންދެރި އެކްސްޕްރެސް، މާހިޔާ، ދިރާގު، ސްޓެލްކޯ, އާސްމާން ޕޮއިންޓް އަދި ޖަމިއްޔަތުއް ސަލަފް ހިމެނެއެވެ.

މީގެ އިތުރުން ގިނަ ކޯ ސްޕޮންސަރުންގެ އެހީއާއި އެކު ކުރިއަށް ގެންދާ މިފަހަރުގެ ޢީދު ހަރަކާތްތަކުގައި މޫސާ ޝިފާއު އާއި ޕްރެޒެންޓަރު އަހުމަދު ހަމީދު އާދަމް ވަނީ ބައިވެރިވެފަ އެވެ.