ބޮޑު ޕޮލިސް އެކަޑަމީ ހުންނަ އައްޑޫގައި ކުށް ގިނަވެ، ރައްޔިތުން ބިރުވެރިކަމެއްގައި!

ބޮޑު ޕޮލިސް އެކަޑަމީއެއް ސަރުކާރުން ހުޅުވާފައި ހުރި ނަމަވެސް އައްޑޫ ސިޓީގައި ކުށްކުރާ މިންވަރު ދުވަހެއްް ދުވަހަކަށް އިތުރުވަމުންދާތީ ރައްޔިތުން ކަންބޮޑުވުން ފާޅުކުރަންފަށައިފިއެވެ.

މިފަހަކަށް އައިސް އައްޑޫގައި ވައްކަމާއި، މާރާމާރީގެ އިތުރުން މަސްތުވާތަކެތީގެ މައްސަލަތައްވެސް އިންތިހާއަށް ވަނީ އިތުރުވެފައެވެ. ވަކިން ޚާއްސަކޮށް ވައްކަމުގެ މައްސަލަތައް ކޮންމެ ރެއަކުހެން ކުރިމަތިވަމުންދާއިރު އެފަދަ އަމަލުތައް ހިންގާ މީހުންނާއިމެދު ފުލުހުން އެއްވެސް ފިޔަވަޅެއް ނާޅާކަމުގެ ޝަކުވާވެސް އާއްމުން އަންނަނީ ކުރަމުންނެވެ.

އެގޮތުން އެފަދަ މައްސަލައެއް ކުރިމަތިވި ފަރާތެއް ކޮށްފައިވާ ޓުވީޓެއްގައި އޭނާ ވަނީ އިއްޔެ ރޭ ބަޔަކު އެ ގެއަށް ވަދެ ވައްކަންކޮށްފައިވާ ކަމަށާއި އެކަމަކީ އައްޑޫގައި އާންމު ކަމަކަށް ވެފައިވާ ކަމަށް ބުނެފައެވެ. އަދި ވައްކަންކުރަނީ ކޮން ބައެއްކަން ފުލުހުނަށް އެނގޭއިރު ފިޔަވަޅު ނޭޅެންވީ ކީއްވެތޯ އޭނާ ސުވާލު އުފެއްދި އެވެ.

https://twitter.com/d3b4g/status/1563577656980869120?t=oXbFQlIbX4ZxbP_JoENQFQ&s=19

އޭނާގެ އެ ޓުވީޓާއިއެކު ވަނީ، އިތުރު އެތައް ބަޔަކަށްވެސް ކުރިމަތިވެފައި ވައްކަމުގެ އެފަދަ މައްސަލަތަކާއި ގުޅޭގޮތުން އެފަރާތްތަކުން ހިއްސާ ކޮށްފައިވާ ވާހަކަތަކުގެ ސްކްރީން ޝޮޓްތައް ޓުވީޓް ކޮށްފައެވެ.

https://twitter.com/d3b4g/status/1563579726131634178?t=eAEDFVWrvdfClxElAtJluw&s=19

މާލެ އަށްފަހު އާބާދީގެ ގޮތުން އެންމެ ބޮޑު އެއް ރަށް ކަމަށްވާ އައްޑޫގައި ރައްޔިތުންގެ އަގު ބޮޑު މުދާ ވަގަށް ނަގައި، ދަނޑުތަކަށް ވަދެ އެތަންތަނުންވެސް ވައްކަން ކޮށް، މީސްމީހުންގެ ލެޕްޓޮޕާއި އޭސީތަކާއި ގޭތަކުގައި ހުންނަ ތެލިތައް ވެސް ވަގަށް ނަގަމުންދާކަަމަށް އެ ސިޓީގެ ރައްޔިތުން އަންނަނީ ބުނަމުންނެވެ.

މިފަދަ އެތައް ކަމެއް އައްޑޫގައި ހިނގަމުންދާއިރު، ދާދިފަހުން އައްޑޫގައި ހުޅުވާފައި ހުރި ބޮޑު ޕޮލިސް އެކަޑަމީއެއްވެސް އެ ސިޓީގައި ހުރެއެވެ. އެތަނުގަޔާއި ، ސްޓޭޝަންތަކުގައިވެސް އެތައް  ފުލުހުންނެއް މަސައްކަތް ކުރަމުންދާއިރު، އައްޑޫގައި ހިންގަމުންދާ ކުށްތައް މަދުކުރުމަށް، މަސައްކަތް ކުރެވޭތަން ނުފެންނަ ކަމަށް ގިނަ ބަޔަކު ބުނެއެވެ.