އަސާސީ ޚިދުމަތްތައް އަތްނުފޯރާ ހިސާބަށްގޮސް، ގައުމު މިވަނީ އަނދަވަޅަކަށް ވެއްޓިފައި: ގާސިމް

އަސާސީ ޚިދުމަތްތަކުގެ އަގު، އަތްނުފޯރާ ހިސާބަށް ގޮސް، ދިވެހި ގައުމު އަނދަވަޅަކަށް ވެއްޓިގެން ގޮސްފައިވާ ކަމަށް ޖުމްހޫރީ ޕާޓީގެ ލީޑަރު އަދި ރިޔާސީ ކެންޑިޑޭޓް ގާސިމް އިބްރާހިމް ވިދާޅުވެއްޖެއެވެ.

ރިޔާސީ ކެންޕެއިނަށް އަރިއަތޮޅަށް ކުރައްވަމުންދާ ދަތުރުފުޅުގައި އއ. މާޅޮހުގެ ރައްޔިތުންނާއި ގާސިމް ބައްދަލު ކުރައްވާފައި ވާއިރު، އެ ބައްދަލުވުން ފެއްޓެވުމުގެ ކުރިން ރައްޔިތުންގެ ހާއްޞަ މަޖިލީހުގެ ކުރީގެ މެންބަރު މާޅޮހު މަޖުދީ ނިޔާވުމާއި ގުޅިގެން ހަމަހިމޭން ކަމުގެ ސްކޫތެއް ވަނީ ގެންނަވާފައެވެ.

އަދި ގާސިމް އިބްރާހިމް ވަނީ މަރްޙޫމު މަޖުދީގެ ހިދްމަތްތަކުގެ ޒިކްރާއާކުރައްވާ މަޖުދީގެ ފުރާނަފުޅަށް ރަހްމަތްލެއްވުން އެދި ދުއާކުރައްވާ އާއިލާއަށް ތައުޒިޔާ ދަންނަވާފައެވެ.

މާޅޮހުގެ ރައްޔިތުންނާ ބައްދަލުކުރައްވާ ގާސިމް އިބްރާހިމް ވިދާޅުވީ ގައުމުގެ މިއަދުގެ ހާލަތަށް ބަލާއިރު އެންމެ އަސާސީ ހިދްމަތްތަކުގެ އަގުވަނީ ރައްޔިތުން އަތްނުފޯރާ މިންވަރަށް އުފުލިފަ ކަމަށާއި އިޤްތީޞާދު ހީނަރުވެ ދަރަނި ބޮޑުވެ ގައުމުވަނީ އަދަވަޅަކަށް ވެއްޓިފައެވެ.

އެހެންކަމުން، ގާސިމް ވިދާޅުވީ މިއީ ރައްޔިތުން ތެދުވެ މިއަދަވަޅުން އަރާގަތުމަށް މަސައްކަތްފަށަންޖެހޭ ދަނޑިވަޅުކަމަށާއި އެކަން ކާމިޔާބުވާން އޮތީ އިޚުލާސްތެރި ވެރިއެއްގެ އަތުގައި ހިފައިގެން ކަމަށެވެ.

ގާސިމް ވިދާޅުވީ މިސަރުކާރުން ހެލްތު ސެކްޓަރ މުވައްޒަފުންގެ މުސާރަ ބޮޑުކުރި ގޮތް ބަޔަކު ހީހީ ބަލިވާނެ ކަމެއްކަމަށާއި ބޮޑު މުސާރަ ލިބޭ މަގާމްތައް ކަމަށް ބުނި މަގާމްތަކުގައި މީހަކު ނެތް ކަމަށެވެ. ގާސިމް ވިދާޅުވީ ވެރިކަންކުރުމުގެ ފާލުން ނެއްޓި ހޫރެންފެށީމާ އަގުރުއަލިފާނަށް ވެއްޓެންދެން ބަލަން ނުތިބެވޭނެ ކަމަށެވެ.

ގާސިމް ވިދާޅުވީ ރައްޔިތުންނަށް ވަރަށް ފުރިހަމަ މެނިފެސްޓޯއެއް ހުށަހަޅާފައިވާނެ ކަމަށާއި އޭގެ އިތުރުން ކޮންމެ ރަށަކަށްވެސް އެރަށެއްގެ ރައްޔިތުން އެދޭ އެންމެ މުހިންމު 5 ކަމެއް އެމަނިކުފާނުގެ ވެރިކަމެއްގައި ކޮށްދެއްވާނެ ކަމަށެވެ.