އަޅުގަނޑުގެ ވެރިކަމެއްގައި މިހާތަނަށް ދޫކޮށްފައިވާ އެސްއެމްއީ ލޯންތައް މައާފްކޮށްދޭނަށް: ގާސިމް

ޖުމްހޫރީ ޕާޓީގެ ލީޑަރު އަދި ރިޔާސީ ކެންޑިޑޭޓް ގާސިމް އިބްރާހިމްގެ ވެރިކަމެއްގައި މިހާތަނަށް ދޫކޮށްފައިވާ އެސްއެމްއީ ލޯންތައް މައާފްކޮށްދެއްވާނެ ކަމަށް ވިދާޅުވެއްޖެ އެވެ.

އއ.މަތިވެރީގައި މިއަދު ބޭއްވި ކެންޕެއިން ބައްދަލުވުމުގައި ވާހަކަދައްކަމުން ގާސިމް ވަނީ މިސަރުކާރުން އިންޑިއާ އާއި އެކު ބާއްވަމުންދާ ގުޅުމަށް ވަރަށް ބޮޑަށް ފާޑުވިދާޅުވެފައެވެ. އެގޮތުން ވިދާޅުވީ މިވެރިކަމުން ވަނީ ގާނޫނުއަސާސީ ޚިލާފް އެތައް ކަމެއް ކުރައްވާފައި ކަމަށާއި ދީނާ ގައުމިއްޔަތާއި އިސްތިގްލާލުވަނީ ނުރައްކަލުގެ ތެރެއަށް ވައްޓާލާފައި ކަމަށެވެ.

އޭގެ ތަފްސީލަށް ވަޑައިގަންނަވަމުން ގާސިމް ވިދާޅުވީ، އިންޑިޔާ ސަރުކާރުން، އެގައުމުގައި ދިރިއުޅޭ މުސްލިމުންނަތައް އެތަކެއް އަނިޔާ ތައް ވަމުންދާއިރުވެސް އަދުގެ ސަރުކާރުން އެ ގައުމާއި އިންތިހާއަށް ގާތް ގުޅުމެއް ބާއްވަމުންދާ ކަމަށެވެ. އެގޮތުން ރާއްޖޭގައި އިންޑިޔާ ސިފައިން ތިބި މައްސަލަ އާއި، ދިވެހިރާއްޖެއިން އިންޑިއާ އިން އެތައް ބިލިއަން ޑޮލަރުގެ ލޯނު ނަގަމުންދާ ދިޔުން ފާހަގަކުރައްވައި ގާސިމް ވަނީ އެކަމާ ކަންބޮޑުވުން ފާޅުކުރައްވާފައެވެ. ގާސިމް ވިދާޅުވީ އެ ލޯނުތައް ނުދެއްކިއްޖެނަމަ ކޮންމެ ފަދަ ބޮޑު ކަމެއްވެސް ކުރަން ރާއްޖެއަށް ޖެހިދާނެ ކަމަށެވެ.

ގާސިމް ވިދާޅުވީ ވެރިކަމުގައި ތިބި ބަޔަކު ރައްޔިތުންނަށް ޚިޔާނާތްތެރިވުމަކީ ރައްޔިތުންނަށް ލިބޭނެ އެންމެ ބޮޑު ނިކަމެތިކަން ކަމަށެވެ. އަދި ތާރީޚުންވެސް ސާބިތުކޮށްދެނީ ބޭރުމީހުންނާއި ގުޅިގެން ގައުމަށް ގައްދާރުވާ ފަރާތްތަކުގެ ސަބަބުން ގައުމަށް ލިބުނު ނިކަމެތިކަން ކަމަށް އެމަނިކުފާނު ވިދާޅުވި އެވެ.

ގާސިމް އިތުރަށް ވިދާޅުވީ މި ސަރުކާރުން، އަމިއްލަ ބޭނުމުގަޔާއި، އެނޫންވެސް މަގުސަދެއްގައި ރައްޔިތުންނަށް އެކި ނަންނަމުގައި ލޯނުތައް ދެމުންދާ ކަމަށާ، އެމަނިކުފާނުގެ ވެރިކަމެއްގައި އެ ގޮތުން ދޫކޮށްފައިވާ އެސްއެމްއީ ލޯނުތައް މަޢާފު ކޮށްދެއްވާނެ ކަމަށެވެ.

"ލޯނުތައް ދެއްކުމުގެ ގާބިލްކަން ރައްޔިތުންގެ ކިބައިގަ މިއަދު ނެތް. މިކަމުގެ ބޭނުމަކީ ވޯޓު ހޯދުން. އަޅުގަނޑުގެ ސަރުކާރެއްގައި ސަރުކާރުތަކުން ދީފައި ހުރި ހުރިހާ އެސްއެމްއީ ލޯނެއް މާޢާފުކޮށްދޭނަން. ހެޔޮ ދެ ބިލިއަން ނުވަތަ ތިން ބިލިއަންގެ ލޯނެއް ނަގާފަ ހުއްޓަސް. ހަމަ އެދުވަހުން ފެށިގެން މަޢާފުކޮށްދޭނަން. ހުރިހާ ބޭފުޅުންގެ ލޯނެއް ޒީރޯ. އެއީ، އެއްވެސް ހަމައެއް ލަމައެއް ނެތި މިކަން ކުރަމުން ގެންދަނީ. ސަރުކާރުން ބޭނުންވާ ޕޮލިޓިކަލް އެޖެންޑާއެއް ހާސިލްކުރުމަށްޓަކައި ވަރަށް އިންސާފެއްނެތި އެކަން ކުރާތީ."

ގާސިމް އިބްރާހިމް

ގާސިމް ވިދާޅުވީ، ގައުމަށް އިޤްތިޞާދީ ބޮޑު ބަދަލުތަކެއް ބޭނުންވާ ކަމަށާއި ކުދި ވިޔަފާރިތަކުގެ ދިރުން އިތުރު ކުރަންޖެހޭ ކަމަށެވެ.

"އިގްތިޞާދަށް ދިރުންގެނުވާ ސަރުކާރުން ގެންގުޅޭ ވިޔަފާރިތަކަށް ދަތިކުރާ އުޞޫލުތައް ނައްތާލާނަށް" ގާސިމް ވިދާޅުވިއެވެ.

ގާސިމް ވަނީ، ރިޔާސީ އިންތިހާބުގައި ވޯޓުލާއިރު، ގައުމުގެ މިނިވަންކަމާއި، ގައުމާއި މެދު ވިސްނެވުމަށްފަހު، ގައުމަށް އެންމެ ޚިދުމަތްތެރި ކެންޑިޑޭޓަށް ވޯޓު ދެއްވުމަށް އެދިވަޑައިގެންފައެވެ.