ޤާސިމަކީ ރައްޔިތުންގެ މުދަލާއި ފައިސާ އަމާނާތްތެރިކަމާއެކު ބަލަހައްޓައިދޭނެ މީހެއް: ޑރ ވަހީދު

ޖުމްހޫރީ ޕާޓީގެ ލީޑަރު އަދި އެ ޕާޓީގެ ރިޔާސީ ކެންޑިޑޭޓު ޤާސިމް އިބްރާހިމަކީ ރައްޔިތުންގެ މުދަލާއި ފައިސާ، އަމާނާތްތެރިކަމާއެކު ބަލަހައްޓައިދެއްވާނެ ފަރާތެއް ކަމަށް ކުރީގެ ރައީސް ޑރ މުހައްމަދު ވަހީދު ހަސަން މަނިކު ވިދާޅުވެއްޖެ އެވެ.

އެމަނިކުފާނު މިފަދައިން ވިދާޅުވެފައި ވަނީ އއ ތޮއްޑޫގައި ބޭއްވި ޤާސިމް އިބްރާހިމްގެ ރިޔާސީ ކެމްޕޭނު ޖަލްސާގައި ވާހަކަދައްކަވަމުން ނެވެ.

އެގޮތުން ޑރ ވަހީދު ވިދާޅުވީ ރައްޔިތުންނަށް ބޭނުންވާ ކަންކަން ފުރިހަމަކޮށްދީ، ގައުމަށް ހެޔޮ ބަދަލު ގެނެސްދިނުމަށް ޤާސިމް އިބްރާހިމް އިސްލާހީ މަސައްކަތްޕުޅު ކުރައްވަމުން ގެންދަވާތާ ގާތްގަނޑަކަށް 50 އަހަރު ވެއްޖެ ކަމަށެވެ.

އެ މުއްދަތުގެ ތެރޭގައި ސިޔާސީ މައިދާނުގައި ހަރަކާތްތެރިވެ ކުރެއްވި ބުރަ މަސައްކަތްޕުޅުތަކުގެ އިތުރުން ދައުލަތުގެ ޒިންމާދާރު މަގާމުތައް ވެސް ޤާސިމް ފުރުއްވާފައިވާކަމަށް ޑރ ވަހީދު ވިދާޅުވި އެވެ.

އެކަން ފާހަގަކުރައްވާ ޑރ ވަހީދު ވިދާޅުވީ މިއަދު ގައުމަށް އެންމެ ބޭނުންވަނީ އެންމެ ތައުލީމީ، ނުވަތަ އެންމެ ޒުވާން ރައީސެއް ނޫން ކަމަށެވެ. އަދި ގައުމަށް ބޭނުންވަނީ ރައްޔިތުންގެ މުދަލާއި ފައިސާ އަމާނާތްތެރިކަމާއެކު ބަލަހައްޓާދެއްވާނެ ފަދަ ބޭފުޅެއް ކަމަށާއި، ޤާސިމް އިބްރާހިމަކީ އެފަދަ ބޭފުޅެއްކަމަށް ޑރ ވަހީދު ވިދާޅުވި އެވެ.

"މިއަދު އަޅުގަނޑުމެންނަށް ބޭނުންވަނީ އެންމެ މަތީ ތައުލީމު ހާސިލްކޮށްފައި ހުރި މީހާއެއް ނޫން. އެންމެ އާ މީހެއް ވެސް ނޫން. އެންމެ ޒުވާން މީހެއް ވެސް ނޫން. އަޅުގަނޑުމެންނަށް ބޭނުންވަނީ އަޅުގަނޑުމެންގެ އަޅުގަނޑުމެންގެ މުދާ، އަޅުގަނޑުމެންގެ ފައިސާ އަމާނާތްތެރިކަމާއި އެކީގައި ބަލަހައްޓައިދޭނެ މީހަކު ބޭނުނަވަނީ. ބޮޑެތި ދަރަނިތަކުން ސަލާމަތްކޮށްދޭނެ މީހަކު ބޭނުންވަނީ. އެއީ ޤާސިމް ފަދަ ބޭފުޅެއް"

ޑރ މުހައްމަދު ވަހީދު ހަސަން މަނިކު

ޑރ ވަހީދު ވިދާޅުވީ އެމަނިކުފާނަކީ ކުރު މުއްދަތަކަށް ނަމަވެސް ދިވެހިރާއްޖޭގައި ވެރިކަން ކުރެއްވި ބޭފުޅެއް ކަމަށެވެ. އެހެންކަމުން ވެރިކަމަށް ގެންނަން ޖެހޭ މީހެއްގެ ކިބައިގައި ހުންނަންޖެހޭ ސިފަތަކާއި، އެމީހެއްގެ ކިބައިގަން ހުންނަން ޖެހޭ ގާބިލުކަން އެނގިވަޑައިގަންންވާކަމަށް ވިދާޅުވި އެވެ.

އެގޮތުން އެހެން ބަލާނަމަ ޤާސިމް އިބްރާހިމަކީ ވެރިކަމަށް ގެނައުމަށް ކުފޫ ހަމަވާ ބޭފުޅެއް ކަމަށާއި، އެމަނިކުފާނަކީ ގައުމު މިއަދު އޮތް ހާލަތުން ނަގާ ކޮޅަށް ޖެއްސެވޭނެވަރުގެ ގާބިލުކަން ހުރި ބޭފުޅެއްކަމަށް ޑރ ވަހީދު ވިދާޅުވި އެވެ. އަދި ވިދާޅުވީ އެމަނިކުފާނު ޤާސިމްގެ އަރިހުގައި މަސައްކަތްޕުޅު ކުރައްވަން ނިންމެވީ ވެސް ގައުމު މިހާރު މިއޮތް ހާލަތުން ނަގާ ކޮޅަށް ޖެއްސެވޭނެ ހަމައެކަނި ލީޑަރަކީ ޤާސިމް ކަމަށް ވެފައި ޤާސިމަކީ ރާއްޖޭގެ މިނިވަންކަމާއި އިސްތިގުލާލަށް ވަފާތެރި ބޭފުޅަކަށް ވާނެތީކަމަށް ޑރ ވަހީދު ވިދާޅުވި އެވެ.