އާރްޓީއެލް ފެރީން ބައިލައްކަ އަށްވުރެ ގިނަ މީހުން ދަތުރުކޮށްފި
ރާއްޖެ ޓްރާންސްޕޯޓް ލިންކް (އާރްޓީއެލް) ފެރީން މިހާތަނަށް ބައިލައްކައަށް ވުރެ ގިނަ މީހުން ދަތުރުކޮށްފައިވާ ކަމަށް ޕްލޭނިން މިނިސްޓަރު މުހައްމަދު އަސްލަމް ވިދާޅުވެއްޖެ އެވެ.
ރާއްޖެ ޓްރާންސްޕޯޓް ލިންކުގެ ޒޯން 1 ގެ ޚިދުމަތް ރަސްމީކޮށް އިފްތިތާޙްކުރުމަށް، "ބޮޑުތިލަދުންމަތި ގުޅާލުން" މިނަމުގައި މިރޭ، ހއ. ދިއްދޫ ބަނދަރު ސަރަހައްދުގައި ބޭއްވި ޖަލްސާގައި ވާހަކަދައްކަމުން އަސްލަމް ވިދާޅުވީ، އާރްޓީއެލް ފެރީގެ ޒޯން އެކެއްގައި ހިމެނޭ 41 ރަށުން މިހާތަނަށް 56،238 މީހުން މި ޚިދުމަތް ބޭނުންކޮށްފައިވާ ކަމަށެވެ.
އަސްލަމް ވިދާޅުވީ ހައިސްޕީޑް ފެރީގެ ނިޒާމުން ރާއްޖޭގެ ރަށްތައް ގުޅާލުމަކީ ކުރެވޭނެ ކަމެއް ނޫން ކަމަށް އަބަދުވެސް މީހުން ބުނަމުންދިޔަ ކަމަށާއި އެކަމަކީ ޚަރަދު ބޮޑު ކަމެއް ކަމަށްވެސް ބުނަމުން ދިޔަ ކަމަށެވެ. އެހެން ނަމަވެސް މިކަން ކުރެވޭނެ ކަމުގެ ޔަގީންކަން ސަރުކާރަށް އޮތް ކަން އަސްލަމް ފާހަގަ ކުރެއްވިއެވެ.
"އަބަދުވެސް މީހުން ބުނަމުން ގެންދޭ، ތިއީ ކުރެވޭ ވަރުގެ ކަމެއް ނޫނޭ، މާ ހަރަދު ބޮޑު ކަމެކޭ، މީހުން ދަތުރަކަށް ނާރާނޭ، އެހެން ނަމަވެސް އަޅުގަނޑުމެންނަށް ޔަގީންކަން އޮތޭ މީހުން ދަތުރަށް އަރާނެކަންވެސް،" އަސްލަމް ވިދާޅުވިއެވެ.
އަސްލަމް ވިދާޅުވީ ޕަބްލިކް ޓްރާންސްޕޯޓް ހިދުމަތް ދިނުމަށް ދުނިޔޭގެ ހުރިހާ ގައުމެއްގައިވެސް ބޮޑު ހަރަދެއް ކޮށްފައިވާ ކަމަށާއި އެކަމަކީ ސަރުކާރުން ބޮޑު ހަރަދެއް ނުކޮށް ކުރެވޭނެ ކަމެއް ނޫން ކަމަށްވެސް އަސްލަމް ވިދާޅުވިއެވެ/ އަދި އެކަން ވަޒަން ކުރާނީ ދަތުރުކުރާ ފަރާތްތަކުން ގަންނަ ޓިކެޓުން ލިބޭ ރުފިޔާއަށް ނޫން ކަމަށްވެސް އަސްލަމް ވިދާޅުވިއެވެ.
އާރުޓީއެލްގެ ފުރަތަމަ ފިޔަވަހީގެ ޒޯން އެކެއްގެ ދަށުން ހއ، ހދ އަދި ށ އަތޮޅަށް ވަނީ އެ ހިދުމަތް ފޯރުކޮށްދޭން ފަށައިފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
