އިލެކްޝަން ކޮމިޝަން ލާމަރުކަޒު ކުރުމުގެ ވިސްނުމެއް ސަރުކާރުން ނުގެންގުޅޭ: ޝިޔާމު
އިލެކްޝަން ކޮމިޝަން ލާމަރުކަޒު ކުރުމުގެ ވިސްނުން ސަރުކާރުން ނުގެންގުޅުއްވާކަން ފާހަގަކުރައްވާ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ފާޑުވިދާޅުވެއްޖެއެވެ.
އިލެކްޝަން ކޮމިޝަން ލާމަރުކަޒީ އުސޫލުން ހިންގުމަށް އެއްވެސް މަސައްކަތެއް ކުރަމުން ނުދާކަމަށް ވިދާޅުވެ ޝިޔާމު ފާޑުވިދާޅުވެފައިވަނީ މަޖިލީހުގެ ތިން ވަނަ ދައުރުގެ 18 ވަނަ ބައްދަލުވުމުގައި ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ހުށައެޅުއްވި އިސްލާހަށް ވާހަކަދައްކަވަމުންނެވެ.
މިހާރު ހުށައަޅާަފައިވާ އިސްލާހުގައި ވާގޮތުން އަންހެނުންގެ ތަރައްގީއަށް މަސައްކަތްކުރާ ކޮމެޓީގެ މަގާމެއް ހުސްވެގެން ބައި-އިލެކްޝަނެއް ބާއްވާނަމަ އެ އިންތިޚާބެއް ބާއްވާނީ އަތޮޅު ކައުންސިލުންނެވެ.
ޝިޔާމު ވަނީ އެ އިސްލާހަށްވެސް ވަރަށް ބޮޑަށް ފާޑުވިދާޅުވެފައެވެ.
އަދި އެއީ އަންހެނުން ބާރުވެރިކުރުމަށް މި ސަރުކާރުން މަސައްކަތްކުރަން ރާވައިފާ އުސޫލުތޯވެސް އޭނާ އެއްސެވިއެވެ.
ޝިޔާމު ވިދާޅުވީ ކޮންމެ ބައި އިލެކްޝަނަކަށް 2 ލައްކަ ރުފިޔާ ޚަރަދުވާކަމަށް އިލެކްޝަން ކޮމިޝަނުން ބުނަމުންދާކަމަށެވެ. އޭގެ ތެރެއިންވެސް އެންމެ ބޮޑު ހޭދައެއް ދަނީ ދަތުރުފަތުރުކުރުމަށްކަމަށް އީސީއިން ބުނަމުންދާކަމަށް ޝިޔާމު ވިދާޅުވިއެވެ. އަދި އެއީ ކަންބޮޑުވުމެއްގެ ގޮތުގައި އީސީއިން ފާހަގަކުރަމުންދާކަމަށްވެސް އޭނާ ވިދާޅުވިއެވެ.
އެއާއެކު ޝިޔާމު ވަނީ އިލެކްޝަން ކޮމިޝަނުން ޑީސެނޓަރަލައިޒް ކުރުމުގެ ވިސްނުން ނުގެންގުޅުއްވަނީ ކީއްވެތޯ އައްސަވާފައެވެ. އަދި ސަރުކާރުގެވެސް އެފަދަ ވިސްނުމެއް ނެތްކަމަށް އޭނާ ވިދާޅުވިއެވެ.
"އިލެކްޝަން ކޮމިޝަން ކީއްވެގެންތޯ ޑީސެނޓަރަލައިޒް ކުރުމުގެ ވިސްނުމެއް މި ނުގެންގުޅުއްވަނީ؟ ސަރުކާރުން ކީއްވެގެންތޯ އިލެކްޝަން ކޮމިޝަން ޑީސެންޓްރަލައިޒް ކުރުމުގެ ވިސްނުމެއް މި ނުގެންގުޅެނީ؟ ކީއްތޯ ވާނީ ކޮންމެ އަތޮޅެއްގައި އީސީގެ ދެ ބޭފުޅަކު ނޫނީ ތިން ބޭފުޅަކު ބައިތިއްބަން؟ ނޫނީ ވަކި ރީޖަން ތަކަށް ބަހާލައިގެން ތިއްބަވަން"
ނައިފަރު ދާއިރާގެ މެމްބަރު ޝިޔާމު
ޝިޔާމު ވިދާޅުވީ އިލެކްޝަން ކޮމިޝަނަނުން އިންތިޚާބުތަކަށް ކުރާ ހޭދަ ކުޑަކުރުމަށް ވޯޓު ކަރުދާކޮޅުގައި ހުންނަ ސަލާމަތީ ކަންކަން ބަލަހައްޓާ ފީޗާރސްތައް މަދުކުރުމަށްވެސް އެދެމުންދާކަމަށެވެ. އެހެން ނަމަވެސް އީސީއަށް އޮތް އިތުބާރު މިހާރުވެސް ކުޑަވެފައިވާއިރު، އެ ފީޗާރސްތައް މަދުކުރުމަށް ރުހިވަޑައިނުގަންނަވާކަން ފާހަގަކުރައްވާ ޝިޔާމު ވިދާޅުވީ، ދައުލަތުގެ ޚަރަދުކުޑަކުރުމަށް ޑިމޮކްރަސީ ފުނޑާލުމަކީވެސް ބަލައިގަނެވޭނެކަމެއް ނޫންކަމަށެވެ.
އަދި އަންހެނުންގެ ތަރައްގީއަށް މަސައްކަތްކުރާ ކޮމެޓީތަކަކީ މުހިންމު ނޫން ބައެއްގެ ގޮތުގައި ސިފަވާނެ ފަދަ އިސްލާހުތަކީވެސް ބަލައިގަނެވިގެންވާނެ އިސްލާހުތަކެއް ނޫންކަމަށް އޭނާ ވިދާޅުވިއެވެ.
މިހާރު މަޖިލީހަށް ހުށައަޅާފައިވާ އިސްލާހު އެހެން ގޮތަށް ބަދަލުކުރެއްވުމަށް އަނބުރާ ގެންދެވުމަށްވެސް ޝިޔާމު ވަނީ އެދިލައްވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
