"އެއްޖިންސުން ގުޅުން ހިންގާ އާއްމު ކުރާ އިރުވެސް ބައެއް މީހުން ކަންބޮޑުވަނީ މަގުމަތީ ހުރި ގަހެއް ކަނޑައިގެން"

އެއްޖިންސުން ގުޅުން ހިންގައި އެކަން އާއްމު ކުރާ އިރުވެސް ބައެއް މީހުން ކަންބޮޑުވަނީ މަގުމަތީ ހުރި ގަހެއް ކަނޑާލައިގެން ކަމަށް ބުނެ ޖަމިއްޔަތުއް ސަލަފްގެ ޗީފް މާކެޓިންގ އޮފިސަރ ޢަލީ ރަމީޒު ފާޑުވިދާޅުވެއްޖެއެވެ.

އަމީނީ މަގުގައި ހުރި ގަސްތައް ކަނޑަމުންދާ މައްސަލައާއި ގުޅިގެން ކަންބޮޑުވުން ފާޅުކޮށް ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ އެމްޑީޕީގެ މެމްބަރު ހަސަން ލަތީފު ވަނީ މަޖިލީހަށް މައްސަލައެއް ހުށަހަޅުއްވާފައެވެ. އަދި އެ މައްސަލަ އާއި ގުޅިގެން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވެސް މީގެ ކުރިން ދެ ފަހަރެއްގެ މަތިން މަޖިލީހުގައި ވަނީ ކަންބޮޑުވުން ފާޅުކޮށްފައެވެ. އަދި އެ މައްސަލަ ރައީސް ނަޝީދުގެ ފަރާތުން ކޯޓަށް ހުށަހަޅުއްވަން މިހާރު ވަނީ ނިންމަވާފައެވެ.

އެހެންނަމަވެސް، އަދުގެ މުޖުތަމަޢުގައި އެންމެ އާއްމު ވެފައިވާ އެއް މައްސަލަ ކަމުގައިވާ އެއްޖިންސުން ގުޅުން ހިންގުމާއި އެކަން ޕްރޮމޯޓް ކުރުމުގެ މައްސަލައެއް މީގެ ކުރިން މަޖިލީހަށް ހުށަހަޅުއްވާފައިވާ އިރު އެ މައްސަލަ ވަނީ އެމްޑީޕީގެ މެޖޯރިޓީ އޮންނަ މަޖިލީހުން ބޭރުކޮށްލާފައެވެ.

އަދުގެ އެމްޑީޕީ ސަރުކާރުގެ މިފަދަ ސިޔާސަތު ތަކަށް ފާޑުވިދާޅުވެ ޢަލީ ރަމީޒު މިއަދު ކުރެއްވި ޓުވީޓެއްގައި ވިދާޅުވީ، އެއްޖިންސުން ގުޅުން ހިންގައި އެކަން އާއްމު ކުރުމާއި، ބަނގުރާ ބޮއި އެކަން އިޝްތިހާރު ކުރުމާއި، ކޮރަޕްޝަން ތެރޭގައި ދައުލަތުގެ ބޮޑުންނާއި އާއްމުން ހައްދުފަހަނައަޅައި ގޮސްފައިވާއިރު، ބައެއް މީހުން ކަންބޮޑުވަނީ މަގުމަތީ ހުރި ގަހެއް ކަނޑާލައިގެން ކަމަށެވެ.

"އަޅެ ފަހެ ހައިރާނެއް ނުވޭ ހެއްޔެވެ؟" ޢަލީ ރަމީޒު ސުވާލުކުރައްވާފައިވެއެވެ.

ބަނގުރާ ބޮއި އެކަން އިޝްތިހާރު ކުރާކަމަށް ބުނެ ޢަލީ ރަމީޒު ކަންބޮޑުވުން ފާޅުކޮށްފައި ވާއިރު، ދާދި ފަހުން ޕްރޮސިކިއުޓާ ޖެނެރަލް ހުސައިން ޝަމީމް ޖޯޖިޔާ އަށް ގޮސް ބަނގުރާ ފުޅިއެއް އޭނާގެ އިންސްޓަގްރާމް ސްޓޯރީއަށް ލީ މައްސަލައެއްވެސް ވަނީ ފެންމަތިވެފައެވެ. ބަނގުރާ ބުއިމަކީ އިސްލާމް ދީނުގައި ހަރާމް ކަމަކަށް ވާއިރު، ދިވެހިރާއްޖޭގެ ރައްޔިތަކަށްވެ ހުރެ އެފަދަ ކަމެއް ޕްރޮމޯޓް ކުރުމަކީވެސް ކުށެކެވެ. އެހެން ނަމަވެސް، ދައުލަތުގެ އިސް މަގާމެއްގައި ހުރި މީހެއްގެ ފަރާތުން އެކަން ފެނިގެން ގޮސްފައިވާއިރު، އެކަމާއި ގުޅިގެން ސަރުކާރުން މިހާތަނަށްވެސް އެއްވެސް ބަހެއް ބުނެފައެއް ނުވެއެވެ.

މިފަދަ ދީނާއި ޚިލާފް ބޮޑެތި ނުބައި ކަންކަން އަދުގެ ސަރުކާރުގެ ޒައާމަތުގައި އާއްމު ވަމުންދާތީ ގިނަ ބަޔަކު އަންނަނީ ކަންބޮޑުވުން ފާޅުކުރަމުންނެވެ.