ރައީސް އަކީ ކެރޭ ބޭފުޅެއް؛ ނަގަން ޖެހޭ ޑިސިޝަން ނަންގަވާނެ: ނާޝިޒް
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަކީ ކެރޭ ބޭފުޅެއް ކަމަށާ، ކޮންމެ ކަމެއްގައިވެސް ނިންމަވަން ޖެހޭ ނިންމެވުމެއް ނިންމަވާނެ ކަމަށް ރައްޔިތުންގެ މަޖިލީހުގެ ކިނބިދޫ ދާއިރާގެ މެންބަރު މުހައްމަދު ނާޝިޒު ވިދާޅުވެއްޖެއެވެ.
ރާއްޖެޓީވީގެ ފަލަ ސުރުހީ ޕްރޮގްރާމް ގައި ޓެކްސް ބޮޑު ކުރުމާއި ގުޅޭގޮތުން މަޖިލީހުގެ އާއްމު ކޮމިޓީގައި މިހާރު ކުރިއަށްދާ ބަހުސާއި ގުޅޭގޮތުން ވާހަކަ ދައްކަވަމުން ނާޝިޒު ވިދާޅުވީ، ކޮވިޑާއި ގުޅިގެންނާއި ރަޝިޔާ-ޔުކްރެއިން ހަނގުރާމަ އާއި ގުޅިގެން ކުރިމަތިވަމުންދާ އިގްތިސާދީ ހީނަރުކަމުން އަރައިގަތުމަށް މަސައްކަތް ތަކެއް ކުރަންޖެހޭ ކަމަށެވެ.
މިއާއެކު ނާޝިޒު ވިދާޅުވީ ސްރީލަންކާގެ ހާލަތަކީ މިވަގުތު ރާއްޖެއިން އެކަމުން އިބްރަތް ހާސިލް ކުރަންޖެހޭ ހާލަތެއް ކަމަށެވެ. އެގޮތުން އެ ގައުމުގައި، ކޮވިޑް އައުމުގެ ކުރިން، ޓެކްސް ބޮޑު ކުރަންވީ ވަގުތުގައި ޓެކްސް ކުޑަ ކުރީކަން ފާހަގަކޮށް ނާޝިޒު ވިދާޅުވީ، އެގައުމަށް އެންމެ ބޮޑަށް އާމްދަނީ ބޭނުންވީ ވަގުތު، ޓެކްސް ކުޑަކޮށްގެން ކަންތައް ކުރީ އޭގެ އިދިކޮޅަށް ކަމަށެވެ. ވުމާއެކު އޭގެ ނަތީޖާ އެގައުން ފެންނަމުންދާ ކަމަށާ، އެކަމުން ފިލާވަޅު ލިބިގަނެ ރާއްޖޭގެ އިގްތިސާދު މެނޭޖުކުރުމަށް އަދުގެ ސަރުކާރުން ގެންގުޅޭ ސިޔާސަތަށް ޖާގަދީ އެކަމަށް ތާއީދު ކުރަންޖެހޭނެކަމަށްވެސް ނާޝިޒު ވިދާޅުވިއެވެ.
މީގެ އިތުރުން ނާޝިޒު ވިދާޅުވީ، އެއްވެސް މީހަކަށް ހުރިހާ އެއްޗެއް އެންމެ ރަނގަޅަށް ނޭނގޭނެ ކަމަށެވެ. އެހެންނަމަވެސް ކަންކަމުގެ ތަޖުރިބާކާރު ބޭފުޅުން ދައްކަވާ ވާހަކަތަކާއި، އެބޭފުޅުން ހަދާފައިވާ ދިރާސާތަކާއި، ދުނިޔޭގެ އެކި ގައުމުތަކުން ކޮށްފައިވާ ތަޖުރިބާ އަށްބަލައި އޭގެ އަލީގައި ކުރިއަށް ދިޔުމަކީ ކުރަންޖެހޭ ކަމެއް ކަމަށް އޭނާ ވިދާޅުވިއެވެ.
"އަޅުގަނޑު ގަބޫލުކުރާ ގޮތުގައި ރައީސުލްޖުމްހޫރިއްޔާ އަކީ ވަރަށް ބްރޭވް ބޭފުޅެއް އިނގޭތޯ. ވަރަށް ކެރޭ ވަރަށް ބްރޭވް ބޭފުޅެއް. ކޮންމެ ކަމެއްގެ، އެ ނިންމަވަން އެ ޖެހޭ ޑިސިޝަން، ނަންގަވަންޖެހޭ ޑިސިޝަން ނަންގަވާ އިންގޭތޯ. އެއީ ބޯޑަރ ކްލޯސް ކުރަން ޖެހުނަސް އަނެއްކާ އަލުން ބޯޑަރ ހުޅުވާން ޖެހުނަސް. މެޑިކަލީ އޭރުގަ ރާއްޖެ ތައްޔާރު ކުރުމަށްޓަކައި އޭރު ނަންގަވަން ޖެހޭ ހުރިހާ ޑިސިޝަނެއް ނެންގެވި އިނގޭތޯ."
މެންބަރު މުހައްމަދު ނާޝިޒު
ނާޝިޒު ވިދާޅުވީ ކޮވިޑްގެ ހުރިހާ ކަމެއްވެސް ރައީސުލްޖުމްހޫރިއްޔާ ބެއްލެވީ އަމިއްލަ ފުޅަށް އެ ހުރިހާ ކަމެއްގެ ތެރެއަށްވަދެ ކަމަށާ، އެ ހުރިހާ ކަމެއް މެނޭޖްވެސް ކުރެއްވީ އަމިއްލަ ފުޅަށް އެކަންކަމުގެ ތެރޭގައި އުޅުއްވައި ކަމަށެވެ. އަދި އެގޮތަށް ކަންކަން ކުރުމަކީ އެއްވެސް މީހަކަށް ފަސޭހަ ކަމެއްވެސް ނޫން ކަމަށާ، އެހެން ނަމަވެސް އެމަނިކުފާނު ވަނީ އެގޮތަށް އެކަން ކުރައްވާފައި ކަމަށާ، އެތަން އޭނާއަށްވެސް ވަނީ ފެނިފައި ކަމަށް ވިދާޅުވިއެވެ.
"އެހާގާތުން, އެހާ ރަނގަޅަށް ގައުމާ ދޭތެރޭ ކަންތައް ކުރެއްވި ވެރިއަކު ހަމަގައިމުވެސް އަޅުގަނޑެއް ނުދެކެން އިނގޭތޯ. އެހެންވީމާ އެހެން ބޭފުޅުން އެ ދައްކަވާ ވާހަކަ އަކަށް އަޅުގަނޑަކަށް ހިޔެއް ނުވޭ އެއްވެސް ޖެހިލުމެއް ހުންނާނެ ހެނެއް. މި ގައުމު ސަލާމަތް ކުރުމަށް، މިގައުމުގެ އިގްތިސާދީ ގޮތުން ހުރި ގޮންޖެހުންތަކުން ގައުމު އަރައިގަތުމަށް ކުރައްވަން ޖެހުނު ކޮންމެ ކަމެއްވެސް ކުރައްވާނެ ކަމަށް ގައިމުވެސް އަޅުގަނޑުގެ ހިތަށް ޝައްކެއްނެތް"
މެންބަރު މުހައްމަދު ނާޝިޒު
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
