ވޯޓު ހޯދަން އެންމެ މީހަކަށް 6 ލައްކަ ރުފިޔާ އެންސްޕާއިން ދީފަވޭ: އިލިޔާސް

ނިމިދިޔަ ރިޔާސީ އިންތިޚާބުގައި ރައީސް އިބްރާހިމް މުހައްމަދު ޞާލިހަށް ވޯޓު ހޯދަން ޤައުމީ ހެލްތު އިންޝިއުރެންސް ސްކީޕް އާސަންދަ އަދި އެންސްޕާގެ ބޭނުން ނަހަމަގޮތުގައި ހިފާ ކޮރަޕްޝަން ހިންގާފައިވާކަން މަޖިލީހުގެ ހުޅުދޫ ދާއިރާގެ މެމްބަރު އިލިޔާސް ލަބީބު ހާމަކުރައްވައިފި އެވެ.

އިލިޔާސް މިފަދައިން ހާމަކުރައްވާފައި މި ސަރުކާރުގެ ދަރަންޏާއި، އިންތިޚާބުގެ ތެރޭގައި ދައުަތުގެ މާލިއްޔާއިން ކޮށްފައިވާ ޚަރަދުތަކަށް އަލިއަޅުވާލައްވާ ދަ ޑިމޮކްރެޓްސްގެ ހަރުގެ ޖަލްސާގައި ވާހަކަދައްކަވަމުން ނެވެ.

އިލިޔާސް ވިދާޅުވީ ރައީސް އިބްރާހިމް މުހައްމަދު ޞާލިހަށް ވޯޓު ހޯދުމަށްޓަކައި ނިމިދިޔަ ރިޔާސީ އިންތިޚާބުގައި އާސަންދަ އަދި އެންސްޕާއިން ބޮޑެތި ޚަރަދުތަކެއް ކޮށްފައިވާ ކަމަށެވެ.

އެގޮތުން އެމަނިކުފާނަށް ވޯޓުދޭނެކަމަށް މީހުންލައްވާ އެއްބަސްކުރުމަށްފަހު ބޭސްފަރުވާ ކުރުމުގެ ނަމުގައި "ޗުއްޓީ ހެދުމަށް" އާސަންދަ އަދި އެންސްޕާއިން ޚަރަދުކޮށްގެން އެތައް ބަޔަކު ބޯރަށް ފޮނުވާދީފައިވާކަމަށް އިލިޔާސް ވިދާޅުވި އެވެ. އަދި ވިދާޅުވީ ރައީސް ޞާލިހަށް ވޯޓު ހޯދުމަށް އެންސްޕާއިން އެންމެ މީމަހަކަށް 6 ލައްކަ ޚަރަދުކޮށްފައިވާކަން އެ ތަނުގެ ޚަރަދުތަކަށް ބެލުމުން ހާމަވެފައިވާ ކަމަށެވެ.

"އާސަން ނަމުގައި، އެންސްޕާގެ ނަމުގައި ދިޔައީ ދާރި ބަހަމުން ބަހަމުން. އަޅިގަނޑުމެންނަށް ފެންނަން ހުރި ހިސާބުތަކުގައި އެބަހުރި އެންމެ މީހަކަށް އެބަހުރި 6 ލައްކަ ރުފިޔާ ދީފަ. އެނސްޕާއިން. އެންމެ މީހަކަށް 6 ލައްކަ ރުފިޔާ ދީފަ، މަޖިލީސް މެމްބަރަކު ބުނީމަ އޭނަ ދާއިރާއަށް ވޯޓު ހޯދަދޭނަމޭ ބުނީތީ"

އިލިޔާސް ލަބީބު

މި ސަރުކާރުގެ ދަރަނި އިންތިހާއަށް އިތުރުވެފައިވާކަން ފާހަގަކޮށް އިލިޔާސްގެ ވާހަކައިގައި ވަނީ ކަންބޮޑުވުން ފާޅުކޮށްފަ އެވެ. އޭނާ ވިދާޅުވީ ރައީސް ޞާލިހުގެ ސަރުކާރުން އެކަނި 75 ބިލިއަން ދަރަނި ނަގާފައިވާ ކަމަށެވެ.

އެހެން ނަމަވެސް އެހާ ބޮޑު ދަރަންޏެއް ރައްޔިތުންގެ ބޮލުގައި އަޅުވާފައިވާއިރު، މި ސަރުކާރަށް އާމްދަނީ އިތުރުކުރުމަށް ހިންގިފައިވާ ޕްރޮޖެކްޓެއް ވެސް ނެތް ކަމަށާއި، އަދި އާންމު ރައްޔިތުންގެ އާމްދަނީ އިތުރުކިށްދިނުމަށް ކުރެވުނު ކަމެއް ވެސް ނެންކަމަށެވެ.

ދައުލަތުގެ ދަރަނި އިތުރުކޮށް ނަތީޖާއެއް ނެރެނުދެވުމަކީ ރައީސް ޞާލިހުގެ ވަރަށްބޮޑު ވެއްޓުމެއްކަމަށާއި، ސަރުކާރުން ހިންގާފައިވާ ކޮރަޕްޝަންގެ މައްސަލަތައް ބަލައިފިނަމަ، އަސްލު ހާލަތު އެނގިގެންދާނެކަމަށް އިލިޔާސް ވިދާޅުވި އެވެ.