ގާނޫނުލްއުގޫބާތަށް އިސްލާހު ގެނައުމުގެ ބިލުގައި ބަލަންޖެހޭ ކަންކަން ހުރުމުން އަނބުރާ ގެންގޮސްފި

ވަކި ދީނެއްގެ ބަޔަކާ ދެކޮޅަށް އަމަލުކުރުން ހުއްޓުވުމަށާއި، ދައުލަތުގެ އިގުތިޞާދަށް ގެއްލުންހުރި އަމަލުތައް ކުރުން ކުށަކަށް ހެދުމުގެ ގޮތުން ގާނޫނުލްއުގޫބާތަށް އިސްލާހު ގެނައުމަށް ރައްޔިތުންގެ މަޖިލީހަށް ހުށަހެޅި ބިލު އަނބުރާ ގެންގޮސްފިއެވެ.

ސަރުކާރުގެ ފަރާތުން މާފަންނު ދެކުނު ދާއިރާގެ މެންބަރު އަބްދުﷲ ރިފާއު (ބޮޗޭ) ހުށަހެޅުއްވި މި ބިލަކީ ރާއްޖޭން ބައިވެރިވެފައިވާ ގަތުލުއާންމު ހުއްޓުވުމާ ބެހޭ ބައިނަލްއަގުވާމީ މުއާހަދާއާ އެއްގޮތަށް ގަތުލުއާންމު ހިންގުން ޖިނާއީ ކުށެއްގެ ގޮތުގައި ކަނޑައެޅުމަށް ހުށަހެޅި ބިލެކެވެ.

މި ބިލު މަޖިލީހުން އަނބުރާ ގެންދެވިކަން ކަށަވަރުކޮށްދެއްވަމުން މެންބަރު ރިފާއު ވިދާޅުވީ، ބިލު އަނބުރާ ނެންގެވީ އޭގައި އިތުރަށް ބަލައި ދިރާސާކުރަންޖެހޭ މުހިންމު ކަންތައްތަކެއް ހުރުމުން ކަމަށެވެ. މީގެ ކުރިން މަޖިލީހުގެ ޖަލްސާގެ އެޖެންޑާގައި ދެ ފަހަރެއްގެ މަތިން މި ބިލުގެ މަސައްކަތް ހިމެނުމަށްފަހު ވަނީ އުނިކޮށްފައެވެ.

ހުށަހެޅުނު އިސްލާހުގައިވާ ގޮތުން، ގާނޫނުގެ 140 ވަނަ ބާބުގެ ފަހަތަށް ގަތުލުއާންމާ ބެހޭ ހާއްސަ މާއްދާއެއް އިތުރުކުރުމަށް ވަނީ ހުށަހަޅާފައެވެ. އެގޮތުން ވަކި ގައުމަކަށް، ނަސްލަކަށް، ދަރިފަސްކޮޅަކަށް ނުވަތަ ދީނަކަށް ނިސްބަތްވާ ޖަމާއަތަކާ ދެކޮޅަށް ޖިސްމާނީ ނުވަތަ ނަފްސާނީ ބޮޑެތި އަނިޔާތައް ދިނުން ފަދަ އަމަލުތަކީ ޖިނާއީ ކުށެއްގެ ގޮތުގައި ކަނޑައެޅުން ހިމެނެއެވެ.

އޭގެ އިތުރުން، ދައުލަތުގެ އިގުތިޞާދަށް ބޮޑު ގެއްލުމެއް ލިބިދާނެކަން އެނގިހުރެ ނުވަތަ ފަރުވާލެއް ނެތި ކުރާ ކަންތައްތަކުގެ ތެރެއިން، މުހިންމު އުމްރާނީ ވަސީލަތްތަކަށާއި އެއާ ގުޅުންހުރި ކޮމްޕިއުޓަރު ސިސްޓަމްތަކަށް ގެއްލުންދިނުން ކުށަކަށް ހެދުން ވެސް މި ބިލުގައި އަސާސީ ކަމެއްގެ ގޮތުގައި ހިމެނެއެވެ.

މި ބިލާ ގުޅިގެން އާންމުންގެ މެދުގައި ވަނީ އެކި ސުވާލުތަކާއި ކަންބޮޑުވުންތައް އުފެދިފައެވެ. ހާއްސަކޮށް ރަސްމާލެ މަޝްރޫއާ ގުޅިގެން ކުރެވޭ ފާޑުކިޔުންތައް ހުއްޓުވުމަށް ގެންނަ އިސްލާހެއް ކަމަށް ބައެއް ފަރާތްތަކުން ތުހުމަތުކުރި ނަމަވެސް، ބަންޑާރަނައިބު އަޙުމަދު އުޝާމް ވަނީ އެ ތުހުމަތުތައް ދޮގުކުރައްވައި، މިއީ ބައިނަލްއަގުވާމީ މުއާހަދާއަކަށް އަމަލުކުރުމުގެ ގޮތުން ހުށަހެޅި ބިލެއްކަން ސާފުކޮށްދެއްވާފައެވެ.

ސަރުކާރުން މި ބިލު ހުށަހަޅާފައިވަނީ، ރަސްމާލޭގެ މަޝްރޫއާ ގުޅިގެން ރާއްޖޭގެ ސިޔާސީ މަސްރަހުގައި ބޮޑެތި ބަހުސްތަކެއް އުފެދިފައިވާ ދަނދިވަޅެއްގައެވެ. އެގޮތުން، ރަސްމާލޭ މަޝްރޫއާ ގުޅިގެން އިދިކޮޅު މައި ޕާޓީ އެމްޑީޕީން މިހާތަނަށް ރަސްމީ ގޮތުން އެއްވެސް ގޮތަކަށް ދެކޮޅު ހަދާފައި ނުވީނަމަވެސް، އެ ޕާޓީން ރަސްމާލެ މަޝްރޫއާ ގުޅުންހުރި ކަންތަކުގައި ކުރިއަށްދާނެ ގޮތާމެދު ބާއްވާ އެ ޕާޓީގެ ކުއްލި ގައުމީ މަޖިލީހުގެ ބައްދަލުވުމެއް ވަރަށް އަވަހަށް އޮންނާނެއެވެ.